নিয়মীয়া বাৰ্তা ৯ মাৰ্চঃ মিত্রজোঁটৰ অন্যতম অংশীদাৰ অগপ সভাপতি অতুল বৰাৰ হৈ প্রচাৰ চলাই নির্বাচনী অভিযান আৰম্ভ কৰিলে মুখ্যমন্ত্রী সর্বানন্দ সোণোৱালে৷ আজি বোকাখাত সমষ্টিৰ প্রার্থী তথা অগপ সভাপতি অতুল বৰাই মনোনয়ন–পত্র দাখিলৰ পাছত মুখ্যমন্ত্রী সোণোৱালে বোকাখাত খেলপথাৰত অনুষ্ঠিত এখন বিশাল নির্বাচনী সভাত অংশগ্রহণ কৰে৷ কেইবাসহস্র লোকৰ উপস্থিতিত অনুষ্ঠিত সমাৱেশখনত মুখ্যমন্ত্রী সোণোৱালে মিত্রজোঁট প্রক্ষেপিত বোকাখাতৰ প্রার্থী অতুল বৰাক ভোট দি জয়যুক্ত কৰিবলৈ আহ্বান জনায়৷ উপস্থিত জনতাই এই আহ্বানলৈ আগবঢ়োৱা বিপুল সঁহাৰিত অভিভূত হৈ মুখ্যমন্ত্রী সোণোৱালে কয়– ‘এইখন মোৰ প্রথম নির্বাচনী সভা৷ প্রথমখন নির্বাচনী সভাতেই আমাৰ যেতিয়া জয় নিশ্চিত হ’ল, আৰু ভাবিবলগীয়া নাই৷ উল্লেখ্য যে বোকাখাত বিহুতলীৰ পৰা বৃহৎসংখ্যক সমর্থকসহ পদযাত্রা কৰি আহি অগপ সভাপতি অতুল বৰাই বোকাখাত জিলা নির্বাচনী বিষয়াৰ হাতত মনোনয়ন–পত্র দাখিল কৰে৷ এখন সু–সজ্জিত জীপচীত উঠি অহা অগপ সভাপতি অতুল বৰাৰ সৈতে আছিল পৰিবহণ মন্ত্রী চন্দ্রমোহন পাটোৱাৰী আৰু গোলাঘাট জিলা অগপ–বিজেপিৰ কেইবাজনো শীর্ষ নেতা৷
মনোনয়ন–পত্র দাখিলৰ পাছত অগপ সভাপতি অতুল বৰাই স্বাধীনতাৰ পাছত বোকাখাতত বিগত পাঁচ বছৰত প্রথম আৰু চকুত লগা উন্নয়ন সাধন হৈছে বুলি দাবী কৰে৷ তেওঁ কয় যে আজিৰ তাৰিখত বোকাখাতত অগপ আৰু বিজেপিৰ মাজত কোনো মত পার্থক্য নাই৷ ভৱিষ্যতেও এইদৰেই আগবাঢ়ি যাব৷ ইফালে, বোকাখাত খেলপথাৰত আয়োজিত সমাৱেশখনত মুখ্যমন্ত্রী সোণোৱালৰ উপৰি বিজেপিৰ ৰাষ্ট্রীয় উপ–সভাপতি তথা অসম ৰাজ্যিক বিজেপিৰ প্রভাৰী বৈজয়ন্ত জয় পাণ্ডাই সন্মানীয় অতিথি হিচাপে অংশগ্রহণ কৰে৷ নিজে হেলিকপ্ঢাৰ চলাই বোকাখাত খেলপথাৰত অৱতৰণ কৰা পাণ্ডাই কয়– অতুল বৰাৰ মন আৰু কাম মই ভালদৰে জানো৷ এনে এজন ব্যক্তিয়ে বোকাখাতক প্রতিনিধিত্ব কৰাটো ৰাষ্ট্রৰ বাবে গৌৰৱ৷ সমাৱেশখনত পৰিবহণ মন্ত্রী চন্দ্রমোহন পাটোৱাৰী আৰু ৰাজ্যসভাৰ সাংসদ কামাখ্যাপ্রসাদ তাছাও উপস্থিত আছিল৷ ইফালে, আজিৰ দিনটোত বোকাখাতৰ ৰাইজৰ দলৰ প্রার্থী জীৱন বৰা আৰু আঞ্চলিক গণ মর্চাৰ প্রার্থী প্রণৱ দলেও সমর্থকসহ বোকাখাত জিলা নির্বাচনী বিষয়াৰ হাতত মনোনয়ন–পত্র দাখিল কৰে৷