নিয়মীয়া বাৰ্তা, ৩০ আগষ্টঃ সমাগত বিধানসভা নির্বাচনত দলীয় প্রার্থিত্ব সন্দর্ভত এক বিস্ফোৰক মন্তব্য কৰিছে বিজেপিৰ ৰাজ্যিক সভাপতি ৰঞ্জিত কুমাৰ দাসে৷ অহা জানুৱাৰী মাহৰ পূর্বে যদি কোনোবাই দলীয় টিকট বিচাৰে, তেন্তে সংশ্লিষ্ট ব্যক্তিজনে টিকট লাভ নকৰাটো নিশ্চিত বুলি ৰাজ্যিক বিজেপিৰ সভাপতি দাসে স্পষ্ট কৰি দিয়ে৷ দলীয় প্রার্থিত্বক কেন্দ্র কৰি ইতিমধ্যে একাংশ নেতাই ভিতৰি ভিতৰি তৎপৰতা আৰম্ভ কৰাৰ সময়তে ৰাজ্যিক বিজেপিৰ সভাপতি দাসে কালি সংবাদ মাধ্যমৰ আগত কয়– ‘প্রার্থিত্ব সন্দর্ভত আমাৰ কোনো আলোচনা হোৱা নাই৷
জানুৱাৰী মাহৰ আগতে যদি কোনোবাই প্রার্থিত্বক লৈ আলোচনা কৰে তেতিয়াহ’লে তেওঁ প্রার্থিত্ব নোপোৱাটো নিশ্চিত৷ আমি এতিয়া সংগঠনৰ কাম কৰি আছোঁ৷ সংগঠনৰ কাম কৰাৰ কাৰণে ইতিমধ্যে ৰণকৌশল প্রস্তুত কৰা হৈছে৷’ দলৰ সাংগঠনিক ভেটি নির্বাচনৰ পূর্বে সুদৃঢ় কৰাৰ লক্ষ্যৰে ৰাজ্যত ৩.২ লাখ পৃষ্ঠাপ্রমুখক সাজু কৰি তোলা হৈছে বুলি তেওঁ সদৰী কৰে৷
ৰাজ্যিক বিজেপিৰ সভাপতিজনে পুনৰ কয়– ‘অহা ৪ ছেপ্টেম্বৰত আমাৰ ৰাজ্যিক কার্যনির্বাহক অনুষ্ঠিত হ’ব৷ ইয়াৰ পিছতে অহা ৫ ছেপ্টেম্বৰৰ পৰা পৃষ্ঠাপ্রমুখসকলে বুথসমূহত নিজৰ নিজৰ কাম কৰিব৷ ইতিমধ্যে ৫০ লাখ পৰিয়ালৰ লগত সম্পর্ক স্থাপন কৰাৰ কাৰণে জনসম্পর্ক অভিযান চলি আছে৷ আৰু ইয়াৰ সমান্তৰালভাৱে বুথৰ কার্যকর্তা বা বুথৰ পৃষ্ঠাপ্রমুখ ৬০টা গোটৰ দায়িত্বত আছে৷ আমাৰ দলৰ ৪২ লাখ সদস্য আছে৷ তেওঁলোকে যদি এটাকৈ ওপৰঞ্চি ভোট আনে, তেন্তে আমি ৮৪ লাখ ভোট পাম৷ বিগত লোকসভা নির্বাচনত ৬৪ লাখ ভোট পাই আমি ১০টা সমষ্টিত জয়লাভ কৰিবলৈ সক্ষম হৈছিলোঁ৷
ৰাজ্যত ২ কোটি ভোট আছে৷ ইয়াৰে ডেৰ কোটি অর্থাৎ ৭৫ শতাংশই ভোটাধিকাৰ সাব্যস্ত কৰিব৷ তাৰে ৮৪ লাখ ভোট পালে আমি যি লক্ষ্য লৈছোঁ তাত অনায়াসে উপনীত হৈ মিছন ১০০ প্লাছ স্পর্শ কৰিব পাৰিম৷’ এইবাৰ বিজেপিয়ে প্রার্থিত্বৰ ক্ষেত্রত যুৱ প্রজন্মক অগ্রাধিকাৰ দিব নেকি বুলি সাংবাদিকে সোধা প্রশ্ণৰ উত্তৰত ৰাজ্যিক বিজেপিৰ সভাপতি দাসে এক তাৎপর্যপূর্ণ মন্তব্য কৰে৷
তেওঁ অতি স্পষ্টভাৱে কয় যে বিজেপিত যুৱ বুলি কোনো কথা নাই৷ মহিলাৰ বাবে বিশেষভাৱে এটা কোটা থাকে৷ মহিলাৰ ক্ষেত্রত সুকীয়াকৈ এটা সাংবিধানিক নিয়ম আছে৷ যুৱ–বৃদ্ধ বুলি বিজেপিত কোনোধৰণৰ কথা নাই৷ এতিয়াতো সকলোৱে আমাৰ যুৱকেই৷ সেয়েহে আমি এতিয়া দুই–চাৰিজন বয়োজ্যেষ্ঠ চাব লাগিব৷ ৰাজ্যৰ মিত্রজোঁট চৰকাৰৰ অন্যতম অংশীদাৰ অগপৰে আসন বুজাবুজিৰ বিষয়টো ৰাষ্ট্রীয় নেতৃত্বই স্থিৰ কৰিব বুলি তেওঁ উল্লেখ কৰে৷
তেওঁৰ মতে এইক্ষেত্রত অগপৰ কেন্দ্রীয় সমিতিৰ সৈতে বিজেপিৰ ৰাষ্ট্রীয় নেতৃত্বই আলোচনা কৰি সিদ্ধান্ত গ্রহণ কৰিব৷ পলাশবাৰী সমষ্টিটো ইতিমধ্যে অগপক এৰি দিয়া বুলি হোৱা চর্চা ৰাজ্যিক বিজেপিৰ সভাপতি দাসে পোনছাটেই নস্যাৎ কৰে৷ সাংবাদিকে বিষয়টো উনুকিয়াই দিয়াত তেওঁ কয় যে তেনেকুৱা কথা যদি কোনো অকর্তৃত্বশীল মানুহে কৈছে, মই নাজানো৷ মই সভাপতি, মইতো তেনেকুৱা কথা কোৱা নাই৷ মোৰ বাহিৰে আৰু ৰাষ্ট্রীয় সভাপতিৰ বাহিৰে এতিয়া তেনেকুৱা কথা কোৱা সকলো ব্যক্তিয়েই অকর্তৃত্বশীল হ’ব৷ বর্তমান তাত আমাৰ দলৰ বিধায়ক আছে৷ এনেধৰণৰ কথা কোনে কৈছে নাজানো৷ কিন্তু সেয়া শোভা নাপায়৷ কংগ্রেছ–এআইইউডিএফৰ্ মিত্রতা তথা মহাজোঁট বন্ধনক লৈ তেওঁ প্রতিক্রিয়া প্রকাশ কৰে৷
বিশেষকৈ বিৰোধীৰ মহাজোঁট বন্ধনে বিজেপিৰ নির্বাচনী তৎপৰতাত কোনোধৰণৰ প্রভাৱ নেপেলায় বুলি দাবী কৰি তেওঁ কয় যে প্রভাৱ দূৰৈৰ কথা আমি ইয়াক আদৰণি জনাইছোঁ৷ কংগ্রেছ–এআইইউডিএফৰ্ যি মহাজোঁটৰ কথা কৈ থকা হৈছে, তাক আমি আদৰণি জনাম৷ কাৰণ অসমত বসবাস কৰা স্বাভিমানী ভাৰতীয়সকল আৰু অসমত বসবাস কৰা স্বাভিমানী অসমীয়াসকল যেতিয়ালৈকে থাকে তেতিয়ালৈকে সেই মহাজোঁটে আমাক কোনোধৰণৰ ক্ষতি কৰিব নোৱাৰে৷ বৰঞ্চ তাৰ কাৰণে আগন্তুক দিনত আমাৰ লাভহে হ’ব৷
২০২১ চনত অনুষ্ঠিতব্য আগন্তুক বিধানসভা নির্বাচনত বিজেপিয়ে কিমান আসন লাভ কৰিব বুলি সাংবাদিকে সোধা এটা প্রশ্ণৰ বিপৰীতে ৰাজ্যিক বিজেপিৰ সভাপতিজনৰ স্পষ্ট উত্তৰ– ‘আমি ১০০ প্লাছ লক্ষ্য ৰাখিছোঁ৷ আজি বা কালি আমি যি খবৰ পাই আছো, সেই অনুসৰি আগন্তুক দিনত নভবা ধৰণে ধর্মীয় সংখ্যালঘু অঞ্চলত ভোট পাবলৈ সক্ষম হ’ম৷ মোদী আৰু সোণোৱাল চৰকাৰে গ্রহণ কৰা আঁচনিসমূহে সকলোকে স্পর্শ কৰিছে৷ চৰাঞ্চল আৰু ধর্মীয় সংখ্যালঘু মানুহৰ মাজত এতিয়া চিন্তা হৈছে৷ কংগ্রেছ–এআইইউডিএফে যি মহাজোঁট গঠন কৰিছে তাত ধর্মীয় সংখ্যালঘু নাই৷ ধর্মীয় সংখ্যালঘুসকল বিবেকৱান মানুহ৷ তেওঁলোক কংগ্রেছ–এআইইউডিএফত্ বিক্রী যোৱা ভোটাৰ নহয়, এটা সময়ত বেলেগ কথা আছিল৷ কিন্তু এইবাৰ তেওঁলোকে বিবেক ভোট দিব৷’