নিয়মীয়া বাৰ্তা ৩০ মেঃ কামৰূপ জিলাৰ ছয়গাঁও আৰক্ষী থানাৰ অন্তৰ্গত তথা ছয়গাঁও মহাবিদ্যালয়ৰ সমীপত আজি পুৱা সংঘটিত হোৱা এক শোকাৱহ পথ দুৰ্ঘটনাত এজন লোক থিতাতে নিহত হোৱাৰ লগতে পত্নী গুৰুতৰভাৱে আহত হয়। জানিব পৰা মতে, শুৱালকুছি গন্ধমৌ গাঁৱৰ নজৰুল হুছেইন নামৰ লোকজনে নিজৰ এ এছ ০১ এ ৱাই ৪০৮০ নম্বৰৰ এল্টো গাড়ীখনেৰে চাকৰি সূত্ৰে পত্নী অমিয়া বেগমক লগত লৈ ছমৰীয়ালৈ আহি আছিল। ছয়গাঁও মহাবিদ্যালয়ৰ ওচৰত ৰাষ্ট্ৰীয় ঘাই পথত হঠাৎ নিয়ন্ত্ৰণ হেৰুৱাই বাগৰি পৰে গাড়ীখন। ফলত থিতাতে নিহত হয় চালকৰ আসনত থকা নজৰুল ইছলাম নামৰ লোকজন। আনহাতে গুৰুতৰভাৱে আহত মহিলা গৰাকীক উন্নত চিকিৎসাৰ বাবে গুৱাহাটীলৈ প্ৰেৰণ কৰা বুলি জানিব পৰা গৈছে ।