নিয়মীয়া বাৰ্তা ২১ অক্টোবৰঃ দিল্লী বিশ্ববিদ্যালয়ত অধ্যায়নৰ বাবে আগ্রহী অসমৰ ছাত্র–ছাত্রীসকলৰ বাবে অতি সুখবৰ৷ এতিয়াৰে পৰা অসমৰ ৰাজ্যিক শিক্ষা ব’ৰ্ডৰ অধীনত অধ্যয়ন কৰা ছাত্র–ছাত্রীসকলে ‘অল্টাৰনেটিভ ইংলিছ’ক দিল্লী বিশ্ববিদ্যালয়ৰ স্নাতক শ্রেণীত নামভর্তিৰ সময়ত ‘বেষ্ট অফ ফৰ’ বিষয়ত সন্নিৱিষ্ট কৰিব পাৰিব৷ আজি বিশ্ববিদ্যালয়খনে এক অধিসূচনা জাৰি কৰি এই কথা ৰাজহুৱা কৰিছে৷ কেৱল অসমৰ ছাত্র–ছাত্রীসকলৰ কথা বিবেচনা কৰিয়েই দিল্লী বিশ্ববিদ্যালয় কর্তৃপক্ষই এই সিদ্ধান্তত উপনীত হৈছে৷ এইক্ষেত্রত দীর্ঘদিন ধৰি দিল্লীস্থিত সদৌ অসমীয়া ছাত্র সংস্থাই (আছা) বিশ্ববিদ্যালয় কর্তৃপক্ষৰ ওচৰত দাবী জনাই আহিছিল৷
আছাৰ এই দাবীক গুৰুত্ব প্রদান কৰি দিল্লী বিশ্ববিদ্যালয়ৰ নামভর্তি প্রক্রিয়াৰ সৈতে জড়িত হৈ থকা সহযোগী অধ্যাপক ড০ সঞ্জীৱ কুমাৰ বৈশ্যই সংশ্লিষ্ট কর্তৃপক্ষৰ সৈতে সমগ্র বিষয়টো যুক্তি সহকাৰে উত্থাপন কৰিছিল৷ দীর্ঘদিনীয়া যুঁজৰ অন্তত দিল্লী বিশ্ববিদ্যালয়ে গ্রহণ কৰা আজিৰ এই সিদ্ধান্তৰ বাবে ড০ বৈশ্যই কৃতজ্ঞতা প্রকাশ কৰে৷ দিল্লীস্থিত আছাম মিডিয়া চেণ্টাৰত এখন সংবাদ মেল সম্বোধন কৰি ড০ বৈশ্যই লগতে কয় যে দিল্লী বিশ্ববিদ্যালয়ৰ শেহতীয়া এই সিদ্ধান্তৰ পাছত অসমৰ ছাত্র–ছাত্রীসকল বিশেষভাৱে উপকৃত হ’ব৷
উল্লেখ্য যে ইয়াৰ পূর্বে ‘অল্টাৰনেটিভ ইংলিছ’ বিষয়টো ‘বেষ্ট অফ ফৰ’ত সন্নিৱিষ্ট কৰিবলৈ হ’লে ২.৫ শতাংশ নম্বৰ কর্তন কৰা হৈছিল৷ যাৰ বাবে দিল্লী বিশ্ববিদ্যালয়ৰ কাট অফ মার্কছৰ তালিকাত অসমৰ ছাত্র–ছাত্রীসকল পিছপৰি থাকিছিল৷ আনহাতে সংবাদ মেলত উপস্থিত থকা দিল্লীস্থিত আছাৰ সভাপতি শুভ্রজ্যোতি দুৱৰা আৰু সাধাৰণ সম্পাদক মৃগেনজ্যোতি কাশ্যপেও দিল্লী বিশ্ববিদ্যালয়ে আছাৰ দীর্ঘদিনীয়া দাবীৰ প্রতি সঁহাৰি জনোৱাত উৎফুল্লিত হৈছে৷