নিয়মীয়া বাৰ্তা, ২২ জুলাইঃ দুলীয়াজান অইলৰ এটা নলাৰ পৰা আজি উদ্ধাৰ হৈছে এটা মৃতদেহ । উদ্ধাৰ হোৱা মৃতদেহটো অইল মাৰ্কেটৰ আগৰৱালা ব্যৱসায়ী প্ৰতিষ্ঠানৰ কৰ্মচাৰী মনোজ নায়ক (৪০) বুলি আৰক্ষীয়ে চিনাক্ত কৰিছে ।
জানিব পৰামতে কালি বিয়লি ব্যৱসায়ী প্ৰতিষ্ঠান বন্ধ কৰি ঘৰলৈ যোৱা পাছৰে পৰা সন্ধানহীন হৈ আছিল উক্ত কৰ্মচাৰীজন । ইফালে অইল আবাসিক টি ডি প্লাচ এলেকাৰ লোকজনৰ সন্ধানত পৰিয়ালৰ লোকে স্হানীয় এলেকাত বিচাৰ-খোচাৰ কৰে যদিও কোনো শুংসূত্ৰ নাপালে।
এনেতে আজি দুপৰীয়া স্থানীয় ৰাইজে দুলীয়াজান মছজিদৰ সমীপৰ অইলৰ নলাত সন্ধানহীন কৰ্মচাৰীজনৰ মৃতদেহটো প্ৰত্যক্ষ কৰি স্হানীয় আৰক্ষীক খবৰ দিয়ে । ইতিমধ্যে আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে অসম মেডিকেল কলেজ হাস্পতাললৈ প্ৰেৰণ কৰে ।