নিয়মীয়া বাৰ্তা, ২৬ জুন : আজি পুৱাভাগত দুলীয়াজান ৰাজপথত সংঘটিত এক পথ দুৰ্ঘটনাত নিহত হয় এজন লোক । হুকুটা চাৰিআলিত সংঘটিত দূৰ্ঘটনাত নিহত লোকজন স্হানীয় ২ নং নাওহলীয়াৰ বিলাল আহমেদ তালুকদাৰ (৬৫) বুলি জানিব পৰা গৈছে ।
প্ৰাপ্ত তথ্য অনুসৰি উক্ত লোকজনে পুৱা প্ৰায় ১০.৪০ মান বজাত চাইকেলেৰে ঘৰৰ পৰা দুলীয়াজান অভিমুখে আহি থকা অৱস্থাত এনেতে দুলীয়াজানৰ পৰা তিনিচুকীয়াৰ বাঘজানলৈ যোৱা এচ ০১ জেচি ২২৬৭ নম্বৰৰ এখন ট্ৰাকে মহতিয়াই নিয়াত এই শোকাবহ দুৰ্ঘটনাতো সংঘটিত হয় । পাছত ঘটনাস্থলীৰ পৰা লোকজনক সংকটজনক অৱস্থাত অইল ইণ্ডিয়া হাস্পতাললৈ নিয়া হয় যদিও পাছত চিকিৎসকে মৃত বুলি ঘোষণা কৰে । ডিব্ৰুগড় অসম চিকিৎসা মহাবিদ্যালয়ৰ হাস্পতালত নিহত লোকজনৰ মৃতদেহটো মৰণোত্তৰ পৰীক্ষাৰ কৰা হয় ।