নিয়মীয়া বাৰ্তা, ১৪ জুনঃ বহিঃৰাজ্যৰ পৰা অহা লোকৰ দ্বাৰা ৰাজ্যত ক’ৰোনাৰ সংক্রমণ বৃদ্ধি পোৱাৰ সময়তে কেৰালাৰ পৰা ১৭খন ৰে’লেৰে অসমলৈ আহি আছে ২৫ হাজাৰ যুৱক–যুৱতী তথা ছাত্র–ছাত্রী৷ শনিবাৰে এই তথ্য সদৰী কৰে স্বাস্থ্যমন্ত্রী ড০ হিমন্ত বিশ্ব শর্মাই৷
এখন সংবাদ মেলত মন্ত্রীগৰাকীয়ে প্রকাশ কৰা অনুসৰি বহিঃৰাজ্যৰ পৰা আহিব লগা লোকসকলৰ অধিকাংশই ইতিমধ্যে অসমত প্রৱেশ কৰিছে৷ কেৰালা চৰকাৰে প্রেৰণ কৰিব লগা এই ২৫ হাজাৰ ছাত্র–ছাত্রী অহাৰ পাছত অসমত ক’ৰোনা আক্রান্তৰ সংখ্যা হঠাৎ ঊর্ধ্বমুখী হোৱাৰ সম্ভাৱনা আছে৷
ইতিমধ্যে শনিবাৰে দুখন ৰে’লে কেৰালাৰ পৰা যাত্রা আৰম্ভ কৰিছে৷ অসম চৰকাৰে কেৰালা চৰকাৰক এই ১৭খন ৰে’লৰ ভাৰাৰ ধন আদায় দিছে৷ কেৰালাৰ লগতে বাংগালুৰুৰ পৰাও দুখন ৰে’লে অসমলৈ কঢ়িয়াই আনিব বহু লোক৷ অৱশ্যে মহাৰাষ্ট্র, গুজৰাট, চেন্নাই অথবা দিল্লীৰ পৰা অহা লোকসকলে যি হাৰত ক’ৰোনা সংক্রমণ বৃদ্ধি কৰিছিল, তেনে সংক্রমণ কেৰালাৰ পৰা অহা লোকৰ দ্বাৰা বৃদ্ধিৰ সম্ভাৱনা কম৷ মন্ত্রীগৰাকীয়ে জানিবলৈ দিয়ে যে অসমলৈ এতিয়ালৈ উভতি আহিছে ১,৭৩,৪৯৩জন লোক৷ ইয়াৰে বাছ বা আন বাহনেৰে অসমলৈ উভতি আহিছে ৬৫,১৫৬জন লোক৷ ১২৪খন ৰে’লেৰে ৬৮,৬৩০জন লোক আৰু ৪৫২খন বিমানেৰে ৩৯,৭৩০জন লোক উভতি আহিছে৷ অসমলৈ উভতি অহা লোকৰ সমান্তৰালকৈ ৰাজ্যখনৰ পৰা ওলাই গৈছে ২০,১৫৬জন লোক৷ ৰে’লেৰে ৬,৭৫৬জন লোক অসমৰ পৰা ওলাই যোৱাৰ বিপৰীতে গুৱাহাটীৰ পৰা বিমানেৰে ওলাই গৈছে ৩৫০জন লোক৷
আনহাতে, উত্তৰ–পূবৰ বিভিন্ন ৰাজ্যৰ পৰা অসমলৈ উভতি আহিছে ৬৭ হাজাৰজন লোক৷ ইফালে, ৰাজ্যত ১ জুনৰ পৰা আজিৰ দিনটোলৈ মুঠ ২,০১,৫০৩জন লোকক পৰীক্ষা কৰা হৈছে বুলি স্বাস্থ্যমন্ত্রীগৰাকীয়্ সংবাদ মেলত অৱগত কৰে৷ তেওঁ কয়– ১৩ দিনৰ ভিতৰতে ২ লাখৰ অধিক লোকক পৰীক্ষা সম্পূর্ণ কৰাটো অসমৰ দৰে ৰাজ্যৰ বাবে যথেষ্ট গুৰুত্বপূর্ণ দিশ৷ এটা সময় আছিল আমি ক’ৰোনা পৰীক্ষাৰ ক্ষেত্রত কেৱল পশ্চিমবংগৰ আগত আছিলোঁ৷ কিন্তু এতিয়া পঞ্জাব, মহাৰাষ্ট্র, চণ্ডীগড়, ওড়িশা, কেৰালা, উত্তৰাখণ্ড, ছত্তিশগড়, পশ্চিমবংগ, মধ্যপ্রদেশ, ঝাৰখণ্ড, উত্তৰপ্রদেশ, বিহাৰ এই ৰাজ্যকেইখনৰ তুলনাত আমাৰ পৰীক্ষা অধিক হৈছে৷ মহাৰাষ্ট্র, পশ্চিমবংগ, গুজৰাটৰ তুলনাত অসমৰ ক’ৰোনা পৰীক্ষা অধিক হোৱাটো যথেষ্ট উল্লেখযোগ্য দিশ৷ আমাৰ তুলনাত কর্ণাটক, হাৰিয়ানা, হিমাচল প্রদেশ, ৰাজস্থান, তামিলনাডু, অন্ধ্রপ্রদেশ আৰু দিল্লীয়ে অধিক পৰীক্ষা সম্পন্ন কৰিবলৈ সক্ষম হৈছে৷ অৱশ্যে অহা ৩০ জুনৰ ভিতৰত অসমে ৩ লাখ লোকৰ ক’ৰোনা পৰীক্ষা কৰিবলৈ সক্ষম হ’ব৷ এই জটিল সময়ৰ মাজতো ৰাজ্যত এতিয়া ১১টা পৰীক্ষাগাৰত ছোৱাব পৰীক্ষা কৰি থকা হৈছে৷ অহা সোমবাৰে গুৱাহাটী চিকিৎসা মহাবিদ্যালয়ত আৰু এটা পৰীক্ষাগাৰ মুকলি কৰা হ’ব৷
মন্ত্রী ড০ শর্মাই শনিবাৰে আন এক তথ্য সদৰী কৰি উল্লেখ কৰে যে কোৱাৰেণ্টাইনত থকা লোকসকলক মানসিকভাৱে শক্তিশালী কৰি ৰাখিবলৈ ২২০জন মনোবিজ্ঞানীয়ে স্বেচ্ছাই কাউঞ্চেলিং প্রদান কৰিব৷ মনোবিজ্ঞান বিশেষজ্ঞ মৈথিলী হাজৰিকা, বর্ণালী দাস আৰু শ্যামন্ত দাসৰ নেতৃত্বত আৰম্ভ কৰা এই কার্যসূচীৰ নাম দিয়া হৈছে ‘মনন’৷
১০৪ৰ জৰিয়তে ফোন কৰিলে এইসকল বিশেষজ্ঞই সহযোগিতা আগবঢ়াব৷ তেওঁ ইয়াকো কয় যে ৰাজ্যত এতিয়ালৈ ৩৪৫জন লোকক হোটেলত কোৱাৰেণ্টাইন কৰা হৈছে৷ ইয়াৰ বাবদ ৰাজ্য চৰকাৰে ব্যয় কৰিছে ২৬ কোটি টকা৷ আনহাতে, হোম কোৱাৰেণ্টাইনত ৪০ হাজাৰজন লোক ৰখা হৈছে৷ তেওঁলোকক ২ হাজাৰ টকাকৈ আদায় দিয়াৰ বাবদ ৮ কোটি টকা ব্যয় কৰিছে চৰকাৰে৷ একেদৰে বহিঃৰাজ্যত থকা পৰিয়ালক আদায় দিয়া ধনৰ বাবদ ১৫৩ কোটি টকা ব্যয় কৰা হৈছে৷