নিয়মীয়া বাৰ্তা, ৯ ছেপ্টেম্বৰঃ অসমৰ যোৰহাটৰ নিমাতীঘাটত ব্রহ্মপুত্রৰ বুুকুত সংঘটিত ভয়াৱহ নাও দুর্ঘটনাত উদ্বিগ্ণতা প্রকাশ কৰিছে প্রধানমন্ত্রী নৰেন্দ্র মোদীয়ে৷ ৰাজ্যৰ মুখ্যমন্ত্রী ড০ হিমন্ত বিশ্ব শর্মাৰ সৈতে টেলিফোনিক বার্তালাপত প্রধানমন্ত্রী মোদীয়ে দুর্ঘটনাক লৈ গভীৰ উদ্বেগ প্রকাশ কৰি দুর্ঘটনাৰ সবিশেষ বুজ লোৱাৰ লগতে সম্ভৱপৰ সকলো সহায়ৰ আশ্বাস দিয়ে৷
ইয়াৰ পূর্বে প্রধানমন্ত্রীগৰাকীয়ে টুইটযোগে নাও দুর্ঘটনাক লৈ উদ্বিগ্নতা প্রকাশ কৰি কয়– অসমত সংঘটিত নাও দুর্ঘটনাই শোকাহত কৰিছে৷ যাত্রীসকলক উদ্ধাৰ কৰাৰ বাবে সম্ভৱপৰ সকলো প্রয়াস কৰি থকা হৈছে৷ সকলোৰে সুৰক্ষা আৰু কল্যাণৰ বাবে প্রার্থনা জনাইছোঁ৷