নিয়মীয়া বাৰ্তা ২৫ নৱেম্বৰঃ প্রাক্তন মুখ্যমন্ত্রী তৰুণ গগৈক শেষ শ্রদ্ধা জ্ঞাপন কৰিবলৈ আজি গুৱাহাটীত উপস্থিত হ’ব নিখিল ভাৰত কংগ্রেছ কমিটীৰ প্রাক্তন সভাপতি তথা সাংসদ ৰাহুল গান্ধী৷ প্রাপ্ত তথ্য অনুসৰি দিল্লীৰ পৰা পোনে পোনে আহি তেওঁ পুৱা প্রায় ৯.৩০ বজাত গুৱাহাটীস্থিত লোকপ্রিয় গোপীনাথ বৰদলৈ আন্তর্জাতিক বিমানবন্দৰত উপস্থিত হ’ব৷ ইয়াৰ পৰা তেওঁ কলাক্ষেত্রত উপস্থিত হ’ব আৰু প্রয়াত কংগ্রেছ নেতাগৰাকীলৈ শেষ শ্রদ্ধা জ্ঞাপন কৰিব৷ শ্রীমন্ত শংকৰদেৱ কলাক্ষেত্রৰ পৰাই তেওঁ পুনৰ বিমানবন্দৰ অভিমুখে ৰাওনা হ’ব৷ ইফালে, কাইলৈ নিখিল ভাৰত কংগ্রেছ কমিটীৰ কেইবাগৰাকীও শীর্ষ নেতা গুৱাহাটীত উপস্থিত হৈ প্রয়াত তৰুণ গগৈলৈ শেষ শ্রদ্ধা জ্ঞাপন কৰিব৷ জানিব পৰা মতে, নিখিল ভাৰত কংগ্রেছ কমিটীৰ সাধাৰণ সম্পাদক (প্রশাসনিক) কে চি বেণুগোপাল, সাধাৰণ সম্পাদক তথা অসমৰ পর্যবেক্ষক জিতেন্দ্র সিঙো কাইলৈ গুৱাহাটীলৈ আহিব৷ দুয়োজন নেতাই কাইলৈ শেষ শ্রদ্ধাঞ্জলি জ্ঞাপন কৰাৰ লগতে গগৈৰ অন্ত্যেষ্টিক্রিয়াতো উপস্থিত থাকিব৷