নিয়মীয়া বাৰ্তা ২৫ জুনঃ স্বজন–তোষণ, দুর্নীতি–নিয়মেৰে অসম লোকসেৱা আয়োগক কলংকিত কৰা কুখ্যাত ৰাকেশ পালৰ বিৰুদ্ধে আৰম্ভ হৈছে বিচাৰ প্রক্রিয়া৷ অসম আৰক্ষীৰ অপৰাধ অনুসন্ধান শাখা (চিআইডি)ত ৰুজু হৈ থকা ২৭/২০১৮ নম্বৰৰ গোচৰত ৰাকেশ পালৰ বিৰুদ্ধে বিচাৰ প্রক্রিয়া আৰম্ভ হৈছে৷ আজি এই গোচৰটোত ধাৰা আৰোপ কৰে বিশেষ ন্যায়াধীশৰ আদালতে৷ চিআইডিৰ এই গোচৰটোত দুর্নীতি প্রতিৰোধ আইনৰ ২/১৩(২) আৰু ভাৰতীয় দণ্ডবিধিৰ ৪২০ ধাৰা আৰোপ কৰিছে৷
অর্থাৎ দুর্নীতি প্রতিৰোধ আইন ২/১৩(২) আৰু ভাৰতীয় দণ্ডবিধি ৪২০ ধাৰাৰ অধীনত ৰাকেশ পালৰ বিৰুদ্ধে আদালতত বিচাৰ প্রক্রিয়া চলিব৷ আৰক্ষীয়ে দাখিল কৰা তথ্য প্রমাণৰ ভিত্তিত বিচাৰ প্রক্রিয়াৰ অন্তত যদিহে উক্ত ধাৰাৰ অধীনত দোষাৰোপ হয়, তেন্তে সেই ধাৰা অনুসৰি শাস্তি লাভ কৰিব বিতর্কিত পালে৷ উল্লেখ্য যে ২০১৮ চনত ধ্রুৱজ্যোতি বৈশ্য নামৰ এজন প্রার্থীৰ পৰা অসম লোকসেৱা আয়োগৰ উপ–আৰক্ষী অধীক্ষক পদত নিযুক্তিৰ বাবে ১০ লাখ টকাৰ উপঢ়ৌকন বিচাৰিছিল৷ এই সন্দর্ভত প্রার্থীজনৰ খুৰাকৰ এজাহাৰৰ ভিত্তি ২৭/২০১৮ নম্বৰৰ গোচৰ ৰুজু কৰিছিল চিআইডিয়ে৷