নিয়মীয়া বাৰ্তা ৩১ ডিচেম্বৰঃ ২০২০ বর্ষত ওদালগুৰি জিলাৰ সংবাদ ক্ষেত্রলৈ আহিল দুটাকৈ ভাল খবৰ৷ ওদালগুৰি জিলাৰ টংলাৰ জ্যেষ্ঠ সাংবাদিক দিগন্ত কুমাৰ শর্মা আৰু কলাইগাঁৱৰ সাংবাদিক মোছাদ্দিক হুছেইনে আঁজুৰি আনিলে দুটাকৈ গুৰুত্বপূর্ণ বঁটা৷ টংলাৰ ২ নং ৱার্ডৰ বাসিন্দা তথা সাংবাদিক দিগন্ত কুমাৰ শর্মাই দুর্নীতিবিৰোধী যুৱশক্তি, অসমৰ দুর্নীতিবিৰোধী শূন্য সহনশীল বিশেষ বঁটা ২০২০ আৰু মোছাদ্দিক হুছেইনে আৰোহণৰ অসম গৌৰৱ বঁটা ২০২০ লাভ কৰে৷ আন্তঃৰাষ্ট্রীয় দুর্নীতিবিৰোধী দিৱস উপলক্ষে যোৱা ৯ ডিচেম্বৰত লখিমপুৰত দুর্নীতিবিৰোধী যুৱশক্তি অসমে দিগন্ত কুমাৰ শর্মাক দুর্নীতিবিৰোধী শূন্য সহনশীল বিশেষ বঁটা ২০২০ প্রদান কৰে৷ একেদৰে আন্তঃৰাষ্ট্রীয় ইউনিচেফ কাউন্সিলৰ অধীনস্থ আৰোহণ নামৰ এক স্বেচ্ছাসেৱী সংগঠনে যোৱা ২৬ ডিচেম্বৰত গুৱাহাটীত সাংবাদিক তথা কলাইগাঁৱৰ বাসিন্দা মোছাদ্দিক হুছেইনক অসম গৌৰৱ বঁটা প্রদান কৰে৷