নিয়মীয়া বাৰ্তা ২৪ জুনঃ বর্ধিত টিকাকৰণ অভিযানৰ অধীনত আজি তৃতীয় দিনাও অব্যাহত আছে ব্যাপক হাৰত ভেকচিন প্রদান প্রক্রিয়া৷ বুধবাৰৰ দিনটোত নিশা ৯ বজা পর্যন্ত ৰাজ্যত মুঠ ৩,৪৬,৬৮০জন লোকক ভেকচিন প্রদান কৰা হৈছে৷ প্রতিদিনে অসমত এই অভিযানৰ অধীনত তিনি লাখকৈ লোকক ভেকচিন প্রদানৰ লক্ষ্য বান্ধি লোৱা হৈছে৷ যোৱা ২১ জুনত প্রথম দিনটোতে নির্ধাৰিত লক্ষ্য অতিক্রম কৰি চৰকাৰে ৩.৭১ লাখজন লোকক ভেকচিন প্রদান কৰিছিল৷ আজিও ৰাইজৰ বিপুল সঁহাৰিত নির্ধাৰিত দৈনিক লক্ষ্য অতিক্রম কৰিবলৈ সক্ষম হৈছে৷ এই তিনিটা দিনৰ ভিতৰত ৰাজ্যখনৰ মুঠ ৯,৬৭,৫৯৫জনক ক’ভিড প্রতিষেধক প্রদান কৰা হৈছে৷ ৰাজ্যৰ ভিন্ন প্রান্তত ৰাইজে ভেকচিন ল’বলৈ ব্যাপক হাৰত ওলাই অহা পৰিলক্ষিত হৈছে৷
বুধবাৰে স্বাস্থ্যমন্ত্রী কেশৱ মহন্তই উজনি অসমৰ কেইবাটাও ভেকচিন কেন্দ্র পৰিদর্শন কৰি এই সমগ্র প্রক্রিয়াৰ বুজ লয়৷ তেওঁ কয়– ‘প্রধানমন্ত্রী নৰেন্দ্র মোদীৰ দূৰদর্শী সিদ্ধান্ত আৰু মুখ্যমন্ত্রী ড০ হিমন্ত বিশ্ব শর্মাৰ বলিষ্ঠ নেতৃত্বত ক’ভিড প্রতিষেধক প্রদানৰ প্রথম তিনিটা দিনতেই আশাব্যঞ্জক সফলতা লাভ কৰিবলৈ সক্ষম হৈছোঁ৷ প্রথম তিনিটা দিন আমাৰ বাবে বিশেষ গুৰুত্বপূর্ণ আছিল৷ ৰাইজে তিনিওটা দিনতে পূর্ণ সঁহাৰি প্রদান কৰিছে৷ অহা ১৫ আগষ্টৰ ভিতৰত ৰাজ্যৰ ১৮ বছৰৰ ঊর্ধ্বৰ প্রতিগৰাকী লোককে ক’ভিড প্রতিষেধক প্রদানৰ লক্ষ্যত উপনীত হ’বলৈ সক্ষম হ’ম বুলি আমি আশাবাদী৷’
ইফালে, ৰাজ্যত সম্প্রতি পর্যাপ্ত ভেকচিন মজুত আছে বুলি সদৰী কৰিছে স্বাস্থ্যমন্ত্রী মহন্তই৷ কেন্দ্রীয় চৰকাৰৰ পৰা অসমে আজি নতুনকৈ ১,৬৬,০৬০ পালি ভেকচিন লাভ কৰিছে৷ ৰাষ্ট্রীয় স্বাস্থ্য অভিযানে এই ভেকচিনসমূহ সংশ্লিষ্ট জিলাসমূহলৈ প্রেৰণ কৰিছে৷
আনহাতে, বুধবাৰৰ দিনটোত ৰাজ্যত পুনৰ ২,৭২৮জন লোক ক’ভিডত আক্রান্ত হৈছে৷ আক্রান্তসকলৰ ভিতৰত ২১২জন গোলাঘাট জিলাৰ৷ তদুপৰি কামৰূপ (মহানগৰ) জিলাৰ ১৮৭জন, শোণিতপুৰ জিলাৰ ১৭৭জন আৰু নগাঁৱৰ ১৭১জন লোক ক’ভিডত আক্রান্ত হৈছে৷ বিগত ২৪ ঘণ্টাত মুঠ ১,৬৬,২২৭টা নমুনাৰ পৰীক্ষা সম্পন্ন কৰা হৈছে৷ ক’ভিড সংক্রমণ ১.৬৪ শতাংশলৈ হ্রাস পাইছে৷ আজি সুস্থ হোৱা ৰোগীৰ সংখ্যা হৈছে ৩,৮০২জন৷ সম্প্রতি চিকিৎসাধীন হৈ আছে ৩০,৫২৪জন৷ আজি ক’ভিডত মৃত্যু হৈছে ৩০জন লোকৰ৷ মৃত্যু হোৱা লোকসকলৰ সর্বাধিক ৬জন শোণিতপুৰ জিলাৰ৷
দেশত আক্রান্তৰ সংখ্যা তিনি কোটি অতিক্রম
যোৱা ২৪ ঘণ্টাত আক্রান্তৰ সংখ্যা পুনৰ বৃদ্ধি, আক্রান্ত ৫০,৮৪৮, মৃত্যু ১,৩৫৮
ক’ভিড–১৯ৰ দ্বিতীয় জোৱাৰৰ সংক্রমণৰ তীব্রতা হ্রাস পালেও দেশজুৰি আক্রান্তৰ সংখ্যাই ৩ কোটি অতিক্রম কৰিলে৷ আক্রান্তৰ সংখ্যাই ৩ কোটি অতিক্রম কৰা বিশ্বৰ দ্বিতীয় দেশ ভাৰত৷ ইয়াৰ পূর্বে আমেৰিকা যুক্তৰাষ্ট্রত আক্রান্তৰ সংখ্যাই ৩ কোটি অতিক্রম কৰিছিল৷ মঙলবাৰে পুৱা ৬ বজাত প্রকাশিত স্বাস্থ্য মন্ত্রালয়ৰ তথ্য অনুসৰি ৯০ দিনৰ মূৰকত এদিনত আক্রান্তৰ সংখ্যাই ৫০ হাজাৰৰ তললৈ নিম্নগামী হৈছিল যদিও যোৱা ২৪ ঘণ্টাত পুনৰ আক্রান্তৰ সংখ্যা ৫০ হাজাৰ অতিক্রম কৰিলে৷ ২৪ ঘণ্টাত আক্রান্ত হৈছে ৫০,৮৪৮জন৷ ইয়াকে লৈ দেশত আক্রান্তৰ সংখ্যা ৩,০০,২৮,৭০৯লৈ বৃদ্ধি পালে৷ ইপিনে, যোৱা ২৪ ঘণ্টাত ১,৩৫৮জন লোকৰ মৃত্যু ঘটাত মুঠ মৃতকৰ সংখ্যা ৩,৯০,৬৬০লৈ বৃদ্ধি পাইছে৷ আনহাতে, আক্রান্ততকৈ সুস্থ হোৱা লোকৰ সংখ্যা বিগত ৩৮ দিন ধৰি অধিক হৈ আছে৷ সম্প্রতি দেশত সক্রিয় ক’ভিড ৰোগীৰ সংখ্যা ৬,৪৩,১৯৪জন৷ ই হৈছে দেশৰ মুঠ আক্রান্তৰ ২.১৪ শতাংশ৷ আনপিনে, সুস্থতাৰ হাৰ ৯৬.৫৬ শতাংশলৈ বৃদ্ধি পাইছে৷ আই চি এম আৰৰ তথ্য অনুসৰি যোৱা ২৪ ঘণ্টাত ১৯ লক্ষাধিক লোকক ক’ভিড পৰীক্ষণ কৰাত দেশত পৰীক্ষণৰ সংখ্যা ৩৯,৫৯,৭৩,১৯৮লৈ বৃদ্ধি পাইছে৷ মন কৰিবলগীয়া যে নতুন ক’ভিড নীতি অনুসৰি ২১ জুনত বিশ্বাভিলেখ গঢ়ি ৮৮ লক্ষাধিক লোকক ক’ভিড ভেকচিন প্রদান কৰাৰ পাছত একেৰাহে ৩ দিন ধৰি ৫০ লক্ষাধিক লোকক ভেকচিন প্রদান কৰি থকা হৈছে৷ দেশজুৰি ভেকচিন প্রদান কৰা লোকৰ সংখ্যা ২৯ কোটিৰ অধিক হৈছে৷
উল্লেখ্য যে ক’ভিড–১৯ৰ দ্বিতীয় জোৱাৰত সংক্রমণৰ হাৰ হ্রাস পোৱাৰ সময়তে দেশত তৃতীয় জোৱাৰৰ সংক্রমণৰ ইংগিত লাভ কৰিছে৷ কেন্দ্রীয় স্বাস্থ্য মন্ত্রালয়ে প্রকাশ কৰা মতে, মহাৰাষ্ট্র, কেৰালা আৰু মধ্যপ্রদেশত ডেল্টা প্লাছ প্রকৰণত আক্রান্ত ৰোগী চিনাক্ত হৈছে৷ ক’ভিড–১৯ৰ উদ্বিগ্ণ প্রকৰণ বুলি আখ্যা দিয়া এই ডেল্টা প্লাছত মহাৰাষ্ট্রত ২১জন লোক, কেৰালাত চাৰি বছৰীয়া শিশু এজন আৰু মধ্যপ্রদেশৰ ভূপাল আৰু শিৱপুৰীত আক্রান্ত লোক ধৰা পৰিছে৷ স্বাস্থ্য মন্ত্রালয়ৰ বিবৃতি অনুসৰি দেশত ৪৫ হাজাৰ নমুনা সংগ্রহ কৰা হৈছে৷ ডেল্টা প্লাছ প্রকৰণ এ ৱাই.১ মহাৰাষ্ট্র, কেৰালা, মধ্যপ্রদেশত ধৰা পৰিছে৷ অৱশ্যে এই প্রকৰণৰ অধিক মাত্রাত সংক্রমণ বৃদ্ধি হোৱা পৰিলক্ষিত হোৱা নাই৷ তাৎপর্যপূর্ণ যে ডেল্টাষ্ট্রেইন অথবা বি.১.৬১৭.২ প্রকৰণ ভাৰতত প্রথম চিনাক্ত হৈছে৷ আন এক তথ্য মতে মহাৰাষ্ট্রত ২১, মধ্যপ্রদেশত ৬, কেৰালাত ৩, তামিলনাডুত ৩, কর্ণাটকত ২, পঞ্জাব, অন্ধ্রপ্রদেশ আৰু জম্মুত এজনকৈ ডেল্টা প্লাছত আক্রান্ত ৰোগী ধৰা পৰিছে৷ ইতিমধ্যে কেন্দ্রীয় স্বাস্থ্য মন্ত্রালয়ে উল্লিখিত ৰাজ্যসমূহক এই নতুন প্রকৰণ ডেল্টা প্লাছ সন্দর্ভত অধিক সজাগ হ’বলৈ নির্দেশ দিছে৷ ভাৰতত প্রার্দুভাৱ ঘটা ডেল্টা প্লাছৰ সংক্রমণ কিছু পৰিমাণে ৯ দেশ বিশেষকৈ আমেৰিকা, ব্রিটেইন, পর্তুগাল, ছুইজাৰলেণ্ড, জাপান, পোলেণ্ড, ৰাছিয়া আৰু চীনত ধৰা পৰিছে৷ চৰকাৰী সূত্রই প্রকাশ কৰা মতে ডেল্টা প্লাছ দ্রুতগতিত প্রসাৰিত হ’ব পাৰে৷ ই বিশ্বৰ ৮০ দেশলৈ সম্প্রসাৰিত হোৱাৰ সম্ভাৱনা আছে৷