নিয়মীয়া বাৰ্তা ৩০ নৱেম্বৰঃ অসম লোকসেৱা আয়োগৰ (এ পি এছ চি) পৰা অসমীয়া ভাষাৰ প্রশ্ণকাকত প্রত্যাহাৰ কৰাক লৈ সৃষ্টি হোৱা বিতর্কৰ মাজতে সমগ্র বিষয়টো স্পষ্ট হৈ পৰিব উচ্চ ন্যায়ালয়ৰ মজিয়াত৷ অহা ১ ডিচেম্বৰত অনুষ্ঠিত হ’বলগীয়া শুনানিত ৰাজ্য চৰকাৰৰ স্থিতি মহাধিবক্তাই সদৰী কৰিব৷ ইয়াৰ লগে লগে এই বিষয়টোত উচ্চ ন্যায়ালয়ে কি নির্দেশ দিয়ে, সেয়া হ’ব লক্ষণীয়৷ বিশেষকৈ বঙাইগাঁৱত অনুষ্ঠিত কেবিনেটত এ পি এছ চিক লৈ লোৱা সিদ্ধান্তৰ পাছত সৃষ্টি হোৱা পৰিৱর্তিত পৰিস্থিতিত গুৱাহাটী উচ্চ ন্যায়ালয়ত ৰাজ্য চৰকাৰৰ স্থিতি হ’ব আটাইতকৈ গুৰুত্বপূর্ণ৷ তদুপৰি চলিত বর্ষৰ পৰীক্ষাত ৰাজ্য চৰকাৰৰ নতুন সিদ্ধান্ত কার্যকৰী হ’ব নে নহয়, সেয়াও গুৱাহাটী উচ্চ ন্যায়ালয়ৰ নির্দেশনাতহে স্পষ্ট হোৱাৰ সম্ভাৱনা আছে৷ উল্লেখ্য যে অসম লোকসেৱা আয়োগৰ পৰীক্ষাত ভাষাৰ প্রশ্ণকাকতক লৈ কেতবোৰ সংশোধনী ইতিমধ্যে কৰা হৈছে৷ অসম অসামৰিক সেৱাৰ সংযুক্ত প্রতিযোগিতামূলক পৰীক্ষাৰ বিধি সংশোধন কৰি কেন্দ্রীয় লোকসেৱা আয়োগৰ আর্হিত পৰীক্ষা অনুষ্ঠিত কৰাৰ সিদ্ধান্ত গ্রহণ কৰা হৈছে৷
পাঠ্যক্রমকে ধৰি বিভিন্ন নীতি–নিয়ম কেন্দ্রীয় লোকসেৱা আয়োগৰ আর্হিত প্রস্তুত কৰিছিল অসম লোকসেৱা আয়োগেও৷ ইয়াৰ ভিত্তিত ৩০০ নম্বৰৰ এখন অসমীয়া অথবা বড়ো অথবা বাংলা ভাষাৰ কোৱালিফায়িং প্রশ্ণকাকত সন্নিৱিষ্ট কৰা হৈছিল৷ এই তিনিটা ভাষা বিদ্যালয়ত অধ্যয়ন নকৰা, কার্বি আংলং, পশ্চিম কার্বি আংলং আৰু ডিমা হাছাওৰ প্রার্থীসকলক ৰেহাই দিয়া হৈছিল এই প্রশ্ণকাকতৰ পৰা৷ বিগত বর্ষত তদানীন্তন চৰকাৰে আন এক কেবিনেট সিদ্ধান্তৰ জৰিয়তে কাছাৰ, কৰিমগঞ্জ আৰু হাইলাকান্দিৰ পৰীক্ষার্থীসকলৰ বাবেও এটা বিশেষ নীতি গ্রহণ কৰে৷ সেই অনুসৰি উক্ত তিনিখন জিলাৰ যিসকল প্রার্থীয়ে দশম শ্রেণী পর্যন্ত বাংলা, বড়ো অথবা অসমীয়া অধ্যয়ন কৰা নাই, সেইসকল প্রার্থীকো এই ভাষাৰ প্রশ্ণকাকতত অৱতীর্ণ হোৱাৰ পৰা ৰেহাই দিয়া হয়৷ ৰাজ্য চৰকাৰে লোৱা এই সিদ্ধান্তক প্রত্যাহ্বান জনাই গুৱাহাটী উচ্চ ন্যায়ালয়ত চাৰিটাকৈ গোচৰ ৰুজু হয়৷
এই গোচৰসমূহৰ জৰিয়তে ভাষাৰ প্রশ্ণকাকত সকলো পৰীক্ষার্থীৰ বাবে বাধ্যতামূলক কৰা অথবা সকলো প্রার্থীকে ৰেহাই দিয়াৰ ব্যৱস্থা কৰিবলৈ নির্দেশ দিবলৈ উচ্চ ন্যায়ালয়ক প্রার্থনা জনায়৷ ইতিমধ্যে এই গোচৰসমূহৰ কেইবাটাও শুনানি অনুষ্ঠিত হৈ গৈছে৷ আজি এই গোচৰসমূহ পুনৰ শুনানিৰ বাবে তালিকাভুক্ত হৈ আহিছিল যদিও অহা ১ ডিচেম্বৰতহে ৰাজ্য চৰকাৰৰ হৈ মহাধিবক্তাই সমগ্র বিষয়টো সন্দর্ভত স্থিতি স্পষ্ট কৰাৰ সিদ্ধান্ত লয়৷ লক্ষণীয়ভাৱে ইয়াৰ পূর্বে অসম লোকসেৱা আয়োগে ভাষাৰ প্রশ্ণকাকতৰ প্রয়োজনীয়তা আছে বুলি মত পোষণ কৰিছিল৷ তদুপৰি অসম লোকসেৱা আয়োগৰ পৰীক্ষা বিধিসমূহ ৰাজ্য চৰকাৰেহে প্রস্তুত কৰি আহিছে৷ লোকসেৱা আয়োগে কেৱল ৰাজ্য চৰকাৰে ধার্য কৰা নিয়মাৱলী কার্যকৰী কৰি আহিছে৷ এনে পৰিস্থিতিত ১ ডিচেম্বৰৰ শুনানি অসম লোকসেৱা আয়োগৰ প্রার্থীসকলৰ বাবে অত্যন্ত গুৰুত্বপূর্ণ হিচাপে বিবেচিত হৈছে৷