কানাডা স্ক্ৰীন এৱাৰ্ডছত অসমীয়া চুটি ছবি “চিনেমেটিক লাভ”ৰ সাফল্য। কানাডাৰ চলচ্চিত্ৰ আৰু টেলিভিছনৰ সৈতে জড়িত ভাৰতীয় সমাজে আয়োজন কৰা এই প্ৰতিযোগিতাৰ আন্তৰ্জাতিক চুটি ছবি শাখাত তৰুণ চলচ্চিত্ৰ নিৰ্মাতা ফাৰদিন ইৰফানে নিৰ্মাণ কৰা ছবিখনে দুটা শিতানত পুৰস্কাৰ লাভ কৰে।

তন্ময়ী বৰা শ্ৰেষ্ঠ অভিনেত্ৰী নিৰ্বাচিত হোৱাৰ লগতে ফাৰদিন ইৰফানে লাভ কৰে শ্ৰেষ্ঠ সংগীতৰ পুৰস্কাৰ।

প্ৰতিযোগিতাখনত বিশ্বৰ কেবাখনো দেশৰ চুটি ছবিয়ে অংশগ্ৰহণ কৰিছিল। চলচ্চিত্ৰ নিৰ্মাণকে পেছা হিচাপে লব বিচৰা এজন ২৫ বছৰীয়া যুৱকে সন্মুখীন হোৱা বিভিন্ন প্ৰত্যাহ্বানেই ছবিখনৰ মূল বিষয়বস্তু।

নাটকীয়তা, আবেগ, হাস্যৰস আৰু একছন সমৃদ্ধ তিনি মিনিট দৈৰ্ঘৰ ছবিখনৰ কাহিনী, পৰিচালনা, সম্পাদনা আৰু সংগীত ফাৰদিন ইৰফানৰ। ডিৰেক্টৰ অব ফটোগ্ৰাফী শোণিত ৰয়।

অভিনয় কৰিছে ইফটিকাৰ হুছেইন, ফাৰদিন ইৰফান, তন্ময়ী বৰা, কৃষ মজুমদাৰ আৰু ছঈফ চেলিম। পৰিচালনাৰ লগতে বিভিন্ন কাৰিকৰী দিশত সহযোগী হিচাপে আছে কামৰাণ হুছেইন, ছঈফ চেলিম, এনিশা মজুমদাৰ, অনুৰাধা ঈপ্সিতা হাজৰিকা, কৃষ মজুমদাৰ আৰু মুজতাহিদ হুছেইন।

ডিজিটেল ডেস্ক, ১১ জুন

The post কানাডাত চুটি ছবি ‘চিনেমেটিক লাভ’ৰ সাফল্য first appeared on নিয়মীয়া বাৰ্তা.

বিশ্ব ফুটবলৰ মহাৰণ ফিফা বিশ্বকাপৰ বাবে সাজু হৈছে বিশ্বৰ কোটি কোটে অনুৰাগী৷ আজিৰে পৰা আমেৰিকা–মেক্সিকো আৰু কানাডাত অনুষ্ঠিত হ’ব ফিফা বিশ্বকাপ ফুটবল৷ প্রতিযোগিতাখনৰ উদ্বোধনী মেচখন মেক্সিকোত আয়োজক মেক্সিকো আৰু দক্ষিণ আফ্রিকাৰ মাজত অনুষ্ঠিত হ’ব৷

ফুটবলৰ মহাৰণখনৰ পূর্বে মেক্সিকোৰ ৰাষ্ট্রপতি ক্লাউডিয়া শ্বেইনবামে মঙলবাৰে নির্দেশনা জাৰি কৰি মেক্সিকো চহৰৰ ফেডাৰেল কর্মচাৰীসকলক ১১ জুনত ঘৰৰ পৰা কাম কৰিবলৈ নির্দেশ দিয়ে৷

লগতে ফিফা বিশ্বকাপৰ উদ্বোধনী খেলৰ সময়ত যান–জঁটৰ ফলত সৃষ্টি হ’ব পৰা সম্ভাব্য সমস্যাসমূহৰ সমাধানৰ বাবে ১১ জুনত শিক্ষানুষ্ঠানসমূহত পাঠদান বন্ধ কৰা হৈছে৷ এই নির্দেশনাৰ লক্ষ্য হৈছে যান–বাহন চলাচল আৰু পথ সুৰক্ষা উন্নত কৰাৰ লগতে মেক্সিকোৱে প্রতিযোগিতাখনৰ উদ্বোধনী খেলখন সুশৃংখলিতভাৱে আয়োজন কৰাটো নিশ্চিত কৰা৷

ৰাষ্ট্রপতিয়ে জাৰি কৰা নির্দেশনা অনুসৰি, ফেডাৰেল সংস্থাসমূহে মেক্সিকো চহৰক ভিত্তি কৰি থকা কর্মচাৰীসকলৰ বাবে দূৰৱর্তী কামৰ ব্যৱস্থা ৰূপায়ণ কৰিব লাগিব৷ অৱশ্যে স্বাস্থ্যসেৱা, নিৰাপত্তা, জটিল আন্তঃগাঁথনি আৰু ফিফা বিশ্বকাপৰ পৰিচালনাকে ধৰি অত্যাৱশ্যকীয় সেৱাৰ সৈতে জড়িত কর্মচাৰীৰ ক্ষেত্রত এই আদেশ প্রযোজ্য নহয়৷

৩৯ দিন ধৰি চলিবলগীয়া এই ফুটবল মহাৰণত অনুৰাগীসকলে নিজ নিজ পছন্দৰ খেলুৱৈৰ খেল উপভোগ কৰিবলৈ সাজু হৈছে৷ মেছি–ৰ’নাল্ডোৰ মেজিক, এমবাপেৰ ধুমুহা, নেইমাৰৰ ড্রিবলিং চাবলৈ অধীৰ আগ্রহেৰে বাট চাই আছে বিশ্বৰ সহস্রাধিক ফুটবল অনুৰাগী৷

ইফালে, এইবাৰৰ বিশ্বকাপত সকলোৰে দৃষ্টি নিবদ্ধ থাকিব লামিন য়ামালৰ ওপৰত৷ আজিৰ পৰা আৰম্ভ হ’বলগীয়া ফিফা বিশ্বকাপত য়ামালক লৈ বিশ্ব জয়ৰ স্বপ্ন দেখিছে স্পেইনে৷

এই নির্দেশনাত চৰকাৰী আৰু ব্যক্তিগত বিদ্যালয়কে ধৰি প্রাথমিক বিদ্যালয়ৰ পৰা বিশ্ববিদ্যালয় পর্যায়লৈকে সকলো শিক্ষানুষ্ঠানতে পাঠদান স্থগিত ৰখা হৈছে৷ ব্যক্তিগত কোম্পানীকো চৰকাৰে তেওঁলোকৰ কর্মচাৰীসকলক দূৰৱর্তী কামৰ সুবিধা প্রদান কৰিবলৈ নির্দেশ দিছে৷

ডিজিটেল ডেস্ক, ১১ জুন

The post কাৰ দখললৈ বিশ্বকাপৰ মুকুট… মেছি-নেইমাৰ-ৰ’নাল্ডো-য়ামাল-এমবাপেৰ খেল চাবলৈ উদ্বাউল অনুৰাগী first appeared on নিয়মীয়া বাৰ্তা.

ভাৰতৰ কনচার্ট ইক’নমিৰ নতুন অভিকেন্দ্র হিচাপে পৰিচিত হোৱাৰ দিশে আগবাঢ়িছে অসম৷ গুৱাহাটীৰ খানাপাৰাত প’ষ্ট মেলনৰ অনুষ্ঠানৰ পিছত ৰাজ্যৰ পর্যটন খণ্ডৰ লগতে বিভিন্ন খণ্ডত ইতিবাচক প্রভাৱ পৰিছে আৰু আগন্তুক ৫ বছৰত ৭০০ কোটি টকাৰ অর্থনৈতিক সম্ভাৱনাৰ পূর্বানুমান কৰা হৈছে৷

অসম পর্যটন উন্নয়ন নিগম, বুকমাইশ্ব’ আৰু ই ৱাই–পার্থেননৰ প্রতিবেদনত প্রকাশ পাইছে এই তথ্য৷ গুৱাহাটীত সংবাদ মেলযোগে প’ষ্ট মেলনৰ ঐতিহাসিক কনচার্টৰ সফলতাৰ প্রেক্ষাপটত অসম পর্যটন ডন্নয়ন নিগম লিমিটেড (এটিডিচি)–ৰ পৰিচালন সঞ্চালক কুমাৰ পদ্মপাণি বৰাই অসমত আগন্তুক ৫বছৰত ৭০০ কোটি টকাৰ অর্থনৈতিক সম্ভাৱনাৰ কথ প্রকাশ কৰাৰ লগতে কনচার্ট টুৰিজিমৰ অংশ ৰূপে অসমত গুৱাহাটীৰ লগতে যোৰহাট আৰু ডিব্রুগডতো এবছৰত ৩টাকৈ কনচার্ট অনুষ্ঠিত হ’ব বুলি সদৰী কৰে৷

অসম পর্যটন উন্নয়ন নিগম লিমিটেড (এটিডিচি)ৰ পৰিচালন সঞ্চালকগৰাকীয়ে ইণ্টাৰনেচনেল কনচার্ট এৰিনা গুৱাহাটীত নির্মাণ হ’ব বুলিও সংবাদ মাধ্যমৰ আগত প্রকাশ কৰে৷

উল্লেখ্য যে লাইভ মনোৰঞ্জন আৰু সাংস্কৃতিক অভিজ্ঞতাৰ ক্ষেত্রত ভাৰতৰ অন্যতম শীর্ষ প্লেটফর্ম বুকমাইশ্ব’ই অসম পর্যটন উন্নয়ন নিগম লিমিটেড (এটিডিচি) আৰু ইৱাই–পার্থেননৰ সহযোগত প্রকাশ কৰিছে ‘দ্য আছাম ব্লু–প্রিণ্টঃ টার্নিং লাইভ মিউজিক ইক’নমি ইনটু এ ট্যুৰিজিম মাল্টিপ্লায়াৰ’ শীর্ষক এক প্রতিবেদন৷

গুৱাহাটীত প’ষ্ট মেলনৰ প্রথম একক ভাৰত ভ্রমণৰ কনচার্টৰ প্রেক্ষাপটত প্রস্তুত কৰা এই প্রতিবেদনত অসমৰ লাইভ মনোৰঞ্জন খণ্ডৰ অর্থনৈতিক, পর্যটন, কর্মসংস্থাপন আৰু সাংস্কৃতিক প্রভাৱ সবিশেষ পর্যালোচনা কৰা হৈছে৷ বুকমাইশ্ব’, এটিডিচি আৰু ইৱাই–পার্থেননৰ এই প্রতিবেদনত অসমক এক গুৰুত্বপূর্ণ উদাহৰণ হিচাপে দাঙি ধৰা হৈছে, য’ত সুপৰিকল্পিত পৰিৱেশতন্ত্র গঢ়ি তোলা, পর্যটন আন্তঃগাঁথনিৰ বিকাশ আৰু দীর্ঘম্যাদী বিনিয়োগৰ জৰিয়তে লাহভ মনোৰঞ্জনক কেৱল এটা সাংস্কৃতিক আয়োজনৰ গণ্ডীত সীমাবদ্ধ নাৰাখি ধাৰাবাহিক অর্থনৈতিক প্রগতিৰ শক্তিশালী চালিকাশক্তিলৈ ৰূপান্তৰ কৰা সম্ভৱ৷

সুপৰিকল্পিতভাৱে বৃহৎ পৰিসৰৰ লাইভ মনোৰঞ্জনমূলক অনুষ্ঠানৰ এটা ধাৰাবাহিক আয়োজন গঢ়ি তুলিব পৰা গ’লে অহা পাঁচ বছৰত অসমত ৭০০ কোটিতকৈও অধিক টকাৰ সামগ্রিক অর্থনৈতিক প্রভাৱ সৃষ্টি হ’ব পাৰে বুলি প্রতিবেদনত অনুমান কৰা হৈছে৷ ২০২৫ চনৰ ডিচেম্বৰত অনুষ্ঠিত প’ষ্ট মেলনৰ কনচার্টক এটা ক্ষেত্র অধ্যয়ন হিচাপে দাঙি ধৰি বুকমাইশ্ব’, এটিডিচি আৰু ইৱাই–পার্থেননৰ প্রতিবেদনত প্রকাশ কৰা হৈছে যে এই অনুষ্ঠানে সর্বমুঠ ৪৩ কোটি টকাৰ অর্থনৈতিক প্রভাৱ সৃষ্টি কৰিছে৷

ইয়াৰ ভিতৰত দর্শকৰ ব্যয়ৰ জৰিয়তে পোনপটীয়াকৈ ৩২ কোটি টকা অসমৰ অর্থনীতিত যুক্ত হৈছে, লগতে জিএছটি বাবদ আন প্রায় ৫ কোটি টকাৰ ৰাজহ আদায় হৈছে৷ সেই সময়ছোৱাত বিমান সেৱাত গুৰুতৰ পৰিচালনাগত ব্যাঘাত থকাৰ পাছতো কনচার্টত প্রায় ২০ হাজাৰ দর্শক উপস্থিত থাকে৷

লক্ষণীয়ভাৱে, এই কনচার্টত উপস্থিত থকা ৫৩ শতাংশ দর্শকৰেই আছিল গুৱাহাটীৰ বাহিৰৰ পৰা অহা৷ ভাৰতৰ ২০০তকৈও অধিক চহৰ তথা জনপদৰ দর্শকে গুৱাহাটীত উপভোগ কৰিছিল প’ষ্ট মেলনৰ কনচার্ট৷ বুকমাইশ্ব’, এটিডিচি আৰু ইৱাই–পার্থেননৰ প্রতিবেদনত প্রকাশ পোৱা অনুসৰি, প’ষ্ট মেলনৰ কনচার্টক কেন্দ্র কৰি পর্যটন, আতিথ্য, পৰিবহণ, খুচুৰা বাণিজ্য আৰু স্থানীয় ব্যৱসায়ত উল্লেখনীয় অর্থনৈতিক প্রভাৱ পৰে৷

প্রতিবেদন অনুযায়ী, কনচার্টৰ টিকটত প্রতি ১০০ টকা ব্যয়ৰ বিপৰীতে দর্শকে বাসস্থান, যাতায়াত, খাদ্য, বজাৰ কৰা আৰু স্থানীয় বিভিন্ন সেৱাত অতিৰিক্ত ৮৯৯ টকা ব্যয় কৰে৷ কনচার্ট অনুষ্ঠিত হোৱা সপ্তাহান্তত গুৱাহাটীৰ হোটেলসমূহত কোঠা দখলৰ হাৰ প্রায় ৩০ শতাংশ বৃদ্ধি পায়৷

একে সময়তে স্থানীয় পৰিবহণ সেৱাৰ চাহিদা ৫০ শতাংশতকৈও অধিক বাঢ়ি যায়৷ ৰেষ্টুৰেণ্ট আৰু কেফেসমূহত অহা গ্রাহকৰ সংখ্যা ৩৩ শতাংশতকৈও অধিক বৃদ্ধি পোৱাৰ বিপৰীতে খুচুৰা ব্যৱসায়িক প্রতিষ্ঠানসমূহত ক্রেতাৰ উপস্থিতি ৩০ শতাংশতকৈও অধিক হয়৷

কনচার্টকে কেন্দ্র কৰি আঞ্চলিক পর্যটনতো ইতিবাচক প্রভাৱ পৰে৷ অনুষ্ঠানত অংশ ল’বলৈ অহা দর্শকে কাজিৰঙা ৰাষ্ট্রীয় উদ্যান, মাজুলী দ্বীপ, কামাখ্যা মন্দিৰ আৰু শিৱসাগৰৰ দৰে পর্যটনস্থলীসমূহো ভ্রমণ কৰে৷

ইয়াৰ ফলত উত্তৰ–পূর্বাঞ্চলৰ প্রৱেশদ্বাৰ হিচাপে গুৱাহাটীৰ গুৰুত্ব আৰু অধিক শক্তিশালীভাৱে প্রতিফলিত হৈছে৷ বুকমাইশ্ব’, এটিডিচি আৰু ইৱাই–পার্থেননৰ প্রতিবেদনে ভাৰতৰ লাইভ মনোৰঞ্জন উদ্যোগত উত্তৰ–পূর্বাঞ্চলৰ ক্রমবর্ধমান গুৰুত্বকো সমুখলৈ আনিছে৷

২০২৫ চনত গুৱাহাটীত লাইভ অনুষ্ঠানত দর্শকৰ উপস্থিতি ১৮৮ শতাংশ বৃদ্ধি পায় আৰু সেই বর্ষত চহৰখনত ৫৫টা টিকটভিত্তিক লাইভ অনুষ্ঠানৰ আয়োজন হয়৷ পার্শ্বৱর্তী শ্বিলঙৰ সৈতে মিলি গুৱাহাটী লাহে লাহে বৃহৎ পৰিসৰৰ লাহভ মনোৰঞ্জনমূলক আয়োজনৰ এটা গুৰুত্বপূর্ণ গন্তব্যস্থল হিচাপে প্রতিষ্ঠিত হৈছে৷

প্রতিবেদনৰ মতে, এই পৰিৱর্তন কেৱল উত্তৰ–পূর্বাঞ্চলতে সীমাবদ্ধ নহয়, ই সমগ্র দেশতে গঢ়ি উঠা এটা বৃহৎ ধাৰাৰো প্রতিফলন৷ বুকমাইশ্ব’ৰ মতে, সম্প্রসাৰিত আন্তঃগাঁথনি, ক্রমবর্ধমান প্রডাকচন সক্ষমতা আৰু এটা বহনক্ষম পৰিৱেশতন্ত্রৰ সহায়ত এই খণ্ডই ৰাজ্যখনত ৭০০ কোটিতকৈও অধিক টকাৰ সামগ্রিক অর্থনৈতিক প্রভাৱ সৃষ্টি কৰিবলৈ সক্ষম হ’ব৷

স্মৰ্তব্য যে গুৱাহাটীত প’ষ্ট মেলনৰ ঐতিহাসিক প্রদর্শনীৰ পাছত এইবাৰ অহা ১৭ নৱেম্বৰত অসমলৈ আগমন ঘটিব কিংবদন্তি ৰক বেণ্ড ‘গানছ এন ৰ’জেছ’ৰ, যিয়ে আন্তঃৰাষ্ট্রীয় কনচার্ট আয়োজনৰ মানচিত্রত ৰাজ্যখনৰ ক্রমবর্ধমান গুৰুত্বক আৰু অধিক শক্তিশালী কৰিব৷

ভাৰতৰ অভিজ্ঞতাভিত্তিক অর্থনীতি যেতিয়া পৰম্পৰাগত মহানগৰসমূহৰ পৰিসৰ অতিক্রমি অধিক বিস্তৃত হৈ পৰিছে, তেতিয়া অসমৰ এই যাত্রাই দেখুৱাই দিছে যে লাইভ মনোৰঞ্জনে পর্যটন, কর্মসংস্থাপন আৰু অর্থনৈতিক প্রগতিক কেনেকৈ ক্ষিপ্রতৰ কৰিব পাৰে৷ ইয়াৰ সমান্তৰালভাৱে, ই দেশৰ অন্যান্য উদীয়মান গন্তব্যস্থানসমূহৰ বাবেও এক কার্যকৰী আর্হি হৈ পৰিছে৷

ডিজিটেল ডেস্ক, ১১ জুন

The post কনচার্ট ইক’নমি : ৫ বছৰত অসমত হ’ব ৭০০ কোটিৰ কনচার্ট অর্থনীতি first appeared on নিয়মীয়া বাৰ্তা.

ডিজিটেল ডেস্ক, যোৰহাট, ৩০ মে’ : আশীৰ দশকত নিপ বৰুৱা পৰিচালিত ককাদেউতা, নাতি আৰু হাতী ছবিখনে চহা অসমীয়া গ্রাম্য জীৱনৰ নিভাঁজ প্রতিচ্ছবি তুলি ধৰি বিপুল সমাদৃত হৈছিল৷ এন চি প্রডাকচনৰ বেনাৰত এন চি দত্তৰ প্রযোজনাত নির্মিত ছবিখনত শিশু চৰিত্রত অভিনয় কৰিছিল বর্তমানৰ অসমৰ মুখ্যমন্ত্রী ড০ হিমন্ত বিশ্ব শর্মাই৷ ১৯৮৩ চনৰ ১৮ নৱেম্বৰত মুক্তি পোৱা ছবিখন চোৱাৰ স্মৃতি আজিও অসমীয়াৰ হূদয়ৰ মণিকোঠত সজীৱ হৈ আছে৷ ছবিখনৰ মৌজাদাৰ সর্বেশ্বৰ শইকীয়াৰ নাতিয়েকৰ চৰিত্রত অভিনয় কৰিছিল সেই সময়ত শিশু হিমন্ত বিশ্ব শর্মাই৷ সেই ছবিখনৰ মুক্তিৰ চাৰি দশকৰ পিছত নতুন ৰূপত দর্শকৰ সন্মুখলৈ আহিছে ককাদেউতা, নাতি আৰু হাতী–২ ৷

প্রাইড ইষ্ট এণ্টাৰটেইনমেণ্ট প্রাইভেট লিমিটেডৰ বেনাৰত, প্রাইড ইষ্ট এণ্টাৰটেইনমেণ্ট প্রাইভেট লিমিটেডৰ অধ্যক্ষ তথা পৰিচালন সঞ্চালক ৰিণিকি ভূঞা শর্মাৰ প্রযোজনাত নির্মাণ হোৱা ছবিখন অহা ৩ জুলাইত মুক্তি লাভ কৰিব৷ শুকুৰবাৰে সন্ধিয়া যোৰহাটৰ ঐতিহ্যমণ্ডিত যোৰহাট থিয়েটাৰৰ প্রেক্ষাগৃহত ছবিখনৰ দুটি গীত মুকলি কৰা হয়৷ এই মর্মে অনুষ্ঠিত গাম্ভীর্যপূর্ণ অনুষ্ঠানত ‘নিউজ লাইভ’ৰ মুখ্য পৰিচালন সম্পাদক জাৰিৰ হুছেইনে আদৰণী ভাষণত ৰাইজক ছবিখন সন্দর্ভত অৱগত কৰাৰ লগতে এইক্ষেত্রত ৰাইজৰ সহযোগিতা কামনা কৰে৷

ছবিখনৰ পৰিচালক বিশ্বজিৎ বৰাই কয় যে মোৰ খুব ভাল লাগিছে আৰু ভয় লাগিছে৷ কিয়নো এক দীর্ঘদিনীয়া প্রচেষ্টাৰ অন্তত ইতিমধ্যে ছবিখনৰ কাম সম্পূর্ণ হৈছে আৰু ছবিখনত কাম কৰিবলৈ পাই মই নিজকে ধন্য মানিছোঁ৷ কিয়নো সেই সময়ত নিপ বৰুৱাই যেনেদৰে ছবিখন পৰিচালনা কৰিছিল এতিয়া মই সেই সফলতা ধৰি ৰখাত কিমান সফল হৈছোঁ নাজানো৷ তথাপি বিশ্বাস যে ছবিখন ৰাইজে আদৰি ল’ব৷ তেওঁ আৰু কয়- এই কালজয়ী ছবিখনৰ দুটা দিশ মন কৰিব লাগিব যে ’৮৩ চনত যিসকলে এই ছবিখন চাইছিল তাৰ লিগেচী ইয়াত বিচাৰি পাব৷ অতি সতর্কতাৰে পুৰণা ছবিখনত আউল নলগাকৈ মান অটুট ৰাখি আগবঢ়াই নিয়াৰ চেষ্টা কৰা হৈছে৷ তদুপৰি এই ছবিখন চাই নতুন প্রজন্মই পুনৰ পূর্বৰ ছবিখন চোৱাৰ হাবিয়াস কৰিব৷ ছবিখনত মুখ্যমন্ত্রী ড০ হিমন্ত বিশ্ব শর্মায়ো ছাছপেন্স দিব বুলি তেওঁ মন্তব্য কৰে৷ অসমীয়া চিনেমা ইতিহাসত এটা নজিৰ যাতে ছবিখনে সৃষ্টি কৰিব পাৰে, তাৰ বাবে চিন্তাচর্চা কৰি ছবিখনৰ সকলো দিশ আগুৱাই নিয়া হৈছে৷

অনুষ্ঠানটোত উপস্থিত থাকি অভিনেতা প্রাঞ্জল শইকীয়াই নষ্টালজিক হৈ পৰে৷ তেওঁ কয়, ’৮৩ৰ এই ছবিখনত অভিনয় কৰা মাত্র দুজন অভিনেতাই একেখন ছবিত দ্বিতীয়বাৰ অভিনয় কৰিব পৰাটো পৰম সৌভাগ্য৷ সেই দুজন হৈছে এগৰাকী তেওঁ নিজে আৰু আনগৰাকী মুখ্যমন্ত্রী ড০ হিমন্ত বিশ্ব শর্মা৷ হিমন্ত বিশ্বই সেই সময়ত নাতিৰ চৰিত্রত অভিনয় কৰিছিল আৰু আজি একেখন ছবিত তেওঁ ককাকৰ চৰিত্রত অভিনয় কৰা বুলি উল্লেখ কৰে৷ ৰবচন লাল বৰুৱাৰ কথাৰে ‘হাস্নাহানা’ শীর্ষক গীতটোত কণ্ঠদান কৰা জনপ্রিয় কণ্ঠশিল্পী জয় বৰুৱাই অনুষ্ঠানত উপস্থিত থাকি অতি গৌৰৱবোধ কৰাৰ লগতে প্রাইড ইষ্ট এণ্টাৰটেইনমেণ্ট প্রাইভেট লিমিটেডৰ এই মহান পদক্ষেপক শলাগ জ্ঞাপন কৰে৷ ছবিখন সকলো দিশতে তেওঁ সফল হ’ব বুলি আশা কৰে৷

ছবিখনৰ আন শীর্ষক আন এটা গীত ‘জীৱন জোনাক’ত কণ্ঠদান কৰা কণ্ঠশিল্পী নাহিদ আফ্রিনে কয়, এই ছবিখনত প্রতিগৰাকী অসমীয়াৰ আৱেগ জড়িত হৈ আছে৷ সেয়ে সংগীতত যাতে কোনো ত্রুটি নাথাকে তাৰ বাবে তেওঁ যিমান উজাৰি দিব পাৰি সেয়া দিয়া হৈছে বুলি উল্লেখ কৰে৷ ছবিখনৰ এগৰাকী অভিনেত্রী প্রীতি কংকনাই কয়- এনে এখন ছবিত অভিনয় কৰিবলৈ পাই অত্যন্ত সুখী অনুভৱ কৰাৰ লগতে প্রাইড ইষ্ট এণ্টাৰটেইনমেণ্ট প্রাইভেট লিমিটেডক কৃতজ্ঞতা জ্ঞাপন কৰে৷ পৰিয়ালৰ সকলোৰে বাবে উপভোগ্য ছবিখন সকলো দিশতে সফল হ’ব বুলি তেওঁ আশা কৰে৷ ছবিখনৰ অভিনেতা উৎপল দাসে প্রযোজিকা ৰিণিকি ভূঞা শর্মাৰ প্রতি কৃতজ্ঞতা প্রকাশ কৰাৰ লগতে তেওঁ সকলোৰে প্রেৰণা আৰু সাহস বুলি মন্তব্য কৰে৷ ছবিখনে অসমীয়া দর্শকৰ হূদয়ত বিশেষ স্থান লাভ কৰিব বুলি আশা কৰে৷

প্রাইড ইষ্ট এণ্টাৰটেইনমেণ্ট প্রাইভেট লিমিটেডৰ অধ্যক্ষ ৰিণিকি ভূঞা শর্মাৰ প্রযোজনাত বিশ্বজিৎ বৰা পৰিচালিত ছবিখনৰ চিত্রনাট্য ৰাজদ্বীপৰ৷ চিনেমাগ্রাফী প্রদীপ দৈমাৰীৰ৷ ছবিখনৰ বিভিন্ন চৰিত্রত অভিনয় কৰিছে যতীন বৰা, উৎপল দাস, যশস্বী ভূঞা, কমললোচন, প্রীতি কংকনা, সিদ্ধার্থ শর্মা, শিশুশিল্পী আয়ুসকে ধৰি কেইবাগৰাকী অভিনেতা–অভিনেত্রী৷ উল্লেখ্য যে লাডাখ, যোৰহাট, তিতাবৰ, গুৱাহাটীকে ধৰি অসমৰ বিভিন্ন লোকেচনত চিত্রগ্রহণ কৰা এই ছবিখনক অসমৰ ৰাইজে আদৰি ল’ব বুলি আশাবাদী প্রতিগৰাকী কলা–কুশলী৷ যোৰহাট থিয়েটাৰত অনুষ্ঠিত ছবিখনৰ গীত মুকলি অনুষ্ঠানটোত যোৰহাটবাসীৰ সৈতে ছবিখনৰ অভিনেতা-অভিনেত্রী আৰু কলাকুশলীসকলক পৰিচয় কৰি দিয়া হয়৷ অনুষ্ঠানটোত যোৰহাটৰ বহুকেইগৰাকী বিশিষ্ট ব্যক্তি, সাংস্কৃতিক কর্মী উপস্থিত আছিল৷

The post তিনি জুলাইত ছবিগৃহলৈ আহিব ‘ককাদেউতা, নাতি আৰু হাতী–২’ first appeared on নিয়মীয়া বাৰ্তা.

আকাশবাণীৰ নব্বৈ বছৰীয়া পূৰ্তি উপলক্ষ্যে ডিব্ৰুগড় অনাতাঁৰ কেন্দ্ৰই বৃহস্পতিবাৰে সন্ধিয়া ডিব্ৰুগড়স্থিত শ্ৰীশ্ৰীআউনীআটী সত্ৰ প্ৰেক্ষাগৃহত ‘সুৰভিত ক্ষণ’ [এ মিউজিকেল কনচাৰ্ট] শীৰ্ষক এক সংগীতানুষ্ঠানৰ আয়োজন কৰে৷

আকাশবাণীৰ ঘোষিকা পপী দাসে আঁত ধৰা অনুষ্ঠানটোত অতিথি হিচাপে উপস্থিত থাকি বক্তব্য আগবঢ়ায় আকাশবাণী ডিব্ৰুগড় কেন্দ্ৰৰ কাৰ্যালয়ৰ অধ্যক্ষ কে কে ৰেংমা, কেন্দ্ৰটোৰ অনুষ্ঠান মুৰব্বী ইন্দিৰা মৰাং, আকাশবাণী ডিব্ৰুগড় আৰু ডিডিকে ডিব্ৰুগড়ৰ অৱসৰপ্ৰাপ্ত মুৰব্বী বিষয়া লোহিত ডেকাই৷

সংগীতানুষ্ঠানৰ মঞ্চ মুকলি কৰে ডিব্ৰুগড় বিশ্ববিদ্যালয়ৰ উপাচাৰ্য অধ্যাপক ডঃ জিতেন হাজৰিকাই৷ উদ্বোধনী ভাষণ প্ৰসংগত তেওঁ আকাশবাণীয়ে এতিয়াও অতি সু-ৰুচিসন্মতভাৱে কাৰ্যসূচী প্ৰচাৰ কৰি আছে বুলি মন্তব্য দিয়ে৷

বিশেষকৈ শব্দৰ উচ্ছাৰণ তথা ভাষাৰ প্ৰতি থকা দায়ৱদ্ধতা আৰু বাতৰি পৰিৱেশনৰ ক্ষেত্ৰত থকা বিশ্বাসযোগ্যতাৰ কথা তেওঁ উল্লেখ কৰে৷ ইয়াৰ পিছতে আকাশবাণী ডিব্ৰুগড় কেন্দ্ৰৰ কলা-কুশলী আৰু কৰ্মচাৰীয়ে পৰিৱেশন কৰা সমবেত সংগীত, বৈশালী বৰাৰ কণ্ঠৰ গজল, পৰীস্মিতা ফুকনৰ কণ্ঠৰ আধুনিক গীত আৰু পৰশমণি বৰগোহাঁইৰ দ্বাৰা পৰিচালিত জেং বিহুৱে প্ৰায় দুঘণ্টা জোৰা সাংগীতিক অনুষ্ঠাটো জীপাল কৰি তোলে৷

ডেৰশতাধিক শ্ৰোতা-দৰ্শকৰ উপস্থিতিত আমন্ত্ৰিত অতিথিসকলৰ সমূহীয়া বন্তি প্ৰজ্বলনেৰে শুভাৰম্ভ কৰা ‘সুৰভিত ক্ষণ’ শীৰ্ষক সাংগীতিক অনুষ্ঠানৰ শেষত শলাগৰ শৰাই আগবঢ়ায় আকাশবাণীৰ ডিব্ৰুগড় কেন্দ্ৰৰ প্ৰসাৰণ কাৰ্যবাহী পৰশা কোঁৱৰে৷

বিশেষ বাৰ্তা, ডিব্ৰুগড়, ১৫ মে’

The post আকাশবাণীৰ ৯০ বছৰ উপলক্ষে ডিব্ৰুগড় অনাতাঁৰ কেন্দ্ৰৰ সংগীতানুষ্ঠান first appeared on নিয়মীয়া বাৰ্তা.

ঢকুৱাখনাবাসীৰ পাৰহীন উছাহ আৰু আনন্দৰ মাজেৰে শুকুৰবাৰৰ পৰা আৰম্ভ হোৱা ঢকুৱাখনাৰ স্বকীয় লোক উৎসৱ ফাটবিহুৰ সামৰণি পৰিল। শুকুৰবাৰৰ পৰা তিনিদিনে উখল মাখল হৈ থকা চাৰিকড়ীয়াৰ নৈৰ পাৰৰ ম’হঘুলি চাপৰি দেওবাৰেও লোকাৰণ্য হৈ পৰিল।

প্ৰকৃতিৰ বিনন্দীয়া পৰিৱেশৰ মাজত অনুষ্ঠিত হোৱা গছতলৰ মুকলি বিহু আৰু বাৰেৰহণীয়া সাংস্কৃতিক শোভাযাত্ৰাৰে দেওবাৰৰ দিনটো সকলো জাতি-জনগোষ্ঠীৰ মহামিলনৰ তীৰ্থত পৰিণত হ’ল ঢকুৱাখনাৰ ম’হঘূলি চাপৰি।

অসমৰ বিভিন্ন প্ৰান্তৰ পৰা অহা জাতি-জনগোষ্ঠী সমূহৰ কৃষ্টি-সংস্কৃতিৰ প্ৰদৰ্শনেৰে জীপাল হৈ পৰিল ফাটবিহুৰ অন্তিম দিনৰ কাৰ্য্যসূচী। অন্তিম দিনটোত অনুষ্ঠিত হয় বাৰেৰহণীয়া সাংস্কৃতিক শোভাযাত্ৰা। হাজাৰ হাজাৰ বিহুপ্ৰেমী ৰাইজৰ উপস্থিতিত শোভাযাত্ৰা উদ্ধোধন কৰে জনপ্ৰিয় কণ্ঠশিল্পী আৰু অভিনেত্ৰী দীপলীনা ডেকাই।

ফাটবিহুৰ সাতামপুৰুষীয়া ঐতিহ্য,পৰম্পৰা দেখি অভিভূত হৈ পৰে কণ্ঠশিল্পীগৰাকী। ফাটবিহু বাকৰিৰ পৰা উলিওৱাৰ এই শোভাযাত্ৰাত ঢকুৱাখনাৰ ৰাজপথত এক বৰ্ণিল পৰিৱেশৰ সৃষ্টি কৰে। শোভাযাত্ৰাৰ প্ৰতিফলিত হয় অসমৰ প্ৰতিতো জাতি জনগোষ্ঠীৰ কৃষ্টি-সংস্কৃতি।

সাংস্কৃতিক শোভাযাত্ৰাত মিচিং,দেউৰী, মৰান, সোণোৱাল কছাৰী, তিৱা, নেপালীকে ধৰি বিভিন্ন জাতি-জনগোষ্ঠীৰ কলা-কৃষ্টি প্ৰদৰ্শিত হয়। তদুপৰি অসমীয়া গ্ৰাম্য জীৱনৰ ভুই ৰোৱা,কঠীয়া সিঁচা,মাছধৰা, বিয়া, মৃতকৰ সকামকে ধৰি বহু দৃশ্য উপস্থাপন কৰাৰ লগতে ইছলাম ধৰ্মাৱলম্বী লোকসকলৰ নামাজ পাঠৰ দৃশ্যও ইয়াত প্ৰদৰ্শিত হয়।

ইয়াৰ পিছতে অনুষ্ঠিত হয় ফাটবিহুৰ মুখ্য আকৰ্ষণ মুকলি বিহু প্ৰতিযোগিতা। অৰ্ধ শতাধিক বিহুদলে অংশগ্ৰহণ কৰা মুকলি বিহু প্রতিযোগিতাখন উদ্বোধন কৰে জ্যেষ্ঠ কৃতি বিহুৱা নিৰঞ্জন গগৈয়ে। মুকলি বিহু উদ্ধোধনৰ পিছতেই পুৱাৰ পৰাই গমগমাই থকা বিহু বাকৰিত পুনৰবাৰ উঠিল বিহুনামৰ অপূৰ্ব উজান।

বিভিন্ন জাতি -জনগোষ্ঠীৰ বিহু দলসমূহে একেলগ হৈ গছৰ তলত প্ৰদৰ্শন কৰে বিহু। ঢোল-পেঁপাৰ মাতত কঁপি উঠা হাজাৰ হাজাৰ বিহুবলীয়া ৰাইজৰ উপস্থিতিত পুনৰবাৰ জীপাল হৈ পৰে চাৰিকড়ীয়া নদীৰ সেউজীয়া পাৰ। বিয়লিলৈ ফাটবিহু সমিতিৰ সভাপতি বসন্ত শইকীয়াই সভাপতিত্বত অনুস্থিত হয় মুকলি সভা।

তিতাবৰৰ বিশিষ্ট সমাজকৰ্মী দিপাংকৰ হাজৰিকাই উদ্ধোধন কৰা মুকলি সভাত নিৰ্দিষ্ট বক্তা হিচাপে উপস্থিত থাকে বিশিষ্ট তাই গৱেষক, লোক-সংস্কৃতিৰ সাধক ড০ পুষ্প গগৈয়ে কয়- ফাটবিহু তলীৰ দৰে বিশাল, সেউজ স্থায়ী বিহুতলী অসমৰ ক’তোৱেই নাই। ঢকুৱাখনাবাসীয়ে এই প্ৰশংসনীয় কামেৰে অসমীয়া লোক-সংস্কৃতিলৈ অমূল্য অৰিহণা আগবঢ়াইছে।

আজিৰ দিনত কোনো বিদেশী পৰ্যটক,গৱেষক যদি অসমলৈ বিহুৰ বিষয়ে জানিবলৈ, গৱেষণা কৰিবলৈ আহে তেন্তে তেওঁলোকক দেখুৱাবলৈ ফাটবিহুৰ বাদে স্থায়ী বিহুতলী আৰু নিভাজ বিহু ঢকুৱাখনাৰ ফাটবিহুৰ বাদে একোৱেই নাই। নগালেণ্ডৰ হৰ্ণবিল ফেষ্টিভেলৰ দৰে ফাটবিহুকো ৰজাঘৰীয়া পৃষ্ঠপোষকতাৰ আন্তঃৰাষ্ট্ৰীয় পৰ্যায়ত উজলাই তোলাৰ দৰকাৰ বুলি মন্তব্য কৰে।

এইক্ষেত্ৰত স্থানীয় বিধায়ক নৱ কুমাৰ দলেই প্ৰচেষ্টাত মুখ্যমন্ত্ৰী ডঃ হিমন্ত বিশ্ব শৰ্মাই এই দিশত ইতিমধ্যে আগবঢ়োৱা অৱদানৰ বাবে তেওঁ চৰকাৰক প্ৰশংসা কৰে। মুকলি সভাত আমন্ত্ৰিত অতিথি হিচাপে উপস্থিত থাকে সদৌ অসম ছাত্ৰ সন্থাৰ সভাপতি উৎপল শৰ্মা।

নিজৰ ভাষণত ছাত্ৰ নেতাজনে কয় যে অসমৰ বিভিন্ন জাতি-জনগোষ্ঠীয়ে আজি বিজ্ঞান-প্ৰযুক্তিৰ জয়জয়কাৰ অৱস্থাত নিজৰ স্বকীয়তা হেৰুৱাইছে বুলি সৰৱ চৰ্চা চলি থকাৰ ধামখুমীয়াৰ মাজতো ঢকুৱাখনাৰ ফাটবিহুৱে ঐতিহ্যৰ শিপা ধৰি ৰাখি সকলো জাতি জনগোষ্ঠীৰ কৰা সংস্কৃতিৰ মহামিলন ঘটাই ৰাখিব পৰাটো অতি গৌৰৱৰ বিষয়।

তেওঁ লগতে কয় যে ফাটবিহুক ঢকুৱাখনা আৰু ইয়াৰ সমীপৱৰ্তী অঞ্চলত পৰ্যটনৰ অপাৰ সম্ভাৱনা আছে। ঢকুৱাখনাৰ ফাটবিহুক ৪০ বিঘা মাটি আৰু ৪০ কোটি টকাৰ প্ৰকল্পতে সীমিত কৰি ৰখাৰ পৰিৱৰ্তে ১০০ বিঘাৰ মাটিত ৪০০ কোটি টকাৰ প্ৰকল্প হাতত লোৱা উচিত।

ফাটবিহু ক্ষেত্ৰখন বছৰৰ মাত্ৰ তিনিটা দিন ব্যৱহাৰ কৰি ৩৬২টা দিন চন পেলাই থলে নহ’ব বুলি শৰ্মাই মন্তব্য কৰে। বছৰৰ বাৰ মাহেই ফাটবিহুৰ তলীখন ব্যৱহাৰ কৰাৰ পৰিকল্পনা কৰাৰ প্ৰয়োজন। স্থানীয় ভাৱে উপলব্ধ উপাদানেৰে বিপণন খোলাৰ ওপৰতো শৰ্মাই গুৰুত্ব আৰোপ কৰে। তেওঁ কয় যে আমি হায়দৰাবাদৰ গামোচা ব্যৱহাৰ কৰি সংস্কৃতি জীয়াই ৰাখিব নোৱাৰোঁ।

থলুৱা শিপিনীয়ে ঘৰতে বোৱা গামোচা আমি ব্যৱহাৰ কৰিব পাৰিব লাগিব। আমি মহাৰাষ্ট্ৰৰ পাওভাজি, দক্ষিণৰ ইডলি -ঢোজা,মাঞ্চূৰিয়ান চাওমিন আৰু ম’ম খালেই নহ’ব আমাৰ তিল পিঠা ঘিলা পিঠাও তেওঁলোকক খোৱাব পাৰিব লাগিব।

ইফালে মুকলি সভাত কেন্দ্ৰীয় মন্ত্ৰী সৰ্বানন্দ সোণোৱালকে বিধায়ক ডাঃ ৰণোজ পেগুকে ধৰি বহু কেইজন ৰাজনৈতিক ব্যক্তি উপস্থিত থকাৰ কথা আছিল যদিও উপস্থিত নাথাকিল। অৱশ্যে স্থানীয় বিধায়ক নৱ কুমাৰ দলেই লিখিতভাৱে তেওঁৰ বাৰ্তা প্ৰেৰণ কৰে আৰু সেইটো পাঠ কৰি দিয়া হয়।

ঢকুৱাখনাৰ ম’হঘুলি চাপৰিৰ পৰা পুলকজ্যোতি বৰা, ১১ মে’

The post পাৰহীন উছাহ-আনন্দৰ মাজেৰে সামৰণি পৰিল ফাটবিহুৰ first appeared on নিয়মীয়া বাৰ্তা.

ৰাজ্যৰ বিশিষ্ট অভিনেত্ৰী চেতনা দাসক জাতীয়-জনগোষ্ঠীয় ঐক্যমঞ্চ, ডিব্ৰুগড়ে বসন্ত বঁটা-২০২৬ প্ৰদান কৰে৷ দুদিনীয়া বৰ্নাঢ্য সাংস্কৃতিক কাৰ্যসূচীৰে চৌকিডিঙ্গী খেলপথাৰত জাতীয়-জনগোষ্ঠীয় ঐক্য মঞ্চ, ডিব্ৰুগড়ৰ উদ্যোগত অনুষ্ঠিত হোৱা কেন্দ্ৰীয় ব’হাগী বিদায় উৎসৱত কালি সামৰণি অনুষ্ঠানত বিশিষ্ট অভিনেত্ৰী চেতনা দাসক এই বঁটা আনুষ্ঠানিকভাৱে প্ৰদান কৰা হয়৷

জাতীয়-জনগোষ্ঠীয় ঐক্য মঞ্চ, ডিব্ৰুগড়ৰ সভাপতি ৰাণাৰঞ্জন গগৈৰ পৌৰহিত্যত অনুষ্ঠিত হোৱা গাম্ভীৰ্যপূৰ্ণ অনুষ্ঠানত বসন্ত বঁটা-২০২৬ গ্ৰহণ কৰি বিশিষ্ট অভিনেত্ৰীগৰাকীয়ে কয় যে, জনগোষ্ঠীয় নামটোৱে মোক আকৃষ্ট কৰিছে৷ জাতিটো একগোট হৈ জীয়াই থাকিব লাগিব৷

আমাৰ মাজত ঐক্য বৃদ্ধি পাইছে৷ আমাৰ ঐক্য সদায় আছে আৰু সদায় থাকিব৷ সেই অনুপ্ৰেৰণাতে মই আজি জীয়াই আছো৷ নিজৰ ভাষণ প্ৰসংগত বিশিষ্ট অভিনেত্ৰীগৰাকীয়ে সাংস্কৃতি ক্ষেত্ৰখনত খোজ পেলোৱা স্মৃতি সোঁৱৰণ কৰে৷

ইফালে এই অনুষ্ঠানতে সাংবাদিক জ্যোতিষ কুমাৰ পাতিৰৰ সম্পাদিত স্মৃতিগ্ৰন্থ ‘ঐক্য’ উন্মোচন কৰে বিশিষ্ট অভিনেতা অৰুণ হাজৰিকাই৷ জাতীয়-জনগোষ্ঠীয় ঐক্য মঞ্চ, ডিব্ৰুগড়ৰ সম্পাদক বিতুপন দুৱৰাই আঁত ধৰা অনুষ্ঠানত বৃহত্তৰ ডিব্ৰুগড় প্ৰেছ ক্লাৱৰ সাধাৰণ সম্পাদক ৰাতুল বুঢ়াগোহাঁই, কৈৱৰ্ত যুৱ-ছাত্ৰ সন্মিলনৰ সভাপতি জয়ন্ত দাস, গৌৰিশংকৰ দাস, কোঁচ ৰাজবংশী ছাত্ৰ সন্থাৰ প্ৰাঞ্জল দত্ত, বেংগলী যুৱ-ছাত্ৰ ফেডাৰেশ্যনৰ সাধাৰণ সম্পাদক তাপস দাস আদিকে ধৰি ভালেসংখ্যক বিশিষ্ট ব্যক্তি উপস্থিত থাকে৷

ইফালে নিশা সাংস্কৃতিক সন্ধিয়াৰ গীত পৰিৱেশন কৰে জনপ্ৰিয় কন্ঠশিল্পী গীতাঞ্জলি দাসে৷

বিশেষ বাৰ্তা, ডিব্ৰুগড়, ৮ মে’

The post চেতনা দাসক জাতীয়-জনগোষ্ঠীয় ঐক্য মঞ্চৰ বসন্ত বঁটা প্ৰদান first appeared on নিয়মীয়া বাৰ্তা.

পৰম্পৰাৰ সকলো উজ্জ্বল্য সামৰি কাইলৈৰ পৰা তিনিদিনীয়া বৰ্ণিল কাৰ্যসূচীৰে চাৰিকড়ীয়া নৈৰ পাৰৰ ম’হঘুলি চাপৰিত উদযাপন কৰা হ’ব ঢকুৱাখনাৰ ঐতিহ্যমণ্ডিত ফাটবিহু। আহোম ৰাজত্ব কালৰে পৰা নিজস্ব বৈশিষ্ট্য আৰু স্বকীয় পৰম্পৰাৰে উদযাপিত হৈ অহা ঢকুৱাখনাবাসীৰ স্বাভিমানস্বৰূপ তথা ৰাজ্যৰ সাংস্কৃতিক জগতৰ একক আৰু অনন্য লোক উৎসৱ ২০২৬ বৰ্ষ উদযাপক লৈ উদুলি মুদুলি পৰিবৱেশে বিৰাজ কৰিছে ফাটবিহুৰ স্থায়ী বাকৰি ম’হঘুলি চাপৰিত।

ঢকুৱাখনাৰ আয়ুসৰেখাস্বৰূপ চিৰপ্ৰবাহিত চাৰিকড়ীয়া নৈৰ উত্তৰপাৰে অৱস্থিত ম’হঘুলি চাপৰিৰ ৩৮ বিঘা মাটিৰে পৰিবেষ্টিত ফাটবিহু বাকৰিক সজাই পৰাই তুলিছে ন-ৰূপত।দুই লক্ষাধিক বিহুপ্ৰেমীক আদৰিবলৈ সাজু হৈছে সাংস্কৃতিবান ঢকুৱাখনীয়া ৰাইজ।

শুকুৰবাৰৰ পৰা দেওবাৰলৈ ম’হঘুলি চাপৰিত প্ৰদৰ্শিত হ’ব বিভিন্ন জাতি-জনগোষ্ঠীৰ চহকী কৃষ্টি-সংস্কৃতি। ফাটবিহুৰ ঐতিহ্য আৰু গৰিমা নিখুঁত ৰূপত উপস্থাপনৰ বাবে সকলো চেষ্টাই অব্যাহত ৰাখিছে উদযাপন সমিতিয়ে।

আলহী অতিথিক আপ্ৰায়নৰ বাবে সাজু কৰা হৈছে পিঠা-পনা ,বিভিন্ন থলুৱা খাদ্য সম্ভাৰ।এইবাৰ দুই শতাধিক বিহুদলে অংশগ্ৰহন কৰিব ফাটবিহুৰ মুখ্য আকৰ্ষণ মুকলি বিহুত। কাৰ্যসূচী অনুসৰি কাইলৈ পুৱা পুৱা ৯ বজাত পতাকা উত্তোলনেৰে ফাটবিহু ২০২৬ বৰ্ষৰ তিনিদিনীয়া বর্ণিল কাৰ্য্যসূচীৰ পাতনি মেলিব ফাটবিহু সমিতিৰ সভাপতি বসন্ত শইকীয়াই।

ইয়াৰ পিছতে স্মৃতি তৰ্পণ কৰিব উদযাপন সমিতিৰ সভাপতি হেমন্ত গগৈয়ে। পুৱা ১১,৩০ বজাত মঞ্চ মুকলি কৰিব প্ৰবীণ সাংবাদিক কুশল গগৈয়ে। দুপৰীয়াৰ পৰা অনুষ্ঠিত হ’বলগা মহিলাসকলৰ টকা বিহু প্রতিযোগিতা উদ্বোধন কৰিব তেজপুৰৰ জ্যেষ্ঠ কৃতি বিহুৱতী অৰূপা বৰুৱাই। বিয়লিলৈ চেমনীয়া হুঁচৰি প্ৰতিযোগিতা। প্ৰতিযোগিতাখনি উদ্বোধন কৰিব জেষ্ঠ কৃতি বিহুৱা জিতেন দত্তই।

দ্বিতীয় দিনা অৰ্থাৎ ৯ মে’ৰ কাৰ্য্যসূচী অনুসৰি পুৱা কপৌফুল আৰু গছপুলি ৰোপণ। ইয়াৰ পিছতে অনুষ্ঠিত হ’ব গামোচা প্রতিযোগিতা। গামোচা প্রতিযোগিতাত উদ্বোধক হিচাপে উপস্থিত থাকিব আদৰ্শ শিপিনী মৌচুমী শইকীয়া মহন্তই। ১১.৩০ বজাত অসমীয়াৰ প্ৰাণৰ শিল্পী জুবিন গাৰ্গ আৰু সুধাকণ্ঠ ড° ভূপেন হাজৰিকাৰ প্ৰতিমূৰ্ত্তি উন্মোচন অনুষ্ঠান। ভাৰতৰত্ন, সুধাকণ্ঠ ড° ভূপেন হাজৰিকাৰ প্ৰতিমূৰ্ত্তি উন্মোচন কৰিব জগন্নাথ বৰুৱা বিশ্ববিদ্যালয়ৰ উপাচাৰ্য ড° জ্যোতিপ্ৰসাদ শইকীয়াই।

আনহাতে প্ৰাণৰ শিল্পী জুবিন গাৰ্গৰ প্ৰতিমূৰ্ত্তি উন্মোচন কৰিব বিশিষ্ট বাদ্যশিল্পী ৰাজা বৰুৱাই।দুপৰীয়ালৈ ফাটবিহুৰ মূল মঞ্চত অনুষ্ঠিত হ’ব পূর্ণবয়স্ক হুঁচৰি প্ৰতিযোগিতা। সকলো জাতি-জনগোষ্ঠীৰ বাবে মুকলি থকা পূৰ্ণবয়স্ক হুঁচৰি প্ৰতিযোগিতাখন উদ্বোধন কৰিব অসম চৰকাৰৰ সাংস্কৃতিক সঞ্চালকলয়ৰ অৱসৰপ্ৰাপ্ত উপ-সঞ্চালক ড° পবিত্ৰ কুমাৰ পেগুৱে।

বিয়লি ১ বজাত ফাটবিহুৰ বছৰেকীয়া প্রকাশ ‘বিহুৱান’ উন্মোচন। প্ৰাণৰ শিল্পী জুবিন গাৰ্গ বিশেষ এইবৰ্ষৰ ‘বিহুৱান’ উন্মোচন কৰিব বোকাখাত জেডি এচ জি মহাবিদ্যালয়ৰ অধ্যক্ষ ড° জয়ন্ত গগৈয়ে।

তৃতীয় তথা অন্তিম দিনা পুৱা ১০ বজাত সাংস্কৃতিক শোভাযাত্রা। সাংস্কৃতিক শোভাযাত্রা উদ্বোধন কৰিব জনপ্ৰিয় কণ্ঠশিল্পী তথা অভিনেত্ৰী দীপলিনা ডেকাই। দুপৰীয়া ১২ বজাত ফাটবিহুৰ মুখ্য আকৰ্ষণ মুকলি বিহু প্রতিযোগিতা। শতাধিক বিহু দলে অংশগ্ৰহণ কৰিবলগীয়া মুকলি বিহু প্রতিযোগিতাখন উদ্বোধন কৰিব জ্যেষ্ঠ কৃতি বিহুৱা নিৰঞ্জন গগৈয়ে।

বিয়লি ২ বজাৰ পৰা ফাটবিহু সমিতিৰ সভাপতি বসন্ত শইকীয়া সভাপতিত্বত অনুষ্ঠিত হ’ব মুকলি সভা। অসম সাহিত্য সভাৰ সভাপতি ড° বসন্ত গোস্বামীয়ে উদ্বোধন কৰিবলগীয়া মুকলি সভাত মুখ্য অতিথি হিচাপে অংশগ্ৰহণ কৰিব কেন্দ্ৰীয় মন্ত্ৰী সৰ্বানন্দ সোণোৱালে।

মুকলি সভাত শিক্ষামন্ত্ৰী ডা:ৰণোজ পেগু, লখিমপুৰৰ সাংসদ প্রদান বৰুৱা, ঢকুৱাখনাৰ বিধায়ক নৱ কুমাৰ দলে, সৰুপথাৰৰ বিধায়ক বিশ্বজিৎ ফুকনে বিশিষ্ট অতিথি হিছাপে অংশগ্ৰহন কৰিব লব। লোক সংস্কৃতিৰ গৱেষক ড° পুষ্প গগৈয়ে নিদিষ্ট বক্তাৰূপে উপস্থিত থাকিবলগীয়া মুকলি সভাখনত গিৰিজা নন্দ চৌধুৰী বিশ্ববিদ্যালয়ৰ উপাচাৰ্য ড° কন্দৰ্প দাস, অসম বিধানসভাৰ সচিব দুলাল পেগু, সদৌ অসম ছাত্ৰ সন্থাৰ সভাপতি উৎপল শৰ্মাকে ধৰি আন কেইবাজনো গণ্য-মান্য ব্যক্তি উপস্থিত থাকিব।

এই একবিংশ শতিকাৰ চকু চাট মৰা জাক -জমকতায়ো ম্লান কৰিব নোৱাৰা ঢকুৱাখনাবাসীৰ স্বাভিমান ফাটবিহুৰ তিনিওটি দিনৰ কাৰ্যসূচীত ৰাজ্যবাসীৰ সহায়-সহযোগিতা কামনা কৰি জাতীয় সাজপাৰ পৰিধান কৰি ফাটবিহু উপভোগ কৰিবলৈ বিহুপ্ৰেমীক আহ্বান জনাইছে উদযাপন আৰু ফাটবিহু সমিতিয়ে।

ঢকুৱাখনাৰ পৰা পুলকজ্যোতি বৰাৰ প্ৰতিবেদন, ৭ মে’

The post কাইলৈৰ পৰা ফাটবিহু : উদুলি-মূ্দুলি ঢকুৱাখনাৰ চাৰিকড়ীয়া নৈৰ পাৰৰ ম’হঘুলি চাপৰি first appeared on নিয়মীয়া বাৰ্তা.

তামিলনাডুত নতুন চৰকাৰ গঠনক লৈ চলি থকা জল্পনা-কল্পনাৰ মাজতে বৃহস্পতিবাৰে নতুন মোৰ লয় ৰাজনৈতিক পৰিস্থিতিয়ে। টিভিকে (TVK)ৰ মুৰব্বী বিজয়ে ৰাজ্যপাল R. N. Raviৰ সৈতে সাক্ষাৎ কৰি চৰকাৰ গঠনৰ দাবী উত্থাপন কৰে বুলি জানিব পৰা গৈছে।

সূত্ৰ অনুসৰি, বিজয়ে ৰাজ্যপালক জনায় যে তেওঁৰ হাতত চৰকাৰ গঠনৰ বাবে প্ৰয়োজনীয় সমৰ্থন আছে আৰু শপত গ্ৰহণৰ পিছত বিধানসভাত সহজেই সংখ্যাগৰিষ্ঠতা প্ৰমাণ কৰিব পাৰিব। লগতে কোন কোন দল আৰু বিধায়কে তেওঁৰ চৰকাৰক সমৰ্থন আগবঢ়াইছে সেই বিষয়েও ৰাজ্যপালক অৱগত কৰে।

খবৰ অনুসৰি, বিজয়ে চৰকাৰ স্থিৰভাৱে চলাই নিয়াৰ ক্ষেত্ৰতো আশ্বাস প্ৰদান কৰে। ইয়াৰ পিছতে ৰাজ্যপালগৰাকীয়ে তেওঁক আনুষ্ঠানিকভাৱে চৰকাৰ গঠনৰ আমন্ত্ৰণ জনোৱা বুলি সূত্ৰে প্ৰকাশ কৰিছে।

ইফালে, তামিলনাডুৰ নতুন চৰকাৰৰ শপত গ্ৰহণ অনুষ্ঠান শুকুৰবাৰ অথবা শনিবাৰে চেন্নাইত অনুষ্ঠিত হ’ব পাৰে বুলি জানিব পৰা গৈছে। অনুষ্ঠানত টিভিকেৰ জ্যেষ্ঠ নেতা, মিত্ৰদলৰ প্ৰতিনিধি আৰু দেশৰ কেইবাজনো শীৰ্ষ ৰাজনৈতিক নেতাই অংশগ্ৰহণ কৰাৰ সম্ভাৱনা আছে।

উল্লেখযোগ্য যে, ইয়াৰ পূৰ্বে বুধবাৰে বিজয়ে ৰাজ্যপালৰ সৈতে সাক্ষাৎ কৰি টিভিকে আৰু কংগ্ৰেছ বিধায়কৰ সমৰ্থনৰ তালিকা দাখিল কৰিছিল। যদিও সেই সময়ত ৰাজ্যপালে চৰকাৰ গঠনৰ আমন্ত্ৰণ সন্দৰ্ভত কোনো সিদ্ধান্ত গ্ৰহণ কৰা নাছিল।

ডিজিটেল ডেস্ক, ৭  মে’

The post TVK-ক চৰকাৰ গঠনৰ বাবে গ্ৰীন ছিগনেল ৰাজ্যপালৰ first appeared on নিয়মীয়া বাৰ্তা.

বিগত পাঁচ বছৰৰ দৰে আৰ. এছ. ক্ৰিয়েছনৰ দ্বাৰা যোৰহাটত “নৰ্থ ইষ্ট বেষ্ট ম’ম এণ্ড এঞ্জেল ২০২৬ ছিজন ৬” সুপ্ত প্ৰতিভাৰ বিকাশৰ সৌন্দৰ্য্য প্ৰতিযোগিতাখনিৰ আয়োজন কৰা হৈছে। অনুষ্ঠানটিৰ পৰিচালন সঞ্চালিকা ৰিজু আৰ শইকীয়াই এই কথা জানিবলৈ দিয়ে।

প্ৰতিযোগিতাখনৰ সহঃ পৰিচালিকা হিচাপে আছে ক্ৰমে হিমাদ্ৰি, শেৱালী, চয়নিকা, জিলমিল, জয়াৰাণী, ৰূপা আৰু স্বপ্নালী।

উত্তৰ পূৰ্বাঞ্চলৰ ভিত্তিত শিশু, কিশোৰ, কিশোৰী, যুৱতী আৰু বিবাহিত মহিলাৰ ন ন প্ৰতিভাৰ লগতে জাতীয় সাজপাৰক পৰিচয় কৰাৰ মানসেৰে আৰ এচ ক্ৰিয়েছনৰ দ্বাৰা মুঠ পাচঁটা শাখাত ক্ৰমে- ক শাখাত ৪ বছৰৰ পৰা ৭ বছৰলৈ, খ শাখাত ৮ বছৰৰ পৰা ১১ বছৰলৈ ধাৰ্য কৰিছে। টীন শাখা ১২ বছৰৰ পৰা ১৫ বছৰলৈ আৰু মিচ শাখা ১৬ বছৰৰ পৰা ২৫ বছৰলৈ।মহিলাৰ চিলভাৰ  শাখা ৩৯ বছৰলৈ আৰু গোল্ড শাখা ৪০ বছৰৰ পৰা ৪৯ বছৰলৈ।  প্ৰতিযোগিতাখনৰ ডাইমণ্ড-১ শাখা ৫০ বছৰৰ পৰা ৫৯লৈ, ডাইমণ্ড-২ শাখা ৬০বছৰ  উৰ্ধত।

যোগদানৰ মাচুল ক্ৰমে ক শাখা ৮০০ টকা, খ শাখা ১৩০০ টকা, টীন শাখা ১৭০০ টকা, মিচ শাখা ১৮০০ টকা। মহিলাৰ চাৰিটা শাখা ২০০০ টকা।

প্ৰতিযোগীসকলক ৩ দিনীয়া বিনামুলীয়া প্ৰশিক্ষণৰ লগতে যোগ, জুম্বা, শাৰীৰিক ফিটনেচ আৰু হেল্ঠ চেক-আপ দিয়া হব বুলি কোৱা হৈছে। অহা ২৮, ২৯ আৰু ৩০ মেত যোৰহাট চেন্ট্ৰেল ক্লাবত প্ৰশিক্ষণ দিয়াৰ পিছত ৩১ মে’ত যোৰহাট সাহিত্য সভা ভৱন হলত চুড়ান্ত প্ৰতিযোগিতাখন আড়ম্বৰতাৰে অনুষ্ঠিত কৰা হব।

প্ৰতিযোগিতাখনিত অসমৰ সংবাদ, ছবি, সঙ্গীত, ফেচন, আৰু নাট্য জগতৰ ভালেসংখ্যক তাৰকা বিশিষ্ট অতিথি ৰূপে উপস্থিত থাকিব। উক্ত প্ৰতিযোগিতাখনিত উত্তৰ পূৰ্বাঞ্চলৰ পৰা অনলাইন বা অফলাইন যোগে যোগদান কৰিবৰ বাবে ৭০০২৬৬৭৭০০ নম্বৰত যোগাযোগ কৰিব পাৰিব।

বিশেষ বাৰ্তা, যোৰহাট, ৬ মে’

The post যোৰহাটত নৰ্থ ইষ্ট বেষ্ট মম এণ্ড এঞ্জেল-২০২৬ ছিজন ৬ৰ আয়োজন first appeared on নিয়মীয়া বাৰ্তা.