নলবাৰী জিলাৰ মুকালমুৱাৰ নিকটৱৰ্তী কাপলাবড়ী তিনিদিনীয়া বজাৰত হঠাৎ গোধন বজাৰ পতাক লৈ সমগ্ৰ জিলাখনতে তীব্ৰ চাঞ্চল্যৰ সৃষ্টি হৈছে। উল্লেখ্য যে বিগত কেবা বছৰ ধৰি সপ্তাহৰ প্ৰতি ৰবিবাৰ আৰু বৃহস্পতিবাৰে অঞ্চলটোৰ ৰাইজৰ সুবিধাৰ্থে কাপলাবড়ী বজাৰখন চলি আহিছিল।

যোৱা বৃহস্পতিবাৰে চৰকাৰৰ পৰা কোনো ধৰণৰ আগতীয়া অনুমতি অবিহনে বজাৰৰ লেচীয়ে শাক-পাচলিৰ পাইকাৰী বজাৰখন হঠাৎ নিৰ্দিষ্ট ঠাইৰ পৰা উঠাই দি তাৰ ঠাইত গৰু বজাৰ আৰম্ভ কৰে।

আগন্তুক ঈদ উপলক্ষে কাপলাবড়ী শাক-পাচলিৰ বজাৰত হঠাৎ আৰম্ভ কৰা গোধনৰ বজাৰখনক লৈ এক ৰহস্যৰ সৃষ্টি হৈছে।

যিটো সময়ত মুখ্যমন্ত্ৰী গৰাকীয়ে ঈদত গৰু কোৰবানী দিয়াৰ পৰিৱৰ্তে আন জীৱ জন্তু কোৰবানী দিয়াৰ বাবে বাৰম্বাৰ আহ্বান জনাই আহিছে তেনে সময়তে কাপলাবড়ী তিনিদিনীয়া বজাৰত হঠাৎ আৰম্ভ কৰা গোধনৰ বজাৰত শ শ তেজাল দমৰা গৰু বিক্ৰী হোৱা ঘটনাই ৰাইজৰ মাজত চৰ্চাৰ বিষয় হৈ পৰিছে।

নিয়মীয়া বাৰ্তা, মুকালমুৱা, ২৩ মে’

The post কাপলাবড়ী পাচলিৰ বজাৰত হঠাৎ আৰম্ভ গোধনৰ বজাৰ, তুমুল প্ৰতিক্ৰিয়া first appeared on নিয়মীয়া বাৰ্তা.

চলিত আইপিএলত আজি ছানৰাইজাৰ্ছ হায়দৰাবাদ আৰু দিল্লী কেপিটেলছৰ মাজত এখন ৰোমাঞ্চকৰ মেচ অনুষ্ঠিত হ’ব। সন্ধিয়া ৭:৩০ বজাৰ পৰা আৰম্ভ হ’ব এই মেচখন।

বৰ্তমান পইণ্ট টেবুলত দুয়োটা দলেই ৬-৬ পইণ্ট লৈ সমান অৱস্থাত আছে। উন্নত ৰান ৰেটৰ বাবে হায়দৰাবাদ চতুৰ্থ স্থানত আছে, আনহাতে দিল্লীয়ে চতুৰ্থ স্থান দখলৰ বাবে খেলপথাৰত নামিব। নিজৰ গৃহভূমিত একেৰাহে তৃতীয় জয় লাভৰ লক্ষ্য লৈ খেলপথাৰত নামিব হায়দৰাবাদ।

হায়দৰাবাদৰ বাবে আটাইতকৈ ডাঙৰ সমস্যা হৈছে অধিনায়ক পেট কামিনছৰ অনুপস্থিতি। তেওঁ দলৰ সৈতে যোগদান কৰিলেও এই মেচত খেলিব নোৱাৰিব। তেওঁৰ অনুপস্থিতিত ঈশান কিষাণে দলৰ নেতৃত্ব ল’ব।

বলিং বিভাগত যুৱ খেলুৱৈ যেনে ঈশান মালিংগা, প্ৰফুল হিংগে আৰু ছাকিব হুছেইনে শেহতীয়া মেচসমূহত ভাল প্ৰদৰ্শন দেখুৱাইছে। ইয়াৰ ভিতৰত ঈশান মালিংগাই ৬খন মেচত ৮টা উইকেট লাভ কৰিছে।

বেটিং বিভাগত যদিও সমস্যা অব্যাহত আছে। অপেনাৰ ট্ৰেভিছ হেড, অভিষেক শৰ্মা আৰু ঈশান কিষাণে ডাঙৰ পাৰ্টনাৰশ্বিপ গঢ়িবলৈ ব্যৰ্থ হৈছে। এই অৱস্থাত হেনৰিক ক্লাছেনৰ ওপৰত অধিক চাপ বৃদ্ধি পাইছে।

ইফালে, দিল্লীৰ বলিং বিভাগত লুংগি এনগিৰীয়ে নেতৃত্ব দিছে। অধিনায়ক অক্ষৰ পেটেলে মাজৰ অভাৰত ৰান ৰোধ কৰাত সহায় কৰিছে যদিও স্পিনাৰ কুলদীপ যাদৱৰ প্ৰদৰ্শন এতিয়ালৈ আশানুৰূপ নহয়।

ৰাজীৱ গান্ধী আন্তঃৰাষ্ট্ৰীয় খেলপথাৰ পিটচ সাধাৰণতে বেটিং-সহায়ক বুলি জনাজাত। ইয়াত উচ্চ স্ক’ৰৰ মেচ দেখা যায়। এই ষ্টেডিয়ামত এতিয়ালৈ ৮৬খন আইপিএল মেচ অনুষ্ঠিত হৈছে, য’ত লক্ষ্য অনুসৰণ কৰা দলে অধিক জয় লাভ কৰিছে।

আজিৰ দিনটোত হায়দৰাবাদত গৰম বতৰ থাকিব বুলি অনুমান কৰা হৈছে। তাপমাত্ৰা ২৫ ডিগ্ৰীৰ পৰা ৩৬ ডিগ্ৰী চেলছিয়াছৰ মাজত থাকিব পাৰে আৰু বৰষুণৰ কোনো সম্ভাৱনা নাই।

এই মেচখন দুয়োটা দলৰ বাবে অত্যন্ত গুৰুত্বপূৰ্ণ বুলি বিবেচনা কৰা হৈছে, কিয়নো জয় লাভ কৰিলে পইণ্টছ টেবুলত স্থান সুদৃঢ় কৰাৰ সুযোগ লাভ কৰিব।

ডিজিটেল ডেস্ক, ২১ এপ্ৰিল

The post IPL-2026 : জয়ৰ হেটট্ৰিকৰ লক্ষ্য SRH-ৰ, চতুৰ্থ জয়ৰ সন্ধানত DC first appeared on নিয়মীয়া বাৰ্তা.

দীৰ্ঘদিনৰ অপেক্ষাৰ অন্তত অৱশেষত দলগাঁও বিধানসভা সমষ্টিৰ বাবে ভাৰতীয় জনতা পাৰ্টিয়ে আনুষ্ঠানিকভাৱে প্ৰাৰ্থীৰ নাম ঘোষণা কৰিছে। এইবাৰ দলগাঁৱত গেৰুৱা দলটোৰ হৈ নিৰ্বাচনী যুঁজত অৱতীৰ্ণ হ’ব সুশ্ৰীকৃষ্ণা সাহা।

​বহু বছৰ ধৰি এই সমষ্টিটোত বিজেপিৰ প্ৰত্যক্ষ প্ৰাৰ্থিত্বক লৈ চলি থকা চৰ্চাৰ অন্ত পেলাই সুশ্ৰীকৃষ্ণা সাহাৰ নাম ঘোষণা হোৱাৰ লগে লগে সমগ্ৰ অঞ্চলটোত এক উচৱমুখৰ পৰিৱেশে বিৰাজ কৰিছে। এই ঘোষণাৰ লগে লগে ​বিজেপি কৰ্মীয়ে মাজত আনন্দ উল্লাস কৰা দেখা গৈছে।

এই ঘোষণাই সমষ্টিটোৰ ৰাজনৈতিক সমীকৰণত এক নতুন মাত্ৰা প্ৰদান কৰিব বুলি ৰাজনৈতিক বিশ্লেষকসকলে ধাৰণা কৰিছে। দলগাঁৱৰ উন্নয়ন আৰু জনসাধাৰণৰ দীৰ্ঘদিনীয়া অভাৱ-অভিযোগসমূহ দূৰ কৰাৰ লক্ষ্যৰেই এইবাৰ দলে শক্তিশালী প্ৰাৰ্থী আগবঢ়াইছে।

ডিজিটেল ডেস্ক, ২১ মাৰ্চ

The post দলগাঁৱত বিজেপিৰ প্ৰাৰ্থী ঘোষণা first appeared on নিয়মীয়া বাৰ্তা.

ৰঙৰ উৎসৱ ফাকুৱা হৈ যোৱাৰ বেছিদিন হোৱাই নাই৷ উৎসৱৰ বতৰত মানুহৰ মনবোৰ ৰঙীন হৈ থাকোঁতেই আকৌ প্রতিজন ভাৰতীয়ৰ মনবোৰ ৰঙীন হৈ পৰিল৷ খেলপথাৰৰ লগতে ভাৰত মাতা কী জয়ধ্বনিৰে উত্তাল হৈ পৰিল দেশৰ চহৰ–গ্রামাঞ্চলৰ পথ৷ গম্ভীৰৰ মুখতো হাঁহি বিৰিঙিল৷ খেলপথাৰতে অগ্রজ সুনীল গাভাস্কাৰৰ সৈতে নাচিলে সূর্যকুমাৰে৷ ভাংৰা নৃত্য কৰিলে অভিষেক, ঈশান, অর্শদীপে৷ কান্ধত জাতীয় পতাকা লৈ উল্লাস হার্দিক পাণ্ডিয়াৰ৷ প্রয়াগৰাজৰ ৰাজপথত জনসমুদ্র৷ এনে পৰিৱেশ নহ’ব কিয়, কাৰণ তৃতীয়বাৰলৈ বিশ্ব জয় কৰিবলৈ সক্ষম হ’ল মেন ইন ব্লু ৷ বিশ্ব ক্রিকেটত এতিয়া ভাৰতৰ আধিপত্য৷ ২০২৩ চনৰ এদিনীয়া বিশ্বকাপৰ ফাইনেলত পৰাস্ত হৈছিল ভাৰত৷ ১০খন খেলত একেৰাহে জয়লাভ কৰিও বিশ্বকাপৰ পৰা বিদায় মাগিছিল ভাৰতীয় দলটোৱে৷ সেইটোৱে আছিল অন্তিমটো দুর্ভাগ্য৷ তাৰ পিছৰ পৰা ভাৰতে পিছলৈ চাব লগা হোৱা নাই৷

২০২৪ চনৰ পৰা ভাৰতীয় দলটোৱে ভাল ফল দেখুৱাইছে যদিও ২০২৫ চনৰ বিশ্ব টেষ্ট চেম্পিয়নশ্বিপৰ ফাইনেলত প্রৱেশ কৰিবলৈ সক্ষম নহ’ল ভাৰত, তথাপি বগা বলত ভাৰতে নিৰাশ কৰা নাই দেশবাসীক৷ ২০২৪ বর্ষত ৰোহিত শর্মাৰ নেতৃত্বত টীম ইণ্ডিয়াই টি–২০ বিশ্বকাপ খেলিছিল৷ সেইবাৰ ভাৰতীয় দলটোৱে ২০০৭ চনৰ ধোনীৰ নেতৃত্বত বিশ্বকাপ জয়ী হোৱাৰ পিছত দক্ষিণ আফ্রিকাক পৰাস্ত কৰি ভাৰত চেম্পিয়ন হৈছিল৷ এই একেটা বর্ষতে ১৯ বর্ষৰ অনূর্ধ্বৰ মহিলা বিশ্বকাপত দক্ষিণ আফ্রিকাক পৰাস্ত কৰি শ্বেফালি বার্মাৰ নেতৃত্বত জয়লাভ কৰিছিল৷ ২০২৫ত ৰোহিত শর্মাৰ নেতৃত্বত ভাৰতে নিউজিলেণ্ডক পৰাস্ত কৰি চেম্পিয়ন ট্ৰফীত জয়লাভ কৰে৷ ইয়াৰ পিছতে মহিলা ক্রিকেট দলটোৱে হৰমনপ্রীত কৌৰৰ নেতৃত্বত ৪২ বছৰৰ পিছত প্রথমবাৰৰ বাবে ভাৰতৰ মহিলা দলটোৱে দক্ষিণ আফ্রিকাক পৰাস্ত কৰি বিশ্বকাপ জয়ী হয়৷

শ্রীলংকাত অনুষ্ঠিত দৃষ্টিহীন মহিলা টি–২০ বিশ্বকাপত ভাৰতে নেপালক পৰাস্ত কৰি বিশ্বকাপ জয়ী হয়৷ ২০২৬ত জিম্বাব’ৱেত অনুষ্ঠিত পুৰুষৰ ১৯ বছৰ অনূর্ধ্ব বিশ্বকাপ ফাইনেলত ইংলেণ্ডক ১০০ ৰানত পৰাস্ত কৰি বৈভৱ সূর্যবংশীৰ ইণ্ডিয়াই জয়লাভ কৰে৷ শেষত দেওবাৰে টি–২০ বিশ্বকাপৰ ফাইনেলত নিউজিলেণ্ডক ৯৬ ৰানত পৰাস্ত কৰি একেৰাহে দ্বিতীয়বাৰ বিশ্ব জয় কৰে ভাৰতে৷ এই দিনটোলৈকে কোটি কোটি ভাৰতীয়ই অপেক্ষা কৰি আছিল৷ খেল আৰম্ভ হোৱাৰ পূর্বে ইয়ান বিছপে খেলপথাৰখন চাই বিশ্লেষণ কৰিবলৈ আহিছিল৷ তেওঁ কৈছিল– ‘খেলপথাৰখন ৰঙা আৰু ক’লা মাটিৰ মিশ্রণেৰে নির্মাণ কৰা হৈছিল যদিও ৰঙাৰ পৰিমাণ বেছি আছে৷ সেয়ে যিকোনো এটা দলে টছত জয়ী হ’লে প্রথমে বেটিং কৰিব৷’ কিন্তু নিউজিলেণ্ডৰ মিচেল ছাণ্টনাৰে টছত জয়ী হৈ বলিঙৰ সিদ্ধান্ত লয়৷ ফলত ভাৰতীয় অ’পেনাৰে প্রথমৰ পৰাই নিউজিলেণ্ডৰ বলাৰসকলক আক্রমণ লক্ষ্য কৰি লয়৷ যদিও প্রথম দুই অভাৰত মাত্র ১২ ৰানহে সংগ্রহ হৈছিল, শেষত সঞ্জু আৰু অভিষেকৰ বিস্ফোৰক বেটিঙৰ ফলত ভাৰতে প্রথম ৬ অভাৰত ৯২ ৰান সংগ্রহ কৰিবলৈ সক্ষম হয়৷ প্রথম ৬ অভাৰতেই অভিষেক শর্মাই অর্ধশতক অর্জন কৰে৷ যেন ফাইনেলত হেৰুওৱা ছন্দ বিচাৰি পালে অভিষেকে৷

ভাৰতীয় দলৰ বেগী বলাৰ বুমৰাহৰ কথা লিখি শেষ কৰিব নোৱাৰি৷ ভাৰতীয় দলৰ বিপদৰ সময়ত সদায় সাহস হৈ থকা খেলুৱৈসকলৰ ভিতৰত এজন শ্রেষ্ঠ বেগী বলাৰ৷ আহমেদাবাদত ৪ অভাৰত ১৫ ৰান দি ৪ উইকেট লাভ কৰে৷ ভাৰতৰ বাবে ইয়াতকৈ ডাঙৰ প্রদর্শন আৰু কি হ’ব পাৰে৷ ফাইনেল খেলখনত ঈশানৰ ফিল্ডিং অসাধাৰণ আছিল৷ ঈশানে বেটিঙৰ লগতে ফিল্ডিঙতো নিজৰ দক্ষতা দেখুৱাবলৈ সক্ষম হয়৷ বিশ্বকাপৰ শেষৰ তিনিখন খেলত ২৭৫ ৰান কৰিবলৈ সক্ষম হোৱা সঞ্জু ছেমছন এতিয়া সকলোৰে প্রিয়৷ বিশ্বকাপৰ প্রথম খেলকেইখনত সুযোগ নাপালেও ইডেনত ৯৭ ৰান, ৱাংখেড়েত ৮৯ আৰু আহমেদাবাদত ৮৯ ৰান কৰি সঞ্জুৱে বিশ্বৰ ইতিহাসত নাম ৰচিলে৷ বিশ্বকাপৰ পূর্বে দক্ষিণ আফ্রিকা আৰু নিউজিলেণ্ডৰ বিৰুদ্ধে শৃংখলাত সঞ্জুৱে ৰান কৰিব পৰা নাছিল৷ তেতিয়াই স্পষ্ট হৈ পৰিছিল যে বিশ্বকাপত দলত থাকিলেও মূল ১১ত সহজে সঞ্জুৱে স্থান লাভ নকৰিব৷ ভবা মতে প্রথম তিনিখন মেচত স্থান লাভ নকৰিলেও পিছলৈ এই সকলোবোৰ সলনি হ’ল৷ মুঠতে প্রতিজন খেলুৱৈৰ দক্ষতা, ধৈর্য, দৃঢ়তাৰ ফলত ভাৰতে বিশ্ব জয় কৰিলে৷ ভাৰতীয় খেলুৱৈসকলৰ দায়িত্ব বাঢ়িল, তেওঁলোকৰ ওপৰত মানুহৰ আশা–আকাংক্ষা বাঢ়িল৷ সেয়ে আসন্ন সময়বোৰত আৰু অধিক শক্তিশালী ৰূপত খেলপথাৰত নামিব লাগিব ভাৰত৷

The post সম্পাদকীয় : বিশ্বৰ ক্রিকেটত আধিপত্য first appeared on নিয়মীয়া বাৰ্তা.

চামগুৰি সমষ্টিৰ তাৰাবাৰী হাইস্কুলত নৱম শ্ৰেণীৰ ছাত্ৰ-ছাত্ৰীসকলৰ মাজত চাইকেল বিতৰণৰ কাৰণে আজি এক সভা অনুষ্ঠিত হয়। উক্ত সভাত উপস্থিত থাকে চামগুৰি সমষ্টিৰ বিজেপিৰ প্ৰাৰ্থীত্বপ্ৰত্যাশী নাজিৰ হুছেইন।

বিজেপি নেতাজন উপস্থিত থাকি মুখ্যমন্ত্রীৰ বিশেষ আঁচনিৰ অধীনত নৱম শ্ৰেণীৰ ছাত্ৰ-ছাত্ৰীসকলৰ মাজত বিনামূলীয়া চাইকেল বিতৰণ কৰে। বিজেপি নেতাজনে নিজৰ ভাষণত কয় যে মুখ্যমন্ত্রীৰ এই আঁচনিৰ জৰিয়তে দুখীয়া ছাত্ৰ-ছাত্ৰীসকলৰ জীৱনলৈ নতুন আশাৰ পোহৰ কঢ়িয়াই আনিব বুলি মন্তব্য কৰে।

মুখ্যমন্ত্রী ড০ হিমন্ত বিশ্ব শৰ্মাৰ জনকল্যাণমূলক বিশেষ আঁচনিৰ প্ৰদানৰ কাৰণে মুখ্যমন্ত্রীক ধন্যবাদ আৰু অভিনন্দন কৰে বিজেপি নেতা নাজিৰ হুছেইনে। সভাখনত তাৰাবাৰী হাইস্কুলৰ প্ৰধান শিক্ষক হাৰুণ ৰশ্বিদ, বিদ্যালয় পৰিচালনা সমিতিৰ লগতে শিক্ষক-শিক্ষয়িত্ৰী সকল উপস্থিত থাকে।

নিয়মীয়া বাৰ্তা, ৰূপহীহাট, ৩ ফেব্ৰুৱাৰী

The post মুখ্যমন্ত্রীৰ বিশেষ আঁচনিৰ অধীনত চামগুৰিত চাইকেল বিতৰণ first appeared on নিয়মীয়া বাৰ্তা.

বাংলাদেশৰ শিক্ষা মন্ত্রালয়ে দেশৰ মাধ্যমিক আৰু নিম্ন মাধ্যমিক বিদ্যালয়ৰ বাবে ২০২৬ বর্ষৰ বন্ধৰ তালিকা প্রকাশ কৰিছে৷ প্রকাশিত বন্ধৰ তালিকা অনুযায়ী নতুন বছৰটোত মুঠ বন্ধৰ দিন ৰখা হৈছে ৬৪ দিন৷

যোৱা বছৰৰ তুলনাত ১২ দিন বন্ধৰ তালিকাৰ পৰা কর্তন কৰি ভাষা দিৱস, সৰস্বতী পূজা, জন্মাষ্টমী, বৌদ্ধ পূর্ণিমা, মহালয়া আৰু মধুপূর্ণিমাক বন্ধৰ তালিকাৰ পৰা বাদ দিয়া হৈছে৷ বাংলাদেশৰ ছাত্র সমাজে বাংলা ভাষাক ৰাষ্ট্র ভাষা কৰাৰ দাবীত যি আন্দোলন চলাইছিল তাৰ গৌৰৱময় ইতিহাসক সন্মান জনাই ২১ ফেব্রুৱাৰীৰ দিনটোক ইউনেস্কোৱে ‘আন্তঃৰাষ্ট্রীয় মাতৃভাষা দিৱস’ হিচাপে স্বীকৃতি প্রদান কৰে৷

পিছে ভাষাৰ আৱেগক পিছ পেলাই থৈ ধর্মৰ আৱেগক উচ্চ স্থান দি মহম্মদ ইউনুছৰ অন্তর্ৱর্তীকালীন চৰকাৰখনে বাতিল কৰে ২১ ফেব্রুৱাৰীৰ বন্ধৰ দিনটোও৷ বিশেষকৈ ২১ ফেব্রুৱাৰী আৰু সংখ্যালঘু সম্প্রদায়ৰ অনুষ্ঠান–পার্বণত বিদ্যালয়ৰ বন্ধৰ তালিকাৰ পৰা বাদ দিয়া কার্যক জামাতশাসিত বাংলাদেশত পৰিকল্পিত ষড়যন্ত্র বুলি ধাৰণা কৰা হৈছে৷

ডিজিটেল ডেস্ক, ২ জানুৱাৰী

The post বন্ধৰ তালিকাৰ পৰা বাদ পৰিল সৰস্বতী পূজা, জন্মাষ্টমী first appeared on নিয়মীয়া বাৰ্তা.

ধুবুৰী জিলাৰ গৌৰীপুৰৰ সমীপৰ বগৰীবাৰী উপ-ডাকঘৰৰ নথি-পত্ৰত দুৰ্বৃত্তই অগ্নিসংযোগ কৰাৰ সমান্তৰালকৈ কাৰ্যালয়টো লণ্ডভণ্ড কৰা ঘটনাই চাঞ্চল্যৰ সৃষ্টি কৰিছে।

জানিব পৰা মতে, আজি উপ-ডাকঘৰটোৰ ডাকোৱালগৰাকীয়ে কাৰ্যালয় খোলাৰ পিছতে এই দৃশ্য প্ৰত্যক্ষ কৰে আৰু আঠানী আৰক্ষীক অৱগত কৰাৰ পিছত লগে লগে আৰক্ষীৰ এটা দলে আহি জুই নিৰ্বাপণ কৰে। দুৰ্বৃত্তৰ দলটোৱে খিৰিকী ভাঙি কাৰ্যালয়টোত প্ৰৱেশ কৰা বুলি সন্দেহ কৰা হৈছে।

উল্লেখ্য যে উপ-ডাকঘৰটোৰ পৰা আনুমানিক এশ মিটাৰ দূৰত্বত আছে আঠানী আৰক্ষী চকীখন।

নিয়মীয়া বাৰ্তা, ধুবুৰী, ৩০ ডিচেম্বৰ

The post বগৰীবাৰী উপ-ডাকঘৰৰ নথি-পত্ৰত অগ্নিসংযোগ দুৰ্বৃত্তৰ first appeared on নিয়মীয়া বাৰ্তা.

কামৰূপ জিলাৰ মিৰ্জাৰ বৰহাটৰ বিশিষ্ট শিল্পী ড° খনীন্দ্ৰ মোহন দাসলৈ গ্লবেল হিউমেন প্ৰটেকচন ফৰামে আগবঢ়াইছে নেচনেল কালচাৰেল এৱাৰ্ড ২০২৫৷

পিতৃ নগেন্দ্ৰ মোহন দাস আৰু মাতৃ শৈলজানন্দ দাসৰ অনুপ্ৰেৰণাত  সৰুৰে পৰা সাহিত্য আৰু সংস্কৃতি চৰ্চাত নিমৰ্জিত হৈ পৰা দাসে বিভিন্ন কাকত আলোচনীত সাহিত্য কৰ্মৰ সৈতে জড়িত হৈ আহিছে৷

গুৱাহাটী অনাতাঁৰ কেন্দ্ৰতো তেওঁ নিয়মীয়াভাবে বিভিন্ন সাহিত্য অনুষ্ঠানত অংশগ্ৰহণ কৰি আহিছে৷ ৰাজ্যৰ বিভিন্ন প্ৰান্তত বিহু হুচৰি, বিহুৱতী আৰু সংগীত প্ৰতিয়োগিতাত বিচাৰকৰ দায়িত্ব পালন কৰি অহা দাসে ইতিমধ্যে উত্তৰ পূৰ্বাঞ্চল প্ৰেৰণা বঁটাৰ লগতে বাবু জগজীৱনৰাম আদি বিভিন্ন ৰাষ্ট্ৰীয় সন্মান লাভ কৰিছে৷

সাহিত্য আৰু সংস্কৃতি জগতলৈ আগবঢ়োৱা অৱদানৰ স্বীকৃতি হিচাপে অলপতে নতুন দিল্লীত অনুষ্ঠিত এক গাম্ভীৰ্যপূৰ্ণ অনুষ্ঠানত তেওঁ নেচনেল কালচাৰেল এৱাৰ্ড লাভ কৰে৷

নিয়মীয়া বাৰ্তা, বেজেৰা, ২০ ডিচেম্বৰ

The post ড° খনীন্দ্ৰ মোহন দাসক নেচনেল কালচাৰেল এৱাৰ্ড প্ৰদান first appeared on নিয়মীয়া বাৰ্তা.

পথৰ কুকুৰক লৈ চলি থকা এটা গোচৰৰ অন্তিম শুনানিত স্কুল, ৰে’ল ষ্টেচন, হাস্পতাল আদিৰ সন্মুখৰ পৰা তেনে কুকুৰক আঁতৰোৱাৰ নির্দেশ উচ্চতম ন্যায়ালয়ে দিয়াৰ সময়তে পোহনীয়া কুকুৰক লৈ এটা নতুন নিয়ম বলৱৎ কৰিছে ডেৰাডুন পৌৰসভাই৷

ডেৰাডুন ডগ লাইচেঞ্চিং বাইলজ–২০২৫ৰ অধীনত যদি কোনো পোহনীয়া কুকুৰে কাৰোবাক কামোৰে তেন্তে কুকুৰটোৰ মালিকৰ বিৰুদ্ধে এফআইআৰ দাখিল কৰা হ’ব পাৰে আৰু কুকুৰটোৰ হ’ব পাৰে হাজোত বাস৷

ডিজিটেল ডেস্ক, ১৮ ডিচেম্বৰ

The post পোহনীয়া কুকুৰে কামুৰিলে মালিকৰ বিৰুদ্ধে FIR first appeared on নিয়মীয়া বাৰ্তা.

ৰাইজৰ মাজত পুনৰবাৰ চৰ্চালৈ আহিছে শিৱসাগৰৰ বিধায়ক অখিল গগৈ। মুখ্যমন্ত্ৰী ড° হিমন্ত বিশ্ব শৰ্মাই অখিল গগৈক লক্ষ্য কৰি কঠোৰ মন্তব্য কৰি কয় যে “অখিল গগৈ এতিয়া কেৱল ফেচবুকৰ নেতা। নিজৰ সমষ্টি ৰক্ষা কৰাৰ স্বাৰ্থতেই নিৰ্বাচনৰ আগতেই কংগ্ৰেছৰ ওচৰত আত্মসমৰ্পণ কৰিব।”

কংগ্ৰেছৰ সৈতে মিত্ৰতা বিচাৰি ব্যস্ত হৈ থকা অখিল গগৈক সমালোচনা কৰি মুখ্যমন্ত্ৰীয়ে কয় যে ৰাজনীতিত স্থিতি হেৰুওৱাৰ ফলতেই তেওঁ এইদৰে দিশহীন হৈ পৰিছে।

ইফালে, বিজেপি মিত্ৰজোঁটৰ লক্ষ্য সন্দৰ্ভত মুখ্যমন্ত্ৰীয়ে স্পষ্ট কৰি কয়— “বিজেপিৰ লক্ষ্য ১০০ নহয়। এতিয়া বিজেপি মিত্ৰজোঁটৰ লক্ষ্য অসমত ৫০ শতাংশতকৈও অধিক ভোট লাভ কৰা। সেই লক্ষ্যৰে আমি সংগঠিতভাৱে কাম কৰি আছোঁ।”

বিৰোধী দলে নিৰ্বাচনৰ বাবে নিজকে সাজু কৰিব নোৱাৰাৰ সময়তে মুখ্যমন্ত্ৰীয়ে কয় যে বিজেপিক লক্ষ্যত উপনীত হ’বলৈ লিলি হোটেলত বৈঠক পতাৰ প্ৰয়োজন নাই। কটাক্ষ কৰি তেওঁ কয়, “মোৰ টেনছন দূৰ কৰিবলৈ অখিল গগৈৰ ফেচবুক লাইভ চালেই যথেষ্ট। মই অখিল গগৈৰ এজন ‘বিগ ফেন’।”

কংগ্ৰেছৰ নিৰ্বাচনী ৰণকৌশলক কটাক্ষ কৰি মুখ্যমন্ত্ৰীয়ে কয়, “কংগ্ৰেছ দলে ২০২৬ বা ২০৩১ৰ বাবে নহয়, ২০৩৬ৰ বাবেহে প্ৰস্তুতি চলাইছে। ২০২৬ আৰু ২০৩১ত বিজেপি মিত্ৰজোঁটক ৱাকঅভাৰ দিয়েই কংগ্ৰেছ সন্তুষ্ট। কিয়নো কংগ্ৰেছৰ ভোটবেংক এতিয়া কেৱল সংখ্যালঘু এলেকাত সীমাবদ্ধ।”

বিজেপি মিত্ৰজোঁটৰ ভিতৰত মিত্ৰতা সন্দৰ্ভতো মুখ্যমন্ত্ৰীয়ে কয় যে আলোচনা অব্যাহত আছে। “মিত্ৰতাৰ বাবে আমাক লিলি হোটেলৰ প্ৰয়োজন নাই। অগপৰ লগতে সকলো মিত্ৰদলৰ সৈতে মই ফোনতেই আলোচনা কৰোঁ। BPF আৰু UPPLক কেনেকৈ একেলগে লৈ নিৰ্বাচনত অৱতীৰ্ণ হ’ব পাৰি, সেই বিষয়েও আলোচনা চলি আছে,” বুলি কয় মুখ্যমন্ত্ৰীয়ে।

ইফালে, অখিল গগৈয়ে সামাজিক মাধ্যমত জুবিন গাৰ্গ হত্যাকাণ্ডৰ চাৰ্জশ্বীটক লৈ মন্তব্য দিয়াৰ পিছতে প্ৰতিক্ৰিয়া ব্যক্ত কৰি মুখ্যমন্ত্ৰীয়ে কয়— “অখিল গগৈ এতিয়া নিজেই উকীল আৰু নিজেই ন্যায়াধীশ। সেয়েহে তেওঁ সামাজিক মাধ্যমত বাম উকীল হৈ উঠিছে।”

অখিল গগৈক কটাক্ষ কৰি মুখ্যমন্ত্ৰীয়ে তেওঁক “সামাজিক মাধ্যমৰ কৌতুক চৰিত্ৰ” বুলিও আখ্যা দিয়ে।

ইফালে, মুখ্যমন্ত্ৰীয়ে ঘোষণা কৰে যে অহা ২৯ ডিচেম্বৰত কেন্দ্ৰীয় গৃহমন্ত্ৰী অসমলৈ আহিব। এই ভ্ৰমণকালতে গুৱাহাটীত আৰক্ষী আয়ুক্তৰ নতুন কাৰ্যালয় আৰু CCTV প্ৰকল্প উদ্বোধন কৰা হ’ব। লগতে ৫ হাজাৰ লোক একেলগে বহিব পৰা জ্যোতি-বিষ্ণু প্ৰেক্ষাগৃহো উদ্বোধন কৰিব গৃহমন্ত্ৰীয়ে।

ডিজিটেল ডেস্ক, ১৮ ডিচেম্বৰ

The post বিজেপিৰ লক্ষ্য ৫০ শতাংশতকৈও অধিক ভোট : মই অখিল গগৈৰ এজন ‘বিগ ফেন’ first appeared on নিয়মীয়া বাৰ্তা.