নিয়মীয়া বাৰ্তা, ২১ এপ্রিলঃ ক’ৰোনা ভাইৰাছক লৈ সমগ্র দেশৰ লগতে অসম তথা গুৱাহাটী মহানগৰীত চলি থকা লকডাউনৰ মাজতেই দেওবাৰে নিশা জালুকবাৰীত এক অঘটন ঘটে ৷ আমিনগাঁওস্থিত চৰকাৰী হাস্পতালত কর্মৰত প্রাঞ্জল দাস নামৰ এজন চতুর্থবর্গৰ কর্মচাৰী ৰহস্যজনকভাৱে সন্ধানহীন হোৱাক লৈ তীব্র চাঞ্চল্য সৃষ্টি হৈছে ৷ প্রাপ্ত খবৰ মতে, মাজনিশা শৰাইঘাট দলঙৰ ওপৰত কর্মচাৰীজনৰ এ এছ–০১ এ এক্স–৩৭৬৫ নম্বৰৰ বাইকখন উদ্ধাৰ হয় যদিও বাইকখনৰ গৰাকী তথা স্বাস্থ্যকর্মীজন ৰহস্যজনকভাৱে সন্ধানহীন হৈ আছে ৷ ঘটনাস্থলীত উপস্থিত হৈ আৰক্ষীয়ে বাইকখনৰ পৰা কর্মচাৰীজনৰ পৰিচয়–পত্র উদ্ধাৰ কৰি তদন্ত অব্যাহত ৰাখিছে ৷ আৰক্ষীয়ে ঘটনা সন্দর্ভত সবিশেষ তথ্য লাভ কৰিবলৈ সক্ষম হোৱা নাই যদিও একাংশ লোকে কর্মচাৰীজন ব্রহ্মপুত্রৰ পৰা জঁপিওৱাৰ সন্দেহ ব্যক্ত কৰে ৷ উল্লেখ্য যে সন্ধানহীন কর্মচাৰীজনৰ ঘৰ শুৱালকুছিৰ বংশৰত বুলি জানিব পৰা গৈছে ৷