নিয়মীয়া বাৰ্তা, ১৮ জুলাইঃ মাৰাত্মক ক’ৰোনাই সম্প্রতি গুৱাহাটী মহানগৰীৰ উপৰি পার্শ্বৱর্তী এলেকালৈ সম্প্রসাৰিত হোৱা পৰিলক্ষিত হৈছে৷ শেহতীয়াকৈ চন্দ্রপুৰ ৰাজহ চক্রৰ অন্তর্গত বিভিন্ন এলেকাত দ্রুতহাৰত ক’ৰোনা আক্রান্তৰ সংখ্যা প্রায় প্রতিদিনে বৃদ্ধি পাবলৈ লৈছে৷ বিগত তিনিটা দিনত বহুকেইজন লোকৰ শৰীৰত ক’ভিডৰ অৱস্থিতি ধৰা পৰাৰ পিছত আজি চাৰিজনৰ দেহত ক’ৰোনাৰ অৱস্থিতি ধৰা পৰে৷ আজি আক্রান্ত হোৱা চাৰিজনৰ ভিতৰত দুজন জোৱানো আছে৷ প্রাপ্ত তথ্য অনুসৰি, চন্দ্রপুৰ তাপবিদ্যুৎ প্রকল্পৰ আৱাসিক এলেকাত থকা সীমা সুৰক্ষা বলৰ জোৱান প্রত্যেক্ট ৰাণা আৰু বি এছ এফৰ জোৱান ৰাজেশ কুমাৰ চৌধুৰী আক্রান্ত হৈছে৷
জানিব পৰা মতে, ৰাজেশ নামৰ বি এছ এফৰ জোৱানজনক আজি স্বাস্থ্য বিভাগে চিকিৎসালয়ত ভর্তি কৰাৰ বিপৰীতে এছ এছ বিৰ জোৱানজনক বাতৰি লিখা পৰলৈ স্থানান্তৰ কৰা নাই সংশ্লিষ্ট বিভাগে৷ উল্লেখ্য যে এই দুয়োটা বিভাগৰ আৰু তিনিজন জোৱান ক্রমে যাদৱ নিখিল, ধর্মেশ্বৰ ৰাম আৰু অৰিঞ্জয় কুমাৰ ইতিমধ্যে চিকিৎসালয়ত চিকিৎসাধীন হৈ আছে৷ আনহাতে, আজি আক্রান্ত চাৰিজনৰ জোৱান দুজনৰ বাহিৰে বোন্দাত ৰোহি কুমাৰ শ্বাহ আৰু পানীখাইতী হাতীশিলাৰ শংকৰ লাল নামৰ দুজন আক্রান্ত হৈছে৷ তেওঁলোকক ইতিমধ্যে চিকিৎসালয়লৈ নিয়াৰ ব্যৱস্থা কৰাৰ লগতে বাসগৃহকেইটা কনটেইমেণ্ট জ’ন হিচাপে ঘোষণা কৰি ছীল কৰিছে প্রশাসনে৷ ইফালে, বৃহত্তৰ চন্দ্রপুৰত আক্রান্তৰ সংখ্যা বৃদ্ধি পাবলৈ লোৱাত আতংকিত হৈ পৰিছে অঞ্চলবাসী৷