বৰবাৰী চাৰিআলিত ই–ৰিক্সাচালক সন্থাৰ উত্তাল প্রতিবাদ

নিয়মীয়া বাৰ্তা ১২ নৱেনম্বৰঃ গুৱাহাটী মহানগৰীত যান–বাহন আইন উলংঘাৰে মেজিকচালকে দৌৰাত্ম্য অব্যাহত ৰাখিছে৷ মেজিকচালকৰ দৌৰাত্ম্যৰ বাবে মহানগৰীৰ বহুকেইটা পথত তীব্র যান–জঁটৰ সৃষ্টি হৈছে৷ মেজিকচালকৰ উপদ্রৱৰ বাবেই মহানগৰীৰ বিভিন্ন পথত চলাচল কৰা ই–ৰিক্সাচালকসকলে অসুবিধাৰ সন্মুখীন হ’বলগীয়া হৈছে৷ পৰিবহণ বিভাগৰ অনুমতিসাপেক্ষে মহানগৰীৰ বিভিন্ন পথত ই–ৰিক্সা চলাই নিবনুৱা যুৱক–যুৱতীসকলে পৰিয়াল পোহপাল দি আহিছে৷ পৰিবহণ বিভাগৰ অনুমতি থকা সত্ত্বেও ই–ৰিক্সাচালকসকলে মেজিকচালকসকলৰ পৰা বিভিন্ন সময়ত সমস্যাৰ সন্মুখীন হৈ আহিছে৷ মেজিকচালকসকলে য’তে–ত’তে পার্কিং কৰাৰ ফলত বহুকেইটা পথত তীব্র যান–জঁটৰ সৃষ্টি হৈ আহিছে৷ মেজিকচালকৰ দৌৰাত্ম্যৰ বাবেই ই–ৰিক্সাচালকসকলে বিভিন্ন সমস্যাৰ সন্মুখীন হ’বলগীয়া হৈছে৷ ই–ৰিক্সাচালকসকলে সন্মুখীন হোৱা অসুবিধাসমূহ শীঘ্রে সমাধান কৰাৰ দাবীত আজি বৰবাৰী চাৰিআলিত প্রতিবাদ সাব্যস্ত কৰে৷ শতাধিক ই–ৰিক্সাচালকে হাতে হাতে বেনাৰ–পোষ্টাৰ লৈ বৰবাৰীত এক উত্তাল পৰিস্থিতিৰ সৃষ্টি কৰে৷ ই–ৰিক্সাচালকসকলে মেজিকচালকসকলৰ বিৰুদ্ধে অবৈধভাৱে য’তে–ত’তে পার্কিং কৰাৰ অভিযোগ উত্থাপন কৰে৷ মেজিকচালকসকলে অবৈধভাৱে কৰা পার্কিঙৰ বাবে মহানগৰীৰ বিভিন্ন পথত তীব্র যান–জঁটৰ সৃষ্টি হোৱা বুলি অভিযোগ তুলি ই–ৰিক্সাচালকসকলে পৰিবহণ বিভাগ আৰু যান–বাহন আৰক্ষীক শীঘ্রে এইক্ষেত্রত ব্যৱস্থা গ্রহণৰ দাবী উত্থাপন কৰে৷ অন্যথা পৰৱর্তী সময়ত ইয়াতকৈও ভয়াৱহ আন্দোলনৰ কার্যসূচী গ্রহণ কৰাৰ হুংকাৰ দিয়ে৷