নিয়মীয়া বাৰ্তা, ১২ ফেব্ৰুৱাৰীঃ গুৱাহাটী পৌৰ নিগম কর্তৃপক্ষৰ চূড়ান্ত দায়িত্বজ্ঞানহীনতাৰ বাবেই প্রহসনত পৰিণত হৈছে স্বচ্ছ ভাৰত আঁচনি৷ উত্তৰ–পূবৰ দুৱাৰমুখস্বৰূপ গুৱাহাটী মহানগৰীখন পৰিষ্কাৰ পৰিচ্ছন্ন কৰি ৰখাৰ লগতে সৌন্দর্যবর্ধনৰ বাবে বিভিন্ন আঁচনি গ্রহণ কৰা হৈছে৷ কিন্তু পৌৰ নিগম কর্তৃপক্ষৰ অদূৰদর্শিতা, দায়িত্বজ্ঞানহীনতাত মহানগৰীৰ পথ–উপপথত পূতিগন্ধময় আৱর্জনাৰে ভৰি পৰিছে৷ ৰাজধানী চহৰ গুৱাহাটীৰ ৰাজপথত দৃষ্টিকটুভাৱে পৰি থকা আৱর্জনাই পৰিৱেশ প্রদূষিত কৰাৰ লগতে মহানগৰীৰ সৌন্দর্য ম্লান কৰিছে৷
মহানগৰীৰ ৩১টা ৱার্ডত ঘৰে ঘৰে গৈ আৱর্জনা নিষ্কাশনৰ বাবে ৯০টা এনজি’ক দায়িত্ব অর্পণ কৰিছিল পৌৰ নিগম কর্তৃপক্ষই৷ কিন্তু পৌৰ নিগমৰ প্রশাসনিক দুর্বলতাৰ বাবেই এনজি’সমূহে প্রতিদিনে ঘৰে ঘৰে গৈ আৱর্জনা সংগ্রহৰ পৰা বিৰত আছে৷ ইয়াৰ উপৰি গুৱাহাটী মহানগৰীখন পৰিষ্কাৰ–পৰিচ্ছন্ন কৰি ৰাখিবৰ বাবে পৌৰ নিগম কর্তৃপক্ষই ফ্লায়িং স্কোৱাড গঠন কৰিছিল৷ ফ্লায়িং স্কোৱাডে মহানগৰীৰ মূল পথ আৰু উপপথত পৰি থকা আৱর্জনা সংগ্রহ কৰাৰ কথা আছিল৷
ফ্লায়িং স্কোৱাডে প্রথম কেইদিনমান ৰাজপথৰ আৱর্জনা সংগ্রহ কৰিছিল৷ কিন্তু এতিয়া অস্তিত্বহীন ফ্লায়িং স্কোৱাড৷ পৌৰ নিগম কর্তৃপক্ষই আৱর্জনা সংগ্রহৰ বাবে গঠন কৰা ফ্লায়িং স্কোৱাড সন্দর্ভত সদুত্তৰ দিব পৰা নাই৷ এক কথাত পৌৰ নিগম কর্তৃপক্ষৰ প্রশাসনিক দুর্বলতাৰ বাবেই পূতিগন্ধময় আৱর্জনাৰে মহানগৰীৰ ৰাজপথ আৰু উপপথসমূহ ভৰি থকা পৰিলক্ষিত হৈছে৷ গুৱাহাটীৰ পথ–উপপথত পৰি থকা আৱর্জনা সংগ্রহৰ কৰি মহানগৰীখন পৰিষ্কাৰ–পৰিচ্ছন্ন কৰাৰ বাবে পৌৰ নিগম কর্তৃপক্ষই কি ব্যৱস্থা গ্রহণ কৰে সেয়া লক্ষণীয় হ’ব৷