নিয়মীয়া বাৰ্তা ১২ অক্টোবৰঃ ক’ভিড–১৯ৰ নীতি–নির্দেশনা মানি সুদীর্ঘ সাত মাহৰ অন্তত আজিৰে পৰা ভক্তৰ বাবে খোলা হ’ল কামাখ্যা মন্দিৰৰ প্রৱেশদ্বাৰ৷ মা কামাখ্যা দর্শনৰ বাবে দেওবাৰে পুৱা ৮ বজাত দেৱালয় পৰিচালনা সমিতিয়ে মন্দিৰৰ প্রৱেশদ্বাৰ খুলি দিয়ে৷ ক’ভিড–১৯ৰ নির্দেশনা মানি ভক্তসকলে নার্ছাৰীত স্বাস্থ্য পৰীক্ষা কৰাৰ অন্তত মন্দিৰ দর্শন কৰে৷ কামাখ্যা মন্দিৰৰ দলৈ মোহিত শর্মাই জানিবলৈ দিয়া মতে, দেওবাৰে ২১১গৰাকী ভক্তই মন্দিৰ দর্শন কৰে৷ কামাখ্যাৰ নার্ছাৰীত স্বাস্থ্য বিভাগে স্থাপন কৰা শিবিৰত স্বাস্থ্য পৰীক্ষাৰ অন্তত এই ভক্তসকলে ক’ভিড প্রট’কল মানি মন্দিৰ দর্শন কৰে৷ অৱশ্যে কামাখ্যা মন্দিৰ পৰিচালনা সমিতিয়ে মন্দিৰৰ মূল দ্বাৰ বন্ধ ৰাখিছে৷ দুর্গাপূজাৰ পিছতহে মন্দিৰ পৰিচালনা সমিতিয়ে কামাখ্যাৰ মূল দ্বাৰ ভক্তৰ বাবে খোলাৰ ক্ষেত্রত সিদ্ধান্ত গ্রহণ কৰিব৷