নিয়মীয়া বাৰ্তা, ২২ আগষ্টঃ বিশ্বজুৰি আতংকৰ সৃষ্টি কৰা মাৰাত্মক ক’ভিড–১৯ ৰোগৰ সংক্রমণ ৰোধৰ বাবে যোৱা ২৪ মার্চৰ পৰা ৰাজ্যজুৰি জাৰি কৰা লকডাউনৰ বহু ইতিবাচক দিশ সম্প্রতি পোহৰলৈ আহিছে৷ বিশেষকৈ লকডাউনৰ বাবেই অসমৰ ৰাজপথত দুর্ঘটনাৰ সংখ্যা দ্রুতগতিত কমি যোৱা পৰিলক্ষিত হৈছে৷
এই সন্দর্ভত ৰাজ্যৰ জৰুৰী স্বাস্থ্যসেৱাৰ সৈতে জড়িত ‘জিভিকেইএমআৰআই ১০৮ জৰুৰী সেৱা’ৰ সূত্রই সদৰী কৰা অনুসৰি যোৱা ১ এপ্রিলৰ পৰা ৩১ জুলাই পর্যন্ত চাৰিটা মাহত পথ দুর্ঘটনাৰ সংখ্যা বিগত বর্ষতকৈ বহু হ্রাস পাইছে৷ পৰিসংখ্যা অনুসৰি যোৱা এপ্রিল মাহত সমগ্র ৰাজ্যখনত পথ দুর্ঘটনা সংঘটিত হৈছিল ১,০১১টা৷ ২০১৯ বর্ষৰ এপ্রিল মাহত সংঘটিত পথ দুর্ঘটনাৰ সংখ্যা আছিল ২,৪৮২টা৷
যোৱা মে’ মাহত সংঘটিত পথ দুর্ঘটনাৰ সংখ্যা আছিল ১,২৭০টা আৰু বিগত বর্ষৰ মে’ মাহত সংঘটিত হৈছিল ২,৭৫০টা৷ চলিত বর্ষৰ জুন মাহত ১,২৬৬টা পথ দুর্ঘটনা সংঘটিত হোৱাৰ বিপৰীতে বিগত বর্ষৰ জুন মাহত ২,৩৭৭টা দুর্ঘটনা সংঘটিত হৈছিল৷ তেনেদৰে চলিত বর্ষৰ জুলাই মাহত ৯০২টা দুর্ঘটনাৰ বিপৰীতে বিগত বর্ষৰ জুলাই মাহত ১,৫৫২টা দুর্ঘটনা সংঘটিত হৈছিল৷
ইয়াৰ ভিতৰত যোৱা এপ্রিল মাহত কামৰূপ জিলাত সর্বাধিক ১০৬টা দুর্ঘটনা, নগাঁও জিলাত ৭৪টা আৰু বৰপেটা জিলাত ৬১টা দুর্ঘটনা সংঘটিত হয়৷ মে’ মাহত নগাঁও জিলাত সর্বাধিক ১২২টা, কামৰূপ জিলাত ১০৩টা আৰু বৰপেটা জিলাত ৮০টা পথ দুর্ঘটনা সংঘটিত হয়৷ জুন মাহত কামৰূপ জিলাত সর্বাধিক ১১৮টা, নগাঁও জিলাত ৯১টা আৰু শোণিতপুৰ জিলাত ৮৫টা দুর্ঘটনা সংঘটিত হয়৷
জুলাই মাহত শোণিতপুৰ জিলাত সর্বাধিক ৮৬টা দুর্ঘটনা সংঘটিত হয়৷ জিভিকেইএমআৰআইৰ পৰিসংখ্যা অনুসৰি বিগত বর্ষৰ তুলনাত যোৱা এপ্রিল মাহত ১৪৫.৫০ শতাংশ, মে’ মাহত ১১৬.৫৪ শতাংশ, জুন মাহত ৬৪.০৬ শতাংশ আৰু জুলাই মাহত ৭৭.০৩ শতাংশ দুর্ঘটনা হ্রাস পাইছে৷ একেদৰে ৰাজধানী চহৰ গুৱাহাটীতো যোৱা এপ্রিল মাহত ১২৩.৬৪ শতাংশ, মে’ মাহত ১২৯.৩১ শতাংশ, জুন মাহত ১০০ শতাংশ আৰু জুলাই মাহত ২৬০.১১ শতাংশ দুর্ঘটনাৰ সংখ্যা হ্রাস পাইছে৷
ইফালে অসম আৰক্ষীৰ সূত্রই সদৰী কৰা অনুসৰি ২০১৯ বর্ষত ৰাজ্যত ৮,২৪৮টা দুর্ঘটনা সংঘটিত হৈছিল৷ য’ত ২,৯৬৬জন লোক নিহত হোৱাৰ বিপৰীতে ৭,৩৭৫জন লোক আহত হৈছিল৷ লক ডাউন আৰম্ভ হোৱাৰ আগতে গড় হিচাপত ৰাজ্যত দৈনিক দুর্ঘটনাত ৮জনৰ মৃত্যু হোৱাৰ লগতে ২০জন আহত হৈছিল৷