নিয়মীয়া বাৰ্তা, ২০ এপ্ৰিলঃ বিশ্বজুৰি ক’ৰোনা ভাইৰাছ মহামাৰীৰ সংক্রমণে বিভীষিকাৰ সৃষ্টি কৰাৰ সময়তে বিশ্ব স্বাস্থ্য সংস্থাই আগন্তুক ৰমজান মাহত ইছলামধর্মী লোকসকলৰ বাবে এলানি নির্দেশনা জাৰি কৰিছে৷ আগন্তুক ২৪ এপ্রিলৰ পৰা আৰম্ভ হ’ব ইছলামধর্মী লোকসকলৰ পৱিত্র মাহ ৰমজান৷ ৰমজান মাহত মুছলমান লোকসকলক ক’ৰোনা মহামাৰীৰ পৰা পৰিত্রাণ পাবলৈ এলানি পদক্ষেপ গ্রহণ কৰাৰ আহ্বান জনাইছে৷ গোলকীয় স্বাস্থ্য সংস্থাটোৱে ইছলামধর্মী লোকসকলক সামাজিক তথা ধর্মীয় সমাৱেশৰ পৰা আঁতৰি থাকিবলৈ নির্দেশ দিছে৷ ক’ৰোনা ভাইৰাছ মহামাৰীৰ সংক্রমণৰ পৰা পৰিত্রাণ পাবলৈ হ’লে সামাজিক দূৰত্ব ৰক্ষা কৰি চলিব লাগিব বুলিও ঘোষণা কৰিছে ৰাষ্ট্রসংঘৰ সংস্থাটোৱে৷ স্মর্তব্য যে মাৰাত্মক ক’ৰোনা ভাইৰাছত বিশ্বজুৰি ২৩ লক্ষাধিক লোক আক্রান্ত হোৱাৰ উপৰি ১ লাখ ৬০ হাজাৰৰো অধিকে প্রাণ হেৰুৱাইছে৷ পবিত্র ৰমজান মাহত ইছলামধর্মী লোকসকলক মছজিদৰ নামাজৰ পৰাও আঁতৰি থাকিবলৈ অনুৰোধ জনাইছে বিশ্ব স্বাস্থ্য সংস্থাই৷