নিয়মীয়া বার্তা, ২৭মেঃ মাৰাত্মক ক’ৰোনা ভাইৰাছ মহামাৰী বা ক’ভিড–১৯ৰ সংক্রমণে ৰাছিয়াত ভয়াৱহ ৰূপ ধাৰণ কৰিছে যদিও দেশখনে ইয়াৰ অস্ত্র নির্মাণ কার্যসূচী অব্যাহত ৰাখিছে৷ শেহতীয়াকৈ পৰমাণু অস্ত্র পৰিবাহী অত্যাধুনিক বোমাৰু বিমান নির্মাণ কার্যসূচী হাতত লৈছে ৰাছিয়াই৷ দ্রুতবেগী এই কৌশলপূর্ণ শত্রুৰ চকুত ধূলি দিব পৰা যুদ্ধবিমান ৰাছিয়াই নির্মাণ কৰি আছে পার্ছপেক্টিভ এভিয়েচন কমপ্লেক্স ফৰ লং ৰেঞ্জ এভিয়েছন (পিএকে ডিএ) কার্যসূচীৰ অধীনত৷ উল্লেখনীয় যে ছুখয় এছইউ–৫৭ ছুপাৰছ’নিক যুদ্ধবিমানৰ পাছত এয়া হ’ব ৰাছিয়াৰ বাবে অত্যাধুনিক যুদ্ধবিমান৷ এই বিমান ব্যৱহাৰ কৰা হ’ব ৰাছিয়াৰ টিইউ–২২, টিইউ–৯৫ আৰু টিইউ–১৬০ যুদ্ধবিমানৰ স্থানত৷ লক্ষণীয়ভাৱে অতি জটিল পৰিস্থিতিৰ মাজতো ৰাছিয়াই ইয়াৰ সামৰিক আধুনিকীকৰণৰ বিষয়টোক বিশেষ গুৰুত্ব প্রদান কৰি আহিছে৷ শত্রুৰ চকুত ধূলি দিব পৰা এই যুদ্ধবিমান মুহূর্তৰ ভিতৰতে দ্রুত গতিৰে পৰমাণু অস্ত্র লক্ষ্য স্থানত নিক্ষেপ কৰি উভতি আহিবলৈ সক্ষম হ’ব বুলি ৰুছ সংবাদ সংস্থা ‘টাছ’এ এক প্রতিবেদনত প্রকাশ কৰিছে৷ দেশখনৰ সামৰিক উদ্যোগৰ এক জ্যেষ্ঠ বিষয়াৰ বক্তব্যৰ উদ্ধৃতি দি টাছে উল্লেখ কৰা অনুসৰি অত্যাধুনিক এই যুদ্ধ বিমানৰ নির্মাণ দুটা বছৰৰ ভিতৰতে সম্পূর্ণ কৰিব ৰাছিয়াই৷