নিয়মীয়া বাৰ্তা, ২৭ ফেব্ৰুৱাৰীঃ বিশ্বজুৰি ক’ভিড–১৯ত প্রাণ হেৰুওৱা লোকৰ সংখ্যাই ২৫ লাখ অতিক্রম কৰিছে৷ জনছ হ’পকিনছ বিশ্ববিদ্যালয়ৰ চেণ্টাৰ ফৰ ছিষ্টেমছ ছায়েঞ্চ এণ্ড ইঞ্জিনীয়াৰিঙৰ তৰফৰ পৰা আজি সদৰী কৰা হৈছে এই তথ্য৷ সংবাদ সংস্থা ঝিনহুৱাৰ প্রতিবেদন অনুসৰি আমেৰিকাৰ স্থানীয় সময় অনুসৰি ১২.২৪ বজাত বিশ্বত ক’ভিড–১৯ মহামাৰীত প্রাণ হেৰুওৱা লোকৰ সংখ্যা হৈছে ২৫,০১,৬২৬জন৷ আমেৰিকাত এই মহামাৰীত প্রাণ হেৰুৱাইছে ৫,০৬,৫০০ লোকে৷ আমেৰিকাৰ পিছতে ব্রাজিলত প্রাণ হেৰুৱাইছে ২,৪৯,৯৫৭গৰাকীয়ে৷
লক্ষণীয়ভাৱে এই তালিকাত ভাৰতক অতিক্রম কৰি তৃতীয় স্থানত উপনীত হৈছে মেক্সিকো৷ মেক্সিকোত ক’ভিড–১৯ত এতিয়ালৈকে প্রাণ হেৰুৱাইছে ১,৮২,৮১৫গৰাকী লোকে৷ ৮০ হাজাৰতকৈ অধিক লোকে প্রাণ হেৰুওৱা দেশকেইখনৰ ভিতৰত আছে ভাৰত, ব্রিটেইন, ইটালী, ফ্রান্স আৰু ৰাছিয়া৷ যোৱা ২৮ ছেপ্ঢেম্বৰত বিশ্বত ক’ভিড–১৯ত প্রাণ হেৰুওৱা লোকৰ সংখ্যাই ১০ লাখ অতিক্রম কৰিছিল৷ ১৫ জানুৱাৰীত এই সংখ্যা দুগুণলৈ বৃদ্ধি হয়৷ ১৫ জানুৱাৰীৰ পৰা ফেব্রুৱাৰীৰ ২৬ তাৰিখলৈকে ৫ লক্ষাধিক লোকে প্রাণ হেৰুৱাইছে৷ অর্থাৎ বিশ্বৰ বিভিন্ন দেশত ক’ভিড মহামাৰীৰ সংহাৰ এতিয়াও অপৰিৱর্তিত অৱস্থাতে আছে৷ অৱশ্যে কেইখনমান দেশত পূর্বৰ তুলনাত সংক্রমণৰ হাৰ হ্রাস পাইছে৷