নিয়মীয়া বাৰ্তা, ২১ এপ্রিলঃ ক’ভিড–১৯ বা ক’ৰোনা ভাইৰাছ মহামাৰীৰ বাবে বন্ধ হৈ থকা বিশ্বৰ ভিতৰতে সর্ববৃহৎ মনোৰঞ্জন সংস্থা ৱাল্ট ডিজনীয়ে চলিত সপ্তাহৰ পৰা লক্ষাধিক কর্মচাৰীক বেতন নিদিয়ে বুলি ঘোষণা কৰিছে ৷ ক’ৰোনা ভাইৰাছ মহামাৰীৰ বাবেই গভীৰ সংকটৰ সন্মুখীন হৈছে বিশ্বৰ পর্যটন তথা মনোৰঞ্জন ক্ষেত্রসমূহ ৷ ৱাল্ট ডিজনীয়ে ইউৰোপ, আমেৰিকা আৰু এছিয়াত চলাই আছে মনোৰঞ্জন পার্ক আৰু হোটেল ৷ কিন্তু ক’ৰোনা মহামাৰীৰ বাবেই সংস্থাটোৰ সকলো পার্ক তথা হোটেল বন্ধ হৈ আছে ৷ গতিকে সংস্থাটোৱে ইয়াৰ প্রায় ৫০ শতাংশ কর্মচাৰীৰ বেতন বন্ধ কৰি এমাহত ৫০০ নিযুত ডলাৰ সঞ্চয় কৰাৰ সিদ্ধান্ত লৈছে ৷ ফাইনেন্সিয়েল টাইম্ছে এক প্রতিবেদনত এই তথ্য সদৰী কৰাৰ লগে লগে সংস্থাটোৰ কর্মচাৰীসকলৰ মাজত হাহাকাৰ পৰিস্থিতিৰ সৃষ্টি হৈছে ৷ স্মর্তব্য যে ৱাল্ট ডিজনীয়ে ২০১৯ চনৰ অন্তিম তিনিটা মাহত পার্ক, হোটেল আৰু ইয়াৰ দ্বাৰা উৎপাদিত বিভিন্ন সামগ্রীৰ পৰা উপার্জন কৰিছিল ১৪০ কোটি ডলাৰ৷ কিন্তু ক’ৰোনা মহামাৰীয়ে বিভিন্ন দেশলৈ বিপর্যয় কঢ়িয়াই অনাৰ লগে লগে বিশ্বৰ সর্ববৃহৎ মনোৰঞ্জন সংস্থাটো বৃহৎ ক্ষতিৰ সন্মুখীন হৈছে ৷ এতিয়া সংস্থাটোৰ এই ক্ষতিৰ বাবে বিপদৰ সন্মুখীন হৈছে ইয়াৰ কর্মচাৰীসকল ৷