নিয়মীয়া বাৰ্তা, ১৩ নবেম্বৰঃ ধর্মীয় সংখ্যালঘু লোকসকলৰ বিৰুদ্ধে অকথ্য নির্যাতন চলাই থকা পাকিস্তানে আন্তর্জাতিক মঞ্চত বিভিন্ন সময়ত সমালোচিত হোৱাৰ পিছত এইবাৰ ব্রিটিছ চৰকাৰৰ কঠোৰ সমালোচনাৰ সন্মুখীন হৈছে৷ ব্রিটিছ প্রধানমন্ত্রী বৰিছ জনছনে কালি সংসদৰ অধিৱেশনত উল্লেখ কৰিছে যে পাকিস্তানে দেশখনৰ নাগৰিকসকলক মৌলিক অধিকাৰ প্রদান কৰিব লাগিব৷
দেশখনৰ নাগৰিকসকলৰ মৌলিক অধিকাৰ নিশ্চিত কৰা বুলি পাকিস্তানে আন্তর্জাতিক সম্প্রদায়ক পতিয়ন যাব পৰাকৈ তথ্য দিয়া উচিত বুলি উল্লেখ কৰিছে জনছনে৷ সংসদত ইমৰান আহমাদ খান নামৰ প্রতিনিধি এগৰাকীয়ে পাকিস্তানত চৰকাৰে চলাই থকা সংখ্যালঘুবিৰোধী নির্যাতন সন্দর্ভত ব্রিটেইনৰ স্থিতি কি সন্দর্ভত উত্থাপিত এক প্রশ্ণৰ উত্তৰত এই কথা উল্লেখ কৰে জনছনে৷ পাকিস্তানত সঘনে মানৱ অধিকাৰ উলংঘন হোৱা বুলি কেইবাটাও আন্তর্জাতিক সংস্থাই অভিযোগ কৰি আহিছে৷
দেশখনত সংখ্যালঘু লোকৰ বিৰুদ্ধে বলপূর্বক ধর্মান্তৰ, অপহৰণ, সংখ্যালঘু সম্প্রদায়ৰ যুৱতীক অপহৰণ কৰি বিবাহ সম্পন্ন কৰা আদি বিভিন্ন অভিযোগ উত্থাপন হৈ আহিছে৷ এই পৰিপ্রেক্ষিতত ব্রিটিছ প্রধানমন্ত্রীগৰাকীয় পাকিস্তানত নাগৰিকসকলৰ মৌলিক অধিকাৰ সুৰক্ষিত হৈছে নে নাই তাৰ তথ্য বিচাৰিছে৷