নিয়মীয়া বাৰ্তা, ১৩ নবেম্বৰঃ আমেৰিকাৰ ৰাষ্ট্রপতি নির্বাচনত পৰাজিত হৈও পৰাজয় স্বীকাৰ কৰিবলৈ অস্বীকাৰ কৰা ড’নাল্ড ট্রাম্পৰ সৈতে পত্নী মেলানিয়াই বিবাহ বিচ্ছেদ ঘটাবলৈ সাজু হোৱা বুলি একাংশ সংবাদ মাধ্যমে প্রচাৰ কৰিছে৷ শেহতীয়াকৈ এগৰাকী আইনী বিশেষজ্ঞই ঘোষণা কৰিছে যে ট্রাম্পৰ সৈতে বিবাহ বিচ্ছেদ ঘটালে মেলানিয়াই লাভ কৰিব ৬৮ নিযুত ডলাৰ৷
স্মর্তব্য যে মেলানিয়া আৰু ড’নাল্ড ট্রাম্প ১৫ বছৰ পূর্বে বিবাহপাশত আবদ্ধ হৈছিল৷ ট্রাম্প আৰু মেলানিয়াৰ একমাত্র সন্তান হৈছে বেৰণ ট্রাম্প৷ শেহতীয়াকৈ নির্বাচনত পৰাজিত হোৱা ট্রাম্পৰ সৈতে মেলানিয়াৰ সম্পর্কৰ ব্যৱধান বৃদ্ধি পোৱা বুলি বিভিন্ন মহলে প্রচাৰ চলাইছে৷
আনকি ট্রাম্পৰে বিবাহ বিচ্ছেদ ঘটাবলৈ মেলানিয়া সাজু হোৱা বুলিও একাংশ সংবাদ মাধ্যমত সদৰী কৰিছে৷ হোৱাইট হাউছৰ বিষয়ববীয়া আমৰ’ছা মেনিগাল্ট নিউমানে সদৰী কৰা অনুসৰি মেলানিয়াই এতিয়া প্রতিটো মিনিট এক অনিশ্চয়তাত কটাইছে৷ হয়তো আমেৰিকাৰ ফার্ষ্ট লেডীগৰাকীয়ে শীঘ্রে বিবাহ বিচ্ছেদ ঘটাব পাৰে বুলিও সদৰী কৰিছে নিউমানে৷