নিয়মীয়া বাৰ্তা ২১ ডিচেম্বৰঃ আফ্রিকান ৰাষ্ট্র নাইজেৰিয়াৰ উত্তৰ–পশ্চিম প্রান্তৰ প্রদেশ কাটছিনাৰ পৰা অপহৰণ কৰা কেইবাশ স্কুলীয়া শিক্ষার্থীৰ ৪২৮জনক তিনি দিনৰ ভিতৰত মুক্ত কৰা হৈছে৷ উল্লেখনীয় যে এখন বর্ডিং স্কুলৰ পৰা এই শিক্ষার্থীসকলক অপহৰণ কৰিছিল ইছলামিষ্ট জেহাদী সংগঠন বকো হাৰামে৷ কাটছিনা প্রদেশৰ প্রশাসনে দুদিন পূর্বে সংবাদ সংস্থা বিবিচিক জনাইছে এই কথা৷ বকো হাৰামৰ কবলৰ পৰা মুক্ত হোৱা শিক্ষার্থীসকল সুকলমে থকা বুলিও প্রশাসনে এক বিবৃতিত সদৰী কৰিছে৷ ইফালে, আন শতাধিক শিক্ষার্থী বকো হাৰামৰ জিম্মাত থকা বুলি দেশখনৰ সংবাদ মাধ্যমে প্রকাশ কৰিছে৷
বকো হাৰামে মুক্তি দিয়া শিক্ষার্থীসকলৰ আটাইবোৰেই কিশোৰ বুলি বিবিচিৰ প্রতিবেদনত প্রকাশ পাইছে৷ লক্ষণীয়ভাৱে সন্ত্রাসবাদী সংগঠনটোৱে মুক্তি দিয়া শিক্ষার্থীসকলৰ এক ভিডি’ মুকলি কৰি দিছে সংবাদ মাধ্যমত৷ কাটছিনা প্রশাসনৰ মুখপাত্র এগৰাকীয়ে উল্লেখ কৰা অনুসৰি বকো হাৰামৰ পৰা মুক্ত হোৱাৰ পিছতে কিশোৰ শিক্ষার্থীসকলক ৰাজধানী চহৰলৈ প্রেৰণ কৰা হৈছে৷ ইয়াতেই পৰিয়ালৰ সৈতে মিলিত হোৱাৰ সুযোগ দিয়া হৈছে শিক্ষার্থীসকলক৷
স্মর্তব্য যে জেহাদী সংগঠন বকো হাৰামে নাইজেৰিয়াত পাশ্চাত্য শিক্ষাৰ বিৰোধ কৰি আহিছে৷ ইয়াৰ পূর্বে দেশখনৰ চিব’ক চহৰৰ এখন আৱাসিক বিদ্যালয়ৰ পৰা একেলগে কেইবাশ ছাত্রীক অপহৰণ কৰিছিল কুখ্যাত জেহাদী সংগঠনটোৱে৷ আনকি দীর্ঘদিন ধৰি এই ছাত্রীসকলক জেহাদী সংগঠনটোৱে পণবন্দী কৰি ৰাখি অকথ্য নির্যাতন চলাইছিল৷ এই ঘটনাক কেন্দ্র কৰি বিশ্বজুৰি সৃষ্টি হৈছিল প্রতিক্রিয়া৷ আন্তর্জাতিক মানৱ অধিকাৰ সংগঠনসমূহে বকো হাৰামৰ বিৰুদ্ধে কঠোৰ ব্যৱস্থা গ্রহণৰ দাবীও জনাইছিল৷