নিয়মীয়া বাৰ্তা, ২৯ আগষ্টঃ স্বাস্থ্যজনিত কাৰণত জাপানৰ ইতিহাসত সর্বাধিক সময় ধৰি শাসনৰ গাদীত অধিষ্ঠিত হৈ থকা প্রধানমন্ত্রী শ্বিনজো আবেই শুকুৰবাৰে আনুষ্ঠানিকভাৱে পদত্যাগ কৰা বুলি ঘোষণা কৰিছে৷
বিশ্বৰ তৃতীয় বৃহৎ অর্থনীতি দেশ জাপানৰ প্রধানমন্ত্রী হিচাপে কার্যকাল ২০২১ চনৰ ছেপ্টেম্বৰত সামৰণি পৰিবলগীয়া আছিল যদিও স্বাস্থ্যজনিত কাৰণত প্রধানমন্ত্রী আবেই পদত্যাগ কৰে৷ এক সংবাদ মেলত প্রধানমন্ত্রী আবেই কয়, ‘যদি মই জনতাৰ বাবে শ্রেষ্ঠ সিদ্ধান্ত ল’ব নোৱাৰোঁ গতিকে মই প্রধানমন্ত্রী হৈ থাকিব নোৱাৰোঁ৷ মই পদবীৰ পৰা পদত্যাগ কৰাৰ সিদ্ধান্ত লৈছোঁ৷’
উল্লেখ্য যে এসপ্তাহৰ ভিতৰতে প্রধানমন্ত্রী আবেই দুদিন চিকিৎসালয়ত স্বাস্থ্য পৰীক্ষা কৰিবলৈ অহাৰ বাতৰিয়ে দেশবাসীৰ মাজত উদ্বেগজনক পৰিৱেশ এটাৰ সৃষ্টি কৰাৰ সময়তে প্রধানমন্ত্রীগৰাকীয়্ এই পদত্যাগৰ সিদ্ধান্ত ৰাজহুৱা কৰিলে৷ শাসকীয় দল লিবাৰেল ডেম’ক্রেটিক পার্টীয়ে দুই–তিনি সপ্তাহৰ ভিতৰত জাপানৰ পৰৱর্তী প্রধানমন্ত্রী সংসদত আনুষ্ঠানিকভাৱে নির্বাচন কৰিব৷ অৱশ্যে এই প্রধানমন্ত্রীগৰাকীয় আবেৰ বাকী ৰোৱা কালছোৱাহে শাসন কৰিব৷