নিয়মীয়া বাৰ্তা, ১৮ জানুৱাৰীঃ বিশ্বজুৰি অস্থিৰতা আৰু সংঘর্ষৰ ঘটনা বৃদ্ধি পোৱাৰ সময়তে এক আন্তর্জাতিক আর্থ–সামাজিক তথা ৰাজনৈতিক বিশ্লেষক সংস্থাই চলোৱা অধ্যয়নত চলিত বর্ষটো অধিক ভয়াৱহ হ’ব বুলি সতর্কবাণী কৰা হৈছে ৷ ভাৰিস্ক মেপ্লেক্রফ্ট নামৰ সংস্থাটোৰ গৱেষণা অনুসৰি, বিগত বর্ষটোত ৪৭খন দেশত গৃহযুদ্ধ তথা অস্থিৰতাৰ ঘটনাই পৰিস্থিতি উত্তাল কৰি তুলিছিল ৷ কিন্তু ২০২০ বর্ষটোত এনে অস্থিৰ দেশৰ সংখ্যা হৈ পৰিব ৭৫খন ৷ বিশ্লেষক সংস্থাটোৰ প্রতিবেদন অনুসৰি, হংকং আৰু চিলি হৈ পৰিব চলিত বর্ষটোত আটাইতকৈ বিপজ্জনক স্থান ৷ অভাৱনীয় প্রতিবাদ আৰু বিক্ষোভ হংকঙত বহু লোকৰ প্রাণহানিৰ কাৰণ হৈ পৰিব পাৰে ৷ সেইদৰে ভেনিজুৱেলা, ইৰান আৰু লিবিয়া হৈ পৰিব গণবিক্ষোভৰ উর্বৰ স্থলী ৷ এই দেশসমূহত জনতাৰ বিক্ষোভে সৃষ্টি কৰিব অশান্ত পৰিস্থিতি৷ সংস্থাটোৰ গৱেষণা অনুসৰি, পৃথিৱীৰ এক চতুর্থাংশ অশান্তজর্জৰ অঞ্চল হিচাপে চিহ্ণিত হ’ব বর্ষটোত৷ নাইজেৰিয়া, ছুডান, হাইটি, লেবানন আদি দেশত বিগত বর্ষত সংঘটিত সংঘর্ষ আৰু অস্থিৰতা চলিত বর্ষটোতো অব্যাহত থাকিব ৷ তথ্য অনুসৰি, লিবিয়া, গিনি, পেলেষ্টাইন, ইথি’পিয়া, বলিভিয়া আদি দেশত চলিত বর্ষত বিক্ষোভ আৰু প্রতিবাদে সকলো ধৰণৰ উন্নয়ন তথা প্রগতিত সৃষ্টি কৰিব হেঙাৰ ৷ ইয়াৰ উপৰি প্রতিবাদকাৰীৰ বাবে য়েমেন হৈ পৰিব পাৰে অতি ভয়াৱহ দেশ৷ সংস্থাটোৰ বিশ্লেষণ অনুসৰি, প্রতিবাদকাৰীৰ বাবে বধ্যভূমি হিচাপে চিহ্ণিত হৈ আছে উত্তৰ কোৰিয়া ৷