জম্মুৰ সীমান্তত ৰহস্যজনক ২০ মিটাৰৰ সুৰংগ

নিয়মীয়া বাৰ্তা, ৩০ আগষ্টঃ জম্মুৰ ভাৰত–পাকিস্তান সীমান্তৰ কাঁটা তাঁৰৰ বেৰৰ সমীপত এটা ২০ মিটাৰৰ ৰহস্যজনক সুৰংগৰ সন্ধান লাভ কৰিছে সীমান্ত সুৰক্ষা বাহিনীয়ে৷ বিএছএফে জম্মুৰ ছাম্বা ছেক্টৰত পেট্রলিঙৰ সময়ত ভাৰতীয় ভূমিতেই থকা সুৰংগটোৰ সন্ধান পোৱাৰ পিছতেই অভিযান তীব্রতৰ কৰি তুলিছে৷

সন্ত্রাসবাদী আৰু নিচাযুক্ত ঔষধৰ সৰবৰাহকাৰীয়ে এই সুৰংগ ব্যৱহাৰ কৰি আহিছে বুলি প্রাৰম্ভিক অনুসন্ধানত বিএছএফে ধাৰণা কৰিছে৷ বিএছএফৰ সঞ্চালকপ্রধান ৰাকেশ আস্থানাই এই সুৰংগটো সন্দর্ভত শীঘ্রেই অনুসন্ধান চলাই বিতং তথ্য সংগ্রহ কৰিবলৈ উক্ত স্থানৰ দায়িত্বত থকা কমাণ্ডাৰক দায়িত্ব দিছে৷ বিএছএফে প্রকাশ কৰা মতে, সীমান্তৰ কাঁটা তাঁৰৰ ভাৰতীয় ভূমিৰ পৰা মাত্র ৫০ মিটাৰ নিলগত এই ২০ মিটাৰৰ ৰহস্যজনক সুৰংগটো আছে৷

সুৰংগটোৰ মুখত নিৰীক্ষণ কৰাত বিএছএফে প্লাষ্টিকৰ বেগত বালি অর্থাৎ বালিৰ বেগ উদ্ধাৰ কৰে, য’ত পাকিস্তানৰ চিহ্ণ অংকিত হৈ আছে৷ উদ্ধাৰ কৰা ১০টা প্লাষ্টিকৰ বেগত কৰাচী আৰু চকৰগড় বুলি লিখা আছে৷ বেগটোৰ স্থিতিক লৈ বিএছএফে এই কথা নিশ্চিত হৈছে যে এই নির্মাণ বেছিদিনৰ নহয়৷ ইতিমধ্যে এই সুৰংগৰ সন্ধান লাভ কৰা স্থানত উপস্থিত হৈছে বিএছএফৰ জম্মুৰ ইন্সপেক্টৰ জেনেৰেল এনএছ জামৱাল৷

সুৰংগটোৰ সন্ধান পোৱাৰ পিছতেই বিএছএফে আর্থকাটাৰেৰে সুৰংগটো খান্দি এই নির্মাণ কিমান দূৰলৈ আছে, তাক নিৰীক্ষণ কৰাত সুৰংগটো ২০ মিটাৰৰ হ’ব বুলি প্রকাশ কৰিছে৷ তেনেদৰে সুৰংগটোৰ গভীৰতা প্রায় ২৫ ফুট৷ সুৰংগটো চিনাক্ত কৰাৰ পিছতেই উদ্বিগ্ণ বিএছএফে সমগ্র অঞ্চলটোত অভিযান আৰম্ভ কৰিছে৷ এইটোৰ উপৰি সীমান্তৰ কাঁটা তাঁৰৰ বেৰত আন সুৰংগৰ সন্ধান কৰি আছে বিএছএফে৷

উল্লেখ্য যে ইয়াৰ পূর্বেও জুন মাহত জম্মুত বিএছএফে এনেধৰণৰ সুৰংগ এটাৰ সন্ধান লাভ কৰিছিল৷ পাকিস্তানী সন্ত্রাসবাদীয়ে আত্মগোপন কৰাৰ লগতে অস্ত্র–শস্ত্র মজুত ৰখাৰ বাবে এনে সুৰংগ নির্মাণ কৰাৰ সম্ভাৱনা নথকা নহয় বুলিও বিএছএফে প্রকাশ কৰিছে৷