২০২১ত জন্মা শিশুৱে দেখিব অধিক বনজুই–বান

নিয়মীয়া বাৰ্তা ৩০ ছেপ্টেম্বৰঃ ২০২১ চনত জন্মা শিশুৱে তেওঁৰ ককাকতকৈ অধিক প্রাকৃতিক দুর্যোগ দেখিবলৈ পাব৷ ককাকৰ তুলনাত বনজুই দুগুণতকৈ অধিক, খৰাং দুগুণৰ পৰা তিনিগুণ অধিক, নদীৰ বানপানী তিনিগুণতকৈ অধিক, শস্য বিনষ্ট তিনিগুণতকৈ অধিক আৰু তাপপ্রবাহ সাতগুণ অধিক দেখিবলৈ পাব৷ অর্থাৎ গোলকীয় উষ্ণতা আৰু জলবায়ু পৰিৱর্তনৰ বিৰূপ প্রভাৱ এই শিশুসকলে নিজৰ জীৱনকালত অধিক দেখিবলৈ পাব৷

এই উদ্বেগজনক সম্ভাৱনা ব্যক্ত কৰিছে জার্মানীৰ গৱেষকৰ দল এটাই৷ জার্মানীৰ পোটছডাম ইনষ্টিটিউট ফৰ ক্লাইমেট ইমপেক্ট ৰিছার্চৰ দ্বাৰা প্রকাশিত এক প্রতিবেদনত এই উদ্বেগজনক তথ্য পোহৰলৈ আহিছে৷

উল্লেখ্য যে সেউজগৃহ গেছ নির্গমন প্রক্রিয়া যদি পেৰিছ জলবায়ু চুক্তি অনুসৰি নিয়ন্ত্রণ কৰিব নোৱাৰে তেতিয়াহ’লে পৃথিৱীৰ অস্তিত্বৰ প্রতি ভাবুকি আহিব৷ মানৱ জাতি কঠিন প্রত্যাহ্বানৰ সন্মুখীন হ’ব৷ ২০২১ চনৰ শিশুৱে তেওঁৰ ভৱিষ্যত জীৱনত প্রচণ্ড তাপপ্রবাহ, অনাবৃষ্টি, খৰাং, বান, বনজুই আদিৰ লেখীয়া ভয়াৱহ প্রাকৃতিক দুর্যোগৰ সন্মুখীন হ’বলগীয়া বিষয়টোৱে ভৱিষ্যৎ প্রজন্মলৈ শংকা নমাই আনিব৷