নিয়মীয়া বাৰ্তা ১২ মাৰ্চঃ দল বাগৰা প্রক্রিয়াক প্রতিহত কৰাৰ বাবে দেশত আইন প্রণয়ন হৈ আছে যদিও ৰাজনৈতিক দলসমূহৰ জনপ্রতিনিধিয়ে ইটো দলৰ পৰা সিটো দললৈ যোৱাৰ প্রক্রিয়া অব্যাহত আছে৷ নির্বাচন অধিকাৰৰ প্রহৰী সংস্থা এছ’চিয়েচন ফৰ ডেম’ক্রেটিক ৰি–ফর্মছ, চমুকৈ এ ডি আৰে প্রকাশ কৰা তথ্য অনুসৰি ২০১৬ চনৰ পৰা ২০২০ চনলৈকে ৪৩৩জন প্রতিনিধিয়ে দল বাগৰা ৰাজনীতিত জড়িত হৈ আছে৷ ইয়াৰ ভিতৰত উক্ত সময়ছোৱাত শতিকা পুৰণি দল কংগ্রেছৰ পৰা ১৭০জন জনপ্রতিনিধিয়ে দল এৰি আন দলত যোগদান কৰিছে৷ আনপিনে, বর্তমান কেন্দ্রত শাসনাধিষ্ঠিত বিজেপিৰ মাত্র ১৮জন জনপ্রতিনিধিয়ে নিজ দল এৰি আন দলত যোগদান কৰিছে৷ সাধাৰণতে এই দল বাগৰা ৰাজনীতি নির্বাচনৰ সময়ছোৱাতে সর্বাধিক চলে৷ এ ডি আৰৰ নতুন প্রতিবেদন মতে, ২০১৬–২০২০ চনৰ ভিতৰত ৪০৫জন পুনৰ প্রতিদ্বন্দ্বিতা কৰা বিধায়কৰ ভিতৰত ১৮২জনে ভাৰতীয় জনতা পার্টীত যোগদান কৰাৰ বিপৰীতে ৩৮জন কংগ্রেছত আৰু ২৫জন তেলেংগনা ৰাষ্ট্রীয় সমিতিত যোগদান কৰিছে৷ আনপিনে ২০১৯ চনৰ লোকসভা নির্বাচনৰ সময়ত ৫জন লোকসভাৰ বিজেপি সাংসদে দল এৰি আন দলত যোগদান কৰাৰ বিপৰীতে এই সময়ছোৱাত ৰাজ্যসভাৰ ৭জন সাংসদে কংগ্রেছ এৰি আন দলৰ হৈ প্রতিদ্বন্দ্বিতাত অৱতীর্ণ হৈছে৷ মন কৰিবলগীয়া যে মধ্যপ্রদেশ, মণিপুৰ, গোৱা, অৰুণাচল প্রদেশ আৰু কর্ণাটক চৰকাৰৰ পতন হৈছিল একাংশ বিধায়কে দল এৰাৰ বাবে৷ লক্ষণীয় যে এ ডি আৰে এই প্রতিবেদন প্রকাশ কৰিছে জনপ্রতিনিধিসকলে নিজেই দাখিল কৰা শপতনামাৰ তথ্যৰ আধাৰত৷