নিয়মীয়া বাৰ্তা, ৩০ আগষ্টঃ আম আদমী পার্টীৰ বিৰুদ্ধে গণ আন্দোলনত অংশ ল’বলৈ দিল্লী বিজেপিৰ সভাপতি আদেশ গুপ্তাৰ প্রস্তাৱ প্রত্যাখ্যান কৰিছে প্রবীণ গান্ধীবাদী সমাজকর্মী আন্না হাজাৰেই৷ দিল্লী বিজেপিৰ সভাপতিয়ে পত্রযোগে গান্ধীবাদী হাজাৰেলৈ এই অনুৰোধ কৰাত একমুখে এই অনুৰোধ প্রত্যাখ্যান কৰে হাজাৰেই৷
পত্রখনৰ উত্তৰ দি হাজাৰেই কয়– ‘আপুনি পঠিওৱা পত্রখন পঢ়ি মই দুখ অনুভৱ কৰিছোঁ৷ বিজেপিয়ে ৬ বছৰতকৈ অধিককাল কেন্দ্রত শাসন কৰিলে৷ ২০১৪ চনত শাসনলৈ অহা চৰকাৰখনে দেশখন দুর্নীতিমুক্ত কৰিব বুলি প্রতিশ্রুতি দিছিল৷
কিন্তু জনতাই কোনো সকাহ অনুভৱ নকৰিলে৷ তেনে ক্ষমতাত থকা চৰকাৰে আন দলৰ দোষ বিচাৰে৷ মাজে সময়ে দলটোক আত্মসমালোচনাৰ দৰকাৰ৷’ হাজাৰেৰ এই পত্রক লৈ অস্বস্তিত পৰিছে দিল্লী বিজেপি৷