নিয়মীয়া বাৰ্তা ১৩ মাৰ্চঃ ইউৰোপীয় দেশ ব্রিটেইনৰ প্রায় ১০০ শতাংশ মহিলাই জীৱনকালত এবাৰ হ’লেও যৌন আতিশয্যৰ সন্মুখীন হ’বলগীয়া হয়৷ শেহতীয়াকৈ দেশখনৰ গৱেষণা তথা বিশ্লেষক প্রতিষ্ঠান ইউগ’ভে চলোৱা এক সমীক্ষাত এই তথ্য পোহৰলৈ আহিছে৷ ইউগ’ভৰ তথ্য অনুসৰি প্রায় ৯৭ শতাংশ মহিলাই তেওঁলোকৰ ওপৰত সংঘটিত যৌন আতিশয্য গ্রহণ কৰে৷ দেশখনৰ সংবাদ–পত্র গার্জিয়ানে এক প্রতিবেদনত প্রকাশ কৰিছে যে ৮০ শতাংশ ব্রিটিছ মহিলা ৰাজহুৱা স্থানত যৌন আতিশয্যৰ সন্মুখীন হ’বলগীয়া হয়৷ ইয়াৰে ৯৭ শতাংশৰ বয়স ১৮ৰ পৰা ২৪ বছৰৰ ভিতৰত৷ ইউগ’ভৰ সমীক্ষাৰ ওপৰত ভিত্তি কৰি এই প্রতিবেদন প্রকাশ কৰাৰ লগে লগেই তীব্র চাঞ্চল্যৰ সৃষ্টি হৈছে৷ লক্ষণীয়ভাৱে ৰাষ্ট্রসংঘৰ লিংগ সমতা আৰু মহিলা সবলীকৰণৰ ক্ষেত্রত থকা সংশ্লিষ্ট সংস্থাৰ ব্রিটেইনৰ শাখায়ো অনুৰূপ তথ্য সদৰী কৰিছে৷ বহু ব্রিটিছ মহিলাই এই আতিশয্যৰ ঘটনা সন্দর্ভত আৰক্ষীক অভিযোগ নিদিয়াৰ কাৰণ হৈছে যৌন আতিশয্যৰ বিৰুদ্ধে ব্রিটেইনে আশানুৰূপ ব্যৱস্থা গ্রহণ কৰিবলৈ সক্ষম হোৱা নাই৷ অর্থাৎ আৰক্ষীৰ ওপৰত এইক্ষেত্রত কোনো ধৰণৰ আস্থা নথকাৰ বাবেই মহিলাসকলে অভিযোগ দিবলৈ আগ নাবাঢ়ে৷ গতিকে, নাৰীৰ ওপৰত আতিশয্যৰ ছবিখন আজিও অপৰিৱর্তিত হৈ আছে ব্রিটেইনত৷