দিল্লীত ক’ভিডত প্রাণ হেৰুওৱা আৰক্ষীৰ সংখ্যা পাঁচজনলৈ বৃদ্ধি

নিয়মীয়া বাৰ্তা, ১০ জুনঃ দেশৰ ৰাজধানী নতুন দিল্লীত ক’ৰোনা ভাইৰাছত সংক্রমিত হৈ মঙলবাৰে পুনৰ এগৰাকী আৰক্ষী উপ–পৰিদর্শকে প্রাণ হেৰুৱাইছে৷

  সংবাদ মাধ্যমে সদৰী কৰা অনুসৰি সেনা হাস্পতালত চিকিৎসাধীন হৈ থকা দিল্লী আৰক্ষীৰ উপ–পৰিদর্শক কৰমবীৰ সিঙে মঙলবাৰে শেষ নিশ্বাস ত্যাগ কৰিছে৷ এতিয়ালৈকে দিল্লীত ক’ভিড–১৯ত প্রাণ হেৰুওৱা আৰক্ষীৰ সংখ্যা ৫গৰাকীলৈ বৃদ্ধি পাইছে৷

উল্লেখনীয় যে কৰমবীৰ আছিল ছীলমপুৰৰ এচিপিৰ গাড়ীচালক৷ ২ জুনত কৰমবীৰ সিং ক’ভিড–১৯ত আক্রান্ত হোৱাটো নিশ্চিত কৰা হৈছিল৷ তেতিয়াৰে পৰা হাস্পতালত চিকিৎসাধীন হৈ আছিল আৰক্ষী বিষয়াজন৷ স্মর্তব্য যে এতিয়ালৈকে দিল্লী আৰক্ষীৰ ৪৫০গৰাকী কর্মী মাৰাত্মক ভাইৰাছবিধৰ দ্বাৰা আক্রান্ত হৈছে৷ অৱশ্যে ইয়াৰে ১৯৬গৰাকীয়ে সুস্থ হৈ ঘৰ তথা কর্তব্যলৈ ওভতা বুলি দিল্লী আৰক্ষীয়ে এক বিবৃতিত সদৰী কৰিছে৷

বর্তমানো ৰাজ্যখনৰ কেইবাখনো চৰকাৰী হাস্পতালত চিকিৎসাধীন হৈ আছে ২৪৪গৰাকী আৰক্ষী কর্মী৷ একে সময়তে দিল্লী আৰক্ষীৰ ডেৰ সহস্রাধিক কর্মীৰ পৰীক্ষা সম্পন্ন কৰা বুলি বিবৃতিটোত উল্লেখ কৰা হৈছে৷ স্মর্তব্য যে কমপক্ষেও সাতখন থানাৰ ভাৰপ্রাপ্ত বিষয়াসকল ক’ভিড–১৯ত আক্রান্ত হৈছে দিল্লীত৷ দিল্লীৰ সমান্তৰালকৈ মহাৰাষ্ট্রতো বহু আৰক্ষী কর্মী ক’ৰোনাত সংক্রমিত হৈছে৷