নিয়মীয়া বাৰ্তা ২৯ নৱেম্বৰঃ ক’ভিড মহামাৰীৰ প্রতিৰোধৰ ক্ষেত্রত শূন্য সহনশীলতা নীতি গ্রহণ কৰাৰ একমাত্র দেশ হিচাপে চিহ্ণিত হৈছে চীন৷ এতিয়াও বিশ্বৰ অধিকসংখ্যক যাত্রীয়ে চীনত প্রৱেশৰ অনুমতি লাভ কৰা নাই৷ অতিমাৰীক প্রতিৰোধ কৰিবলৈ ঝি জিনপিং চৰকাৰে যি নিৰাপত্তা প্রাচীৰ গঢ়ি তুলিছে সেয়া ভাগি পৰা হ’লে দেশখনত প্রতিদিনে ৬ লাখ ৩০ হাজাৰ লোক ক’ভিডত সংক্রমিত হ’লহেঁতেন৷ সাম্প্রতিক এক গৱেষণাত এই দাবী কৰা হৈছে৷ উহান প্রদেশৰ পৰা বিশ্বজুৰি ক’ভিড মহামাৰী বিয়পি পৰাৰ পাছত কঠোৰ নীতি গ্রহণ কৰিছিল চীন চৰকাৰে৷ আনকি আজিও চীনে ক’ভিড প্রতিৰোধী কঠোৰ নীতি অব্যাহত ৰাখিছে৷ গতিকে দেশখন ভয়াৱহ পৰিস্থিতিৰ পৰা ৰক্ষা পৰিছে৷ পেকিং বিশ্ববিদ্যালয়ৰ গৱেষকে প্রকাশ কৰা এক গৱেষণা–পত্রত যোৱা সপ্তাহত প্রকাশ কৰিছে চীনে৷ এই গৱেষণা–পত্র অনুসৰি ক’ভিড প্রতিৰোধৰ ক্ষেত্রত চীন চৰকাৰে শূন্য সহনশীল নীতি গ্রহণ কৰাটো আছিল আটাইতকৈ গুৰুত্বপূর্ণ পদক্ষেপ৷