নিয়মীয়া বাৰ্তা, ২৫ জুনঃ গৃহযুদ্ধ বিধ্বস্ত ছিৰিয়াৰ মধ্য আৰু দক্ষিণ প্রান্তত থকা সামৰিক চকীত ক্ষেপণাস্ত্রৰে আক্রমণ চলাইছে ইজৰাইলী সেনাই৷ দেশখনৰ সংবাদ মাধ্যমে সদৰী কৰা অনুসৰি হামা প্রদেশৰ গ্রামাঞ্চলত থকা সামৰিক চকীত এই আঘাত হানিছে ইজৰাইলী বাহিনীয়ে৷
এই ক্ষেপণাস্ত্র আক্রমণৰ ফলত দুজনকৈ সৈনিক নিহত হোৱা বুলিও সংবাদ মাধ্যমে সদৰী কৰিছে৷ ইফালে, ইজৰাইলী বাহিনীয়ে ক্ষেপণাস্ত্র আক্রমণক প্রত্যাহ্বান জনাই দেশখনৰ সেনাই কেইবাটাও ক্ষেপণাস্ত্র ইজৰাইল অভিমুখে নিক্ষেপ কৰিছে৷ তাৎক্ষণিকভাৱে এই ঘটনা সন্দর্ভত ইজৰাইলে কোনো ধৰণৰ প্রতিক্রিয়া প্রকাশ কৰা নাই৷