নিয়মীয়া বাৰ্তা, ১০জুনঃ দিল্লীৰ উপ–মুখ্যমন্ত্রী মনীষ শিশোডিয়াই আশংকা কৰিছে যে দেশৰ ৰাজধানী মহানগৰখনত আগন্তুক ১২–১৩ দিনলৈ ক’ৰোনাত সংক্রমিত লোকৰ সংখ্যা দুগুণ হৈ থাকিলে হাস্পতালসমূহত বিছনাৰ অভাৱ হ’ব৷ ইয়াৰ উপৰি আগন্তুক ৩১ জুলাই পর্যন্ত এনেদৰে সংক্রমণৰ গতি অব্যাহত থাকিলে ক’ভিড–১৯ত আক্রান্ত লোকৰ সংখ্যা ৫.৫ লাখলৈ দিল্লীত বৃদ্ধি পোৱাৰ সম্ভাৱনা আছে বুলি মন্ত্রীগৰাকীয়ে উল্লেখ কৰিছে৷
কিন্তু সেই সময়লৈ দিল্লীৰ হাস্পতালত গৰিষ্ঠসংখ্যক ৰোগীৰ বাবে নাথাকিব বিছনা৷ দিল্লীৰ চৰকাৰী হাস্পতালসমূহত জুলাইৰ অন্তিমভাগলৈ প্রয়োজন হ’ব নতুনকৈ ৮০ হাজাৰ বিছনা৷ এনে পৰিস্থিতিত মুখ্যমন্ত্রী কেজৰিৱালে দিল্লীৰ হাস্পতালত কেবল দিল্লীৰ বাসিন্দাৰ ক’ভিড ৰোগৰ চিকিৎসা কৰাৰ সিদ্ধান্ত লৈছিল যদিও তাক উপ–ৰাজ্যপাল অনিল বাইজালে অগ্রাহ্য কৰা বিষয়টোত আশ্চর্য প্রকাশ কৰিছে শিশোডিয়াই৷