নিয়মীয়া বাৰ্তা ২৬ জুনঃ ৰঙা গ্রহ মঙলৰ গর্ভত বিশাল বিশাল বহু হ্রদৰ উপস্থিতি নিশ্চিত কৰিছে আমেৰিকান মহাকাশ গৱেষণা সংস্থা নাছাই৷ নাছাই ইংগিত দিয়া অনুসৰি গ্রহটোৰ দক্ষিণ মেৰুত বিশাল অংশজুৰি ভূগর্ভত থকা এই হ্রদসমূহত এতিয়াও তৰল পদার্থ আছে৷ এই তৰল পদার্থ পানী হোৱাৰ সম্ভাৱনাই বেছি বুলি নাছাৰ বিজ্ঞানীসকলে উল্লেখ কৰিছে৷ মহাকাশ গৱেষণা সংস্থাটোৰ তথ্য অনুসৰি মঙলৰ দক্ষিণ মেৰুত তাপমাত্রা ইমানেই কম যে বিশাল হ্রদবোৰত তৰল পানী গোট মাৰি বৰফ হৈ পৰিছে৷ কিন্তু সেই বৰফ শুকান কার্বন–ডাই অক্সাইডত পৰিণত হৈছে নে নাই, সেই কথা এতিয়াও নিশ্চিত কৰিব পৰা নাই নাছাৰ বিজ্ঞানীসকলে৷
কিন্তু মঙলৰ হ্রদবোৰৰ তলত যদি আগ্ণেয়গিৰি আছে, তেন্তে এই পানী তৰল অৱস্থাত থকাৰ সম্ভাৱনা আছে বুলি বিজ্ঞানীসকলে ধাৰণা কৰিছে৷ শেহতীয়াকৈ নাছাৰ এই গৱেষণাৰ তথ্য সবিস্তাৰে প্রকাশ পাইছে আন্তর্জাতিক বিজ্ঞান গৱেষণা পত্রিকা ‘জি’ ফিজিকেল লেটার্ছ’ত৷ গৱেষকসকলে জনোৱা অনুসৰি ইউৰোপীয় মহাকাশ গৱেষণা সংস্থা এছাৰ মঙল যান মার্চ এক্সপ্রেছ অর্বিটাৰে পঠিয়াইছে দক্ষিণ মেৰুৰ এই হ্রদবোৰৰ ৰেডি’ ছিগনেল৷ এই ছিগনেল অনুসৰি হ্রদবোৰত এতিয়াও জলস্রোত অব্যাহত আছে৷ গতিকে, মঙলৰ এই হ্রদবোৰত প্রাণীৰ উপস্থিতি থকাৰ সম্ভাৱনাও আছে বুলি নাছাৰ বিজ্ঞানীসকলে উল্লেখ কৰিছে৷ নাছাৰ অন্যতম গৱেষক জেফ্রি প্লটে উল্লেখ কৰা অনুসৰি মঙলৰ দক্ষিণ মেৰুত হ্রদবোৰত সম্পূর্ণৰূপে পানী ভর্তি হৈ থাকিব পাৰে নাইবা অন্য তৰল পদার্থও থাকিব পাৰে৷ কিন্তু বিজ্ঞানীসকলৰ ধাৰণা অনুসৰি হ্রদবোৰত পানীৰ উপস্থিতি থকাৰ সম্ভাৱনাই অধিক৷