নিয়মীয়া বাৰ্তা, ১২ মার্চঃ ৰঙাগ্রহ মঙলৰ জেজেৰ’ গহ্বৰ অঞ্চলত মার্কিন মহাকাশ গৱেষণা সংস্থা নাছাৰ ৰ’ভাৰ পাৰছেভাৰেনছে গ্রহণ কৰা লেজাৰ বাণীবদ্ধ অডিঅ’ আজি মুকলি কৰি দিছে গৱেষণা সংস্থাটোৱে৷
এক অডিঅ’ ক্লিপ আজি নাছাই ইয়াৰ ছাউণ্ডক্লাউড পেজত পোষ্ট কৰিছে৷ উল্লেখনীয় যে পাৰছেভাৰেনছ ৰ’ভাৰত সংলগ্ণ হৈ থকা উচ্চ শক্তিসম্পন্ন কেমেৰাত থকা মাইক্র’ফোনে এই শব্দ ৰেকর্ড কৰিছে ৰঙাগ্রহটোত৷
লক্ষণীয়ভাৱে পাৰছেভাৰেনছ ৰ’ভাৰে মঙলপৃষ্ঠ স্পর্শ কৰাৰ পিছৰে পৰা ৰ’ভাৰটোৱে প্রতিদিনে গ্রহটো সন্দর্ভত ন ন তথ্য প্রেৰণ কৰি আছে৷ মঙলত জীৱৰ অস্তিত্ব আছিল নে নাই সেই সন্দর্ভতো এই ৰ’ভাৰটোৱে অনুসন্ধান চলাব৷ ৰ’ভাৰটোৱে প্রেৰণ কৰা ছবি আৰু ইয়াৰ বিভিন্ন শব্দই উৎসুক কৰি তুলিছে জ্যোতির্বিজ্ঞানীসকলক্৷