ব্রাজিলত ক’ভিডত প্রাণ হেৰুওৱা তিনি লক্ষাধিক লোক ‘গণহত্যাৰহে বলি’

নিয়মীয়া বাৰ্তা, ২৭ মাৰ্চঃ ক’ভিড–১৯ মহামাৰীত ব্রাজিলত তিনি লক্ষাধিক লোকে প্রাণ হেৰুৱাইছে৷  শেহতীয়াকৈ ব্রাজিলত এই ক’ভিডৰ সংহাৰক লৈ প্রাক্তন ৰাষ্ট্রপতি লুলা ডা ছিলভাই তীব্র প্রতিক্রিয়া প্রকাশ কৰিছে৷

জার্মানীৰ সাপ্তাহিক সংবাদ পত্র ‘ডাৰ স্পিজেল’ৰ সৈতে হোৱা এক সাক্ষাৎকাৰত লুলাই উল্লেখ কৰিছে যে ক’ভিডত আক্রান্ত হৈ মৃত্যু হোৱা লোকসকলৰ মৃত্যুক সাধাৰণ বুলি ধৰি ল’ব নোৱাৰি৷ ব্রাজিলৰ ইতিহাসত এয়া বৃহত্তম গণহত্যা বুলিও উল্লেখ কৰে লুলাই৷

মহামাৰী সন্দর্ভত ব্রাজিলৰ বর্তমানৰ ৰাষ্ট্রপতি জাইৰ ব’লছ’নাৰোৱে দেশবাসীক মিছা কথা কৈছিল বুলিও অভিযোগ কৰিছে লুইজ ইনাচি’ লুলা ডা ছিলভাই৷ লেটিন আমেৰিকাৰ দেশখনৰ ইতিহাসত ক’ৰোনা ভাইৰাছ মহামাৰীত প্রাণ হেৰুওৱা লোকসকল ৰাষ্ট্রপতি ব’লছ’নাৰোৰ গণহত্যাৰ বলি বুলিহে অভিহিত কৰিছে লুলাই৷

প্রাক্তন বাঁওপন্থী ৰাষ্ট্রপতিগৰাকীৰ মতে মহামাৰীৰ মোকাবিলা কৰাৰ ক্ষেত্রত জাইৰ ব’লছ’নাৰোৱে কোনোধৰণৰ গুৰুত্ব প্রদান নকৰিলে৷ আনকি আজিৰ মুহূর্তলৈকে ব’লছ’নাৰোৱে আঁকোৰগোজ মনোভাব লৈ আছে মহামাৰী সন্দর্ভত৷

গতিকে প্রতিদিনে ক’ভিড–১৯ত প্রাণ হেৰুৱাবলগীয়া হৈছে সাধাৰণ লোকসকলে৷ লক্ষণীয়ভাৱে কিছুদিন পূর্বে দুর্নীতিৰ গোচৰৰ পৰা মুক্ত হোৱা লুলাৰ এই মন্তব্যৰ পাছতে দেশজুৰি সৃষ্টি হৈছে উত্তপ্ত পৰিস্থিতি৷