নন্দীগ্রামত মমতা বেনার্জীক আক্রমণ ভৰি–মুখত আঘাত

নিয়মীয়া বাৰ্তা ১১ মাৰ্চঃ পশ্চিমবংগত নির্বাচনী হিংসাই স্বয়ং মুখ্যমন্ত্রীক আঘাত কৰিলে৷ বুধবাৰে নন্দীগ্রাম বিধানসভা সমষ্টিত প্রার্থী হিচাপে মনোনয়ন–পত্র দাখিল কৰাৰ পাছতেই দলবদ্ধ আক্রমণৰ সন্মুখীন হ’ল মুখ্যমন্ত্রী মমতা বেনার্জী৷ তথ্য মতে ৪–৫জন লোকে নির্বাচনী প্রচাৰ সভাৰ সময়ত মুখ্যমন্ত্রী বেনার্জীক ঠেলি পেলাই দিয়াৰ পাছতে মুখ্যমন্ত্রীগৰাকী আঘাতপ্রাপ্ত হয়৷ একালৰ বিশ্বস্ত সহযোগী, বর্তমান বিজেপি নেতা শুভেন্দু অধিকাৰীৰ বিৰুদ্ধে নির্বাচনত অৱতীর্ণ হোৱা মুখ্যমন্ত্রী বেনার্জীৰ বিধানসভা সমষ্টি নন্দীগ্রামত সম্প্রতি উত্তেজনাময় পৰিস্থিতি সৃষ্টি হৈছে৷ দলবদ্ধ অক্রমণৰ পাছত আঘাতপ্রাপ্ত মুখ্যমন্ত্রী বেনার্জী চিকিৎসাৰ বাবে কলকাতাত উপস্থিত হৈছে৷

লক্ষণীয় যে বুধবাৰে পুৱা মুখ্যমন্ত্রী বেনার্জীয়ে তৃণমূল কংগ্রেছৰ সভাপতি সুব্রত বেনার্জীৰ সৈতে হালদিয়া মহকুমাধিপতি কার্যালয়ত মনোনয়ন–পত্র দাখিল কৰাৰ পূর্বে দুই কিলোমিটাৰ ৰোড শ্ব’ত অংশগ্রহণ কৰে৷ মনোনয়ন–পত্র দাখিল কৰাৰ পূর্বে এটা মন্দিৰত প্রার্থনা আগবঢ়ায় মুখ্যমন্ত্রীগৰাকীয়ে৷ ইয়াৰ পাছতে নির্বাচনী প্রচাৰ সভাত অংশগ্রহণ কৰাৰ সময়তে মুখ্যমন্ত্রীগৰাকী দলবদ্ধ আক্রমণৰ সন্মুখীন হয়৷ এই আক্রমণ সন্দর্ভত সাংবাদিকক মুখ্যমন্ত্রীগৰাকীয়ে কয় যে তেওঁক চাৰি–পাঁচজন লোকে ঠেলি দিয়াত বাগৰি পৰে আৰু তেওঁৰ ভৰি আৰু মুখত আঘাত পায়৷ এই ঘটনাত মুখ্যমন্ত্রীগৰাকীয়ে ষড়যন্ত্র আছিল বুলি উল্লেখ কৰি এই সন্দর্ভত দেশৰ নির্বাচন আয়োগত অভিযোগ দাখিল কৰিব বুলিও কয়৷

মুখ্যমন্ত্রীগৰাকীয়ে আনকি তেওঁৰ আঘাতপ্রাপ্ত ভৰিখন দেখুৱাই কয় যে ভৰিখন ফুলি অহিছে৷ তেওঁক কৰা এই আক্রমণ পৰিকল্পিত, কিয়নো সেই সময়ত কোনো নিৰাপত্তাৰক্ষী নাছিল৷ লক্ষণীয় যে মুখ্যমন্ত্রী বেনার্জীক আক্রমণ কৰাৰ সময়ত ৰেকর্ডিং হোৱা ভিডিঅ’ ফুটেজ এটাত কেইবাগৰাকীও নিৰাপত্তাৰক্ষীয়ে বেনার্জীক দাঙি নি তেওঁৰ কাৰৰ পাছৰ আসনত বহুৱাই দিয়া প্রত্যক্ষ কৰা হৈছে৷ ৬৬ বছৰীয়া মুখ্যমন্ত্রীগৰাকী আঘাত দেখা গৈছে৷ তদুপৰি মুখ্যমন্ত্রীগৰাকী শেতা পৰা, শংকিত আৰু বেদনাত থকা যেন প্রতিফলিত হৈছে৷ মুখ্যমন্ত্রী বেনার্জীয়ে তেওঁৰ এই আক্রমণক ষড়যন্ত্র বুলি পৰোক্ষভাৱে বিজেপিৰ প্রতি সন্দেহৰ আঙুলি টোঁৱোৱাৰ পাছত বিজেপি নেতা কৈলাস বিজয় বার্গিয়াই মুখ্যমন্ত্রী বেনার্জীৰ এখন নাটক আখ্যা দি কয় যে মমতাক আঘাত কৰিবলৈ কোনেও সাহস কৰিব নোৱাৰে৷