নিয়মীয়া বাৰ্তা, ১ ছেপ্টেম্বৰঃ বলীউড অভিনেতা সুশান্ত সিং ৰাজপুতৰ ৰহস্যজনক মৃত্যুৰ তদন্ত চলাই থকা চি বি আয়ে ক্রমাগত চতুর্থ দিনৰ বাবে অভিনেতাগৰাকীৰ গার্লফ্রেণ্ড ৰিয়া চক্রৱর্তীক জেৰা কৰে৷ তিনি দিনত প্রায় ২৭ ঘণ্টা জেৰা কৰাৰ পিছত কালি পুনৰ মুম্বাইৰ ডি আৰ ডি অ’ গেষ্ট হাউছত চক্রৱর্তীক উপর্যুপৰি প্রশ্নৰে চি বি আয়ে নতুন নতুন তথ্য পোহৰলৈ অনাৰ চেষ্টা চলায়৷
আনপিনে, ৰিয়া চক্রৱর্তীৰ ভাতৃ সৌৱিককো কালি পুনৰ পঞ্চম দিনৰ বাবে জেৰা কৰে চি বি আয়ে৷ ৰহস্যজনক মৃত্যুৰ লগত অভিনেতাজনৰ মুম্বাইৰ বান্দ্রাস্থিত বেংকৰ একাউণ্ট আৰু ড্রাগছৰ সৈতে সম্পর্ক জড়িত হৈ পৰাত চি বি আয়ে কালি বেংকৰ বিষয়াকো সোধা–পোছা কৰে৷ সুশান্তৰ পৰিয়ালৰ লোকে বেংকৰ ১৫ কোটি টকা গার্লফ্রেণ্ড ৰিয়াই হৰলুকী কৰা বুলি অভিযোগ দাখিল কৰাৰ পৰিপ্রেক্ষিততে বেংকৰ বিষয়াক জেৰা কৰে তদন্তকাৰী সংস্থাটোৱে৷
আনহাতে, ৰহস্যজনক মৃত্যুত ড্রাগছ সাঙোৰ খাই পৰাত এন চি বিয়ে মুম্বাইৰ দুই কুখ্যাত ড্রাগছ ব্যৱসায়ী ফাৰুক বাটাতা আৰু ছিংকী পাঠানক জেৰা কৰাৰ প্রস্তুতি চলাইছে৷ দুই কুখ্যাত ব্যৱসায়ীক এন চি বিয়ে সূক্ষ্ম নিৰীক্ষণত ৰাখিছে৷ তেনেদৰে গার্লফ্রেণ্ড ৰিয়াৰ হোৱাটছএপ মেছেজত ড্রাগছৰ বিষয়ে আলোচনাৰ তথ্য পোহৰলৈ অহাত এন চি বিয়ে ৰিয়া চক্রৱর্তীৰ বিৰুদ্ধে ড্রাগছক লৈ অপৰাধমূলক গোচৰ ৰুজু কৰিছে৷