নিয়মীয়া বাৰ্তা, ৩০ আগষ্টঃ জেইই–নীট পৰীক্ষা স্থগিত কৰাৰ বাবে কংগ্রেছসহ বিৰোধীয়ে প্রতিবাদ কৰাৰ সময়তে কানপুৰত এই পৰীক্ষাৰ তাৰিখক লৈ চলিছে বৃহৎ জুৱা৷ কানপুৰ আৰক্ষীয়ে অলপতে পৰীক্ষাক লৈ চলি থকা বেটিং–গেম্বলিং ৰেকেট এটাক উৎখাত কৰিবলৈ সক্ষম হয়৷
এই ৰেকেট চলাই থকা সাতজন লোকক আৰক্ষীয়ে গ্রেপ্তাৰ কৰে৷ ধৃত লোককেইজনৰ পৰা নগদ ৩৮.২৫ লাখ টকা, ১০টা ম’বাইল ফোন আৰু এখন পঞ্জীয়ন কৰা বহী জব্দ কৰিবলৈ সক্ষম হয়৷ অৱশ্যে আৰক্ষীয়ে চলোৱা অভিযানত ৰেকেটৰ মূল ব্যক্তিজনক গ্রেপ্তাৰ কৰিব নোৱাৰিলে৷ ৰেকেটটোৱে পৰীক্ষা হ’ব নে নহ’ব, হ’লে কেতিয়া হ’ব, তাক লৈ বেটিং–গেম্বলিং কৰি আছিল৷
কানপুৰ আৰক্ষী অধীক্ষক দীপক ভুকাৰে সংবাদ মেলত বেটিং চক্রটোক উৎখাত কৰা বুলি সদৰী কৰিছে৷ আৰক্ষী অধীক্ষকগৰাকীয়ে প্রকাশ কৰা মতে, ৰেকেটৰ মূল ব্যক্তি সন্তোষ ছনী আৰক্ষীৰ জালৰ পৰা পলাই সাৰিবলৈ সক্ষম হয়৷ বিগত চাৰি বছৰ ধৰি এনেধৰণৰ বেটিঙত জড়িত হৈ আছে ছনী৷ উল্লেখ্য যে জেইই–নীট পৰীক্ষা অহা ছেপ্টেম্বৰ মাহত অনুষ্ঠিত হ’ব৷ জেইই অনুষ্ঠিত হ’ব ১–৬ ছেপ্টেম্বৰৰ ভিতৰত আৰু নীট পৰীক্ষা অনুষ্ঠিত হ’ব ১৩ ছেপ্টেম্বৰত৷