নিয়মীয়া বাৰ্তা, ১২ মার্চঃ উত্তৰ প্রদেশৰ বিভিন্ন জিলাত পঞ্চায়তসমূহে নাৰীৰ বিৰুদ্ধে কঠোৰ নীতি গ্রহণ কৰা বিষয়ক লৈ দেশজুৰি প্রতিক্রিয়া চলি আছে৷ শেহতীয়াকৈ মুজাফফৰনগৰ জিলাৰ পিপালশ্বাহ গাঁৱত খাপ পঞ্চায়তে মহিলা তথা কিশোৰী–যুৱতীৰ জীন্ছ পৰিধানত নিষেধাজ্ঞা আৰোপ কৰিছে৷
পুৰুষে পৰিধান কৰা কামিজো মহিলাই পৰিধান কৰিব নোৱাৰিব বুলি কঠোৰ সিদ্ধান্ত গ্রহণ কৰিছে পঞ্চায়তখনে৷ পঞ্চায়তৰ এই নিষেধাজ্ঞা আৰোপ হোৱাৰ লগে লগে তীব্র প্রতিক্রিয়াৰ সৃষ্টি হৈছে উত্তৰ প্রদেশত৷ পঞ্চায়তখনৰ মতে, জীন্ছ হৈছে পাশ্চাত্য সংস্কৃতিৰ এক অংশ৷
পাশ্চাত্যৰ সংস্কৃতিত লীন যোৱাৰ পৰিৱর্তে মহিলাসকলে দেশীয় সংস্কৃতিক সন্মান জনাই পৰম্পৰাগত ভাৰতীয় পোছাক পৰিধান কৰা উচিত বুলিও যুক্তি দর্শাইছে এই খাপ পঞ্চায়তে৷ ৰাজপুত সম্প্রদায়ৰ নিয়ন্ত্রণত থকা এই পঞ্চায়তৰ তৰফৰ পৰা নিষেধাজ্ঞা উলংঘা কৰিলে শাস্তি প্রদানৰ লগতে সামাজিকভাৱে বর্জন কৰা হ’ব বুলিও হুংকাৰ দিছে৷