নিয়মীয়া বাৰ্তা, ২৩ ডিচেম্বৰঃ গুজৰাটৰ ধনকুবেৰ হীৰা ব্যৱসায়ী মহেশ ছাভানিয়ে পূর্বৰ বর্ষবোৰৰ দৰে এইবাৰো দুদিনীয়াকৈ ২৭১গৰাকী পিতৃহাৰা যুৱতীৰ সমূহীয়া বিবাহ সম্পন্ন কৰাইছে ৷ ছুৰাটত শনিবাৰে এক বৃহৎ জনসমাৱেশৰ মাজত এই সমূহীয়া বিবাহ কার্য সম্পন্ন কৰা হয় ৷ স্মর্তব্য যে ছাভানিয়ে ২০১০ চনৰ পৰাই এনেদৰে পিতৃহাৰা বহু যুৱতীৰ বিবাহ সম্পন্ন কৰাই আহিছে ৷ হীৰা ব্যৱসায়ী ছাভানিৰ মতে, এয়া তেওঁৰ এক সামাজিক দায়বদ্ধতা ৷ ছুৰাটত শনিবাৰ আৰু দেওবাৰে দুদিনীয়াকৈ এই বিবাহ কার্য সম্পন্ন কৰা হৈছে টাপি নদীৰ পাৰত ৷
উল্লেখনীয় যে এই যুৱতীসকলৰ ভিতৰত পাঁচগৰাকী মুছলমান আৰু নেপালৰ পৰা অহা এগৰাকী যুৱতীও আছে ৷ অকল গুজৰাটৰেই নহয়, যুৱতীসকলৰ দুগৰাকী উত্তৰ প্রদেশৰ, পাঁচগৰাকী মহাৰাষ্ট্রৰ আৰু ঝাৰখণ্ড তথা ওড়িশাৰ এগৰাকীকৈ যুৱতীও আছে এই বিবাহপাশত আবদ্ধ হোৱা কইনাসকলৰ ভিতৰত৷ স্থানীয় সংবাদ মাধ্যমে সদৰী কৰা অনুসৰি, যুৱতীসকলক বিয়াৰ বাবে প্রয়োজনীয় সকলো সামগ্রী প্রদান কৰিছে ছাভানিয়ে ৷
স্মর্তব্য যে ২০১২ চনত ২৩গৰাকী যুৱতীৰ এনেদৰে সমূহীয়া বিবাহ সম্পন্ন কৰিছিল হীৰা ব্যৱসায়ীগৰাকীয়ে ৷ প্রতিবছৰে এই সমূহীয়া বিয়াত বৃদ্ধি পাইছে যুৱতীৰ সংখ্যা ৷ এতিয়ালৈকে মহেশ ছাভানিয়ে মুঠ ৩,১৭২গৰাকী যুৱতীক বিবাহপাশত আবদ্ধ হোৱাৰ ক্ষেত্রত সহায় কৰিছে ৷ লক্ষণীয়ভাৱে ইয়াৰ বেছিভাগ যুৱতীৰ বিয়াৰ সমস্ত খৰচ বহন কৰিছে হীৰা ব্যৱসায়ীগৰাকীয়ে৷ এই কার্যৰ জৰিয়তে মহেশ ছাভানিয়ে বিভিন্ন মহলৰ প্রশংসা লাভ কৰিবলৈ সক্ষম হৈছে ৷