ক‘ভিড-১৯ৰ ডিউটিত থকা চামগুৰি ৰাজহ চক্ৰ চক্ৰ বিষয়া অস্মিতা ৰেখা বৰাক ভাড়াঘৰৰ মালিকৰ দুৰ্ব্যৱহাৰ

নিয়মীয়া বাৰ্তা, ২৪ জুনঃ ফ্ৰৰ্ন্ট লাইন ৱৰ্কাৰ হিচাপে ক‘ভিড-১৯ৰ ডিউটিত থকা চামগুৰি ৰাজহ চক্ৰৰ সংলগ্ন চক্ৰ বিষয়া অস্মিতা ৰেখা বৰাক ভাড়া ঘৰৰ মালিকে কৰা দুৰ্ব্যৱহাৰক কেন্দ্ৰ কৰি আজি নগাঁও জিলা প্ৰশাসনত তীব্ৰ প্ৰতিক্ৰিয়া সৃষ্টি হৈছে।

জানিব পৰা মতে, নগাঁও জিলাৰ ইটাচালি আৰক্ষী থানাৰ অন্তৰ্গত আমোলাপট্টিৰ কৃষ্ণ শইকীয়া আৰু ললিতা বাৰিকৰ ঘৰত ভাড়াতীয়া হিচাপে থাকে চামগুৰি ৰাজহ চক্ৰৰ সংলগ্ন চক্ৰ বিষয়া অস্মিতা ৰেখা বৰা আৰু সহকাৰী আয়ুক্ত মৃদুল বড়ো। সাম্প্ৰতিক সময়ত দুয়োগৰাকী প্ৰশাসনিক বিষয়াই জিলাখনত ক‘ভিদ-১৯ সংক্ৰমণ ৰোধৰ বাবে জৰুৰীকালিন সেৱাৰ লগত জড়িত হৈ গুৰুত্বপূৰ্ণ দায়িত্ব পালন কৰি আহিছে। এই দুয়োগৰাকী বিষয়াই ক‘ভিদ-১৯ৰ ডিউটিত গৈ ভাড়াঘৰলৈ ভাইৰাছ কঢ়িয়াই অনাৰ আশংকাত মালিকে দুৰ্ব্যৱহাৰ কৰাৰ লগতে পুৱা ৬ বজাত ক‘ভিড-১৯ৰ ডিউটিত যোৱাৰ ক্ষেত্ৰত আৰু নিশা ১০ বজাৰ পাছত ভাড়াঘৰলৈ ওভতি অহাৰ ক্ষেত্ৰত বাধা প্ৰদান কৰি প্ৰতিদিনে মূল গেটত তলা মাৰি থয়।

ইয়াকে লৈ ভাড়াঘৰৰ মালিকৰ লগত প্ৰায়ে তৰ্কাতৰ্কিতো লিপ্ত হ’বলগীয়া হৈছে। প্ৰশাসনীয় বিষয়া হিচাপে এই ক্ষেত্ৰত মালিকৰ লগত হোৱা কাৰ্য দুৰ্ভাগ্যজনক বুলি অভিহিত কৰিছে চক্ৰ বিষয়াগৰাকীয়ে। আনহাতে, প্ৰশাসনীয় বিষয়াগৰাকীয়ে ইউ পি এচ ই পৰীক্ষাৰ বাবে পঢ়িবলৈ গোটাই ৰখা নোট সহ “দ্যা হিন্দু“কাকত সমূহো বনকৰা মহিলাৰ দ্বাৰা হৰলুকি কৰাত জড়িত হোৱা এক ঘটনাও সদৰী হৈছে। এই সন্দৰ্ভত মলিকৰ পৰা যেতিয়া এটা মোবাইল মেচেজৰ জৰিয়তে জানিবলৈ বিচৰা হ‘ল, তেতিয়াই মালিকে বেয়া মেচেজ দিয়া বুলি চেলু উলিয়াই প্ৰচণ্ড কাজিয়াৰ সূত্ৰপাত কৰাৰ লগতে ৰাষ্টাত চিঞৰ-বাখৰ কৰি পৰিৱেশ বিনষ্ট কৰে আৰু বৰাক ঘৰৰ পৰা বাহিৰ হৈ যাবলৈ দিয়ে। ইয়াৰ উপৰি অস্মিতা ৰেখা বৰা আৰু মৃদুল বড়োৰ সহযোগী হিচাপে কাম আৰু বন কৰা লোক সকলকো বিভিন্ন কটুক্তিৰে ভাড়াঘৰৰ মালিকে ককৰ্থনা কৰে।

আনহাতে, মাহেকীয়া ভাড়া সময় মতে আদায় নিদিয়া বুলি মিছা অভিযোগ তুলি ঘৰৰ পৰা ওলাই যাবলৈ মালিকৰ কাঢ়া নিৰ্দেশ দিয়াত ৰাজহ চক্ৰ বিষয়াগৰাকীয়ে উপায়ন্তৰ হৈ ভাড়াঘৰৰ মালিক কৃষ্ণ শইকীয়া আৰু ললিতা বাৰিকৰ বিৰুদ্ধে ইটাচালি আৰক্ষী থানাত এখন এজাহাৰ দাখিল কৰিছে। যোৱা কালি থানাত দিয়া এজাহাৰৰ প্ৰতিলিপি ইতিমধ্যে নগাঁও জিলাৰ উপায়ুক্ত আৰু আৰক্ষী অধীক্ষকক প্ৰদান কৰা হৈছে। এই ক্ষেত্ৰত জিলা প্ৰশাসন আৰু আৰক্ষীয়ে কি ভুমিকা গ্ৰহন কৰে সেইয়া সময়তে লক্ষনীয় হব বুলি সচেতন মহলে মত প্ৰকাশ কৰিছে ৷