নিয়মীয়া বাৰ্তা, ৪ জুলাইঃ চৰাইদেউ জিলাৰ আবকাৰী বিভাগে অবৈধ সুৰাৰ বিৰুদ্ধে আজি এক অভিযান চলায়। জিলাখনৰ সোণাৰি আবকাৰী চক্ৰৰ ভাৰপ্ৰাপ্ত বিষয়া আৰু আবকাৰী অভিযানকাৰী দলে চফ্ৰাই অঞ্চলৰ ৰেলৱে ষ্টেশ্যন, খনা মোহনগাঁও আদি অঞ্চলত চফ্ৰাই আৰক্ষীৰ সহযোগত এই অভিযান চলায়। অভিযানকালত দলটোৱে কেইবাটাও স্থানত অসাধু চুলাই মদৰ ব্যৱসায়ীয়ে পাতি লোৱা চুলাইৰ ভাতী উচ্ছেদ কৰাৰ লগতে প্ৰায় ২৬০ লিটাৰ চুলাই মদ তৈয়াৰৰ বাবে ৰখা পাছ , ৫ টা সুৰা তৈয়াৰত ব্যৱহৃত যন্ত্ৰ জব্দ কৰাৰ লগতে ১০ লিটাৰ বিক্ৰীৰ বাবে ৰখা চুলাই মদ আৰু প্ৰায় ২০ কেজি লাওপানীৰ পাছ জব্দ কৰি নষ্ট কৰি পেলায়। অভিযানকাৰী দল যোৱাৰ উমান পাই অবৈধ সুৰাৰ ব্যৱসায়ীসকল পলাই সাৰিবলৈ সক্ষম হয় যদিও এজন ব্যক্তিক গ্ৰেপ্তাৰ কৰিবলৈ সক্ষম হয়। এই সন্দৰ্ভত অবৈধ সুৰাৰ ব্যৱসায়ীসকলৰ বিৰুদ্ধে মুঠ ৬টা গোচৰ ৰুজু কৰা হয় বুলি চৰাইদেউ জিলাৰ আবকাৰী সূত্ৰই জানিবলৈ দিছে।