নিয়মীয়া বাৰ্তা, ২৩ অক্টোবৰ: পোহৰৰ উৎসৱ দীপাৱলীৰ প্ৰাক ক্ষণত আজি পাঠশালাত ভাৰতীয় জনতা যুৱ মৰ্চাৰ তৰফৰ পৰা মাটিৰ চাকি বিতৰণ কৰা হয়। ভাৰতীয় জনতা যুৱ মৰ্চাৰ অসম প্ৰদেশ কমিটিৰ নিৰ্দেশ মৰ্মে প্ৰতিবছৰৰ দৰে এইবাৰো দীপাৱলী উপলক্ষে আজি ভাৰতীয় জনতা যুৱ মৰ্চা, বজালী জিলাৰ উদ্যোগত পাঠশালা নগৰত ৰাইজৰ মাজত মাটিৰ চাকি বিতৰণ কৰা হয়। মাটিৰ চাকি বিতৰণৰ জৰিয়তে পোহৰৰ উৎসৱ উপযাপনৰ লগতে থলুৱা মৃৎ শিল্পীক উৎসাহিত কৰাটোও যু্ৱ মৰ্চাৰ অন্যতম লক্ষ্য বুলি মন্তব্য কৰি এই অনুষ্ঠানত উপস্থিত থাকে বজালী জিলা বিজেপিৰ সভাপতি নগেন চৌধুৰী আৰু বিজেপি বজালী জিলা যুৱ মৰ্চাৰ সভাপতি চম্পক কাকতিৰ লগতে জিলা আৰু মণ্ডলৰ বিষয়ববীয়া তথা কাৰ্যকৰ্তাসকল৷ কাৰ্যকৰ্তাসকলে ভাৰতীয় জনতা যুৱ মৰ্চাই সদায়েই এই দেশ, এই দেশৰ সংস্কৃতি আৰু এই দেশৰ জনসাধাৰণৰ প্ৰতি দায়বদ্ধ বুলি মন্তব্য কৰি কেইবা সহস্ৰাধিক মাটিৰ চাকি বিতৰণ কৰি মুলত মৃৎ শিল্পৰ সৈতে জড়িত শিল্পী তথা কাৰিকৰসকলক তেওঁলোকৰ জীৱিকাৰ ক্ষেত্ৰত সকাহ দিয়াৰ লগতে উৎসাহ জনোৱাৰ উদ্দেশ্যে যুৱ মৰ্চাই এই কাৰ্যসূচী হাতত লোৱা বুলি সদৰি কৰে৷
প্ৰেৰকঃ কল্যাণ কলিতা